Sunday, December 6, 2009

أنا ومصر!!

فى يوم كنت ماشيه فى الشارع..مستنيه الميكروباص وسط عشرات من البشر...يحلمون بحيز من الفراغ فى ترقه اتوبيس....

لمحتها...سيده..لافه نفسها بعلم مصر مهلل ومقطع...!!!...وقفت بجانبى وهى تنظر لى بشفقه وانا احمل حقيبتى الثقيله والبالطو الابيض ..ومستنيه الفرج..!!
ابتسمت وقالت:انا مصر....

فرددت بعنف..وانا شيماء...!!ايه المنظر اللى انت فيه ده..!!فضحتينينا الله يكسفك..!.!!

ردت بطريقه اعنف:وانا اعملكو ايه انتو اللى وكستونى...مش كفايه اوياكوو ولامااكووو...وانتو بتبرطعوا فيا وفى ارضى..وبتلعبوا بعرضى....ولا هممكو اسمى ولا تاريخى ولا مكانتى!!!

انا:بقولك ايه انتى بتكلمينى كده ليه...ايه الاسلوب ده...ثم انا مالى ماتقوليش انتو...انا ماليش دعوه..!!!

تهدأ قليلا..:يابنتى انتى ولا هما مش مهم..!!

تخرج ساندوتش الطعميه من جيبها...تسألنى:...تاكلى...؟؟

انا:لا شكرا.!!!

تتحدث وفمها ممتلأ بالاكل..:انتى شكلك دكتورة...صح...بس شكلك صغير..!!!

انا :اه دكتورة للاسف..!!!

هى وهى تملأ فمها بقطمه اخرى من ساندوتش الطعميه:للاسف ليه يابنتى...ده انتى هتعملى خدمه للناس ربنا هيجازيك عليها كل خير...
ان شاء الله هتتبسطى...ده امثالك هما اللى بيبسطونى ويخلونى احس ان لسه فيا خير..وان لسه فيه امل انى ارجع تانى رافعه راسي...!!!

استشعر ريمكس رهيب من موسيقى صباح الخير يا مصر مع اغنيه شيرين..طب ماشربتش من نيلها..طب جربت تغنيلها!!!!لأ!!!ويا حلوة يا بلحه يا مقمعه ..شرفتى اخواتك لاربعه!!!

تسألنى..مالك يابنتى سرحتى فى ايه..!!!

ابدا...مافيش...بس واضح انك مش البلد دى يا حاجه!!!!

هنا العلم لا يكيل بالبتنجااان..!!!

عارفه انا بدرس بقالى 7 سنين فى الكليه..وقبلهم 11 سنه فى المدرسه....واهلى وانا تعبنا جدا ..لحد ماتخرجت...!!
والمفروض انى افرح بقى...واتنعش..!!

عارفه بقبض كام....272!!!!

فى الشهر طبعا..!!!

تمسح فمها بكم جلابيتها الرثه..وهى مبحلقه عينيها فى وجهى..وكأن اللى بيحصل ده واالللى بكلمها عنه فى بلاد الواق الواق...!!

فى عرف مين ده!!!

والاقيلك واحد ..صايع وضايع...ولا يفهم حاجه بيلعب بالفلوس لعب...لمجرد انه جاب جونين ولا تلاته بالصدفه من 70 كوره جاتله..!!!!

ولا واحد كل همه فى حياته ازاى يعمل شعره بالجل..ويفتح زراير قميصه لسرته ..ويلم البنات حواليه...وياخد ملايين فى ساعه ونص ولا ساعتين من الدوشه والنشاذ المتواصل!!!!!

وانا...انا...اقعد فى نبطشيه 12 ساعه عينى مفنجله...ويوميتى..ماتكملش عشره جنييه!!!

اسكتى ياشيخه بالله عليك الواحد حاطط فى قلبه وساكت..!!!

ولا الوسطه والكوسه...يابووووووى...عارفه الحمد لله ان الواحد ربنا بيسرله الواسطه ..بس عشان ياخد حقه...لكنن فى الاف غيرى..حقوقهم ضايعه...
!
انت نمتى ولا ايه...

-مصر..لا جاتلى سكته قلبيه للمره السابعه والخمسيين بعد المليون الخامس والستيين...!!!!!!

انا..قشطه..الميكروباص جه..!!

11 comments:

عمرو فكرى said...

تخريف اصلى اصلى يعنى :D

يا مراكبي said...

كويس انك نقلتي النوت لهنا .. المدونة هي المكان الأصح للنشر لأنها الأكثر انتشارا ومتاحة للجميع .. ومن السهل الوصول اليها عبر محركات البحث .. لكن النوت في الفيس بوك بتبقى نحصورة بين الأصدقاء فقط ودول عددهم مهما زاد فهو محدود

يــوم جــديد said...

هو الطب بيعمل كل ده
معلش يا بنتي استحملي دا أنا ريحة الطعمية واصلالي لغاية هنا :)
بس حلوة الست مصر دي
حلو أوي إنها لسه عايشة

تخاريف خاصه! said...

عمرو...

:D

احذروا التقليد..!


باشمهندزز..احمد..


:))))

اصلى قفلت الاكونت شويه...

المدونه وحشتنى فعلا...
:))

تخاريف خاصه! said...

يوم جديد..


الطب بيعمل كده...واكتر من كده!!!

:D

قلم رصاص said...

هههههههههههههه

دي تخايف في الجول

احييكي على هذه المدونة الرائعة

دمتي مبدعه

في حفظ الله

قليل من التفكير said...

272 جنيه حته واحده

عقبالنا

:)

تخاريف خاصه! said...

قلم رصاص...


اشكرك..

:)


قليل من التفكير

للاسف حته واحده!!!!

:D

safa7_karmooz said...

هوا النت فصل ولا ايه؟؟

جديد said...

تخاريف كما لو انها ليسة بتخاريف

Maha Shahen said...

كتابتك رائعه بجد تخطف وخلتنى اقرأ مواضيع كتيره لكنى كان صعب اعلق عليهم كلهم
عارفه بتجمعى بين خفة الدم والكوميديا الهزليه
فعلا كتابه مميزه ومبدعه
ربنا يوفقك دايما