Monday, October 29, 2007

انه حقا عالم واحد...2




يحكى انه فى اول الزمان..فى سالف العصر واالأوان..
حيث كانت العيشه جنان..والموضه "ستان"
كان هناك غابة بعيده...اللى حكيت لكو عنها

..هنا قبل كده

فاكرينها..؟؟
المهم أهالى الغابه دول كانو وحشيين...وحشيين..

مغلبين حاكمهم المسكين...

حاولنا نفهمهم..وغلبنا نقول...يا اهالى الغابه يا متعبيين..

ياللى عالنكد والكأبه متعوديين.
.
وللفقر والشحاته..محترفين...

سيبوا اسدكم فى حاله ..ده اسد مريض..والعَجَز جاله...

مش معقول كل يوم والتانى تحرقوا دمه على صفحات الجراييد
!!!!
مره تقولوا خايين كبير..ومره عميل اجير..

وف الاخر تطلعوا الاشاعات بانه جاله هادم اللذات..

ومفرق الجماعات..وانه كده ببساطه مات..؟؟؟
!!!!
اتقوا الله يا ااهالى الغابه..ده انتو والله تستهلوو اللى بتعمله فيكو الكلاب والديابه...

لا واللى زاد وغطى..

العصافير الصغيره ..اللى من البيضه... لسه ماطلعتش ...

وفى امور الغابات..قطعا ماتفهمش...

قال اييييه...شويه منهم عاملينلى..جماعه فى كتاتيب الغابه..!!!!

وقال ايه..اتحاد عصافير..

وكلام كبير..لا وكمان طايشيين ..

ومش خايفين..
نازلين الانتخاابات الاتحاديه..

باسم الجماعه المحظورة ديه...
!!!
لاهمهم بقى صغير ولا كبير...ولا عميد ولا غفييير..
!!!
وطبعا كان لازم نوقفهم عند حدهم..

ونشطب اسماءهم من الانتخابات الكوسويه..

يوووووه..اقصد الاتحاديه....!!!!


وعشان نأمن موقفنا..ونضمن ان ماحدش منهم هيقرفنا..


بعتنا لهم شويه بلطجيه...

سامعاك بتقول فين..؟؟

هيكون فين يعنى..فى حرم الكُتاب الجامعيه...
!!!!

مش عشان يضربوهم..ولا يخوفوهم لا سمح الله...

لا..عشان يعلموهم اصول الحريه..

ونرسخ جواهم مفهوم الديمقراطيه...
!!!
وعشان نفهمهم..ان غابتهم هتفضل طول عمرها..

غابه أمنه..وان اللى هما ماشيين وراهم دول هما الخونه...
!!
ومافيش مانع اننا نصطاد كام عصفور كده.

.مش عشان نعذبهم ولا عشان نقصص ريشاتهم..

ابدا...

بس عشان نفهمهم مبادئ الحياه الكُتابيه...

فى تلك الغابه النظيفه الذكيه..!!!

وليصبح شعارهم...

"ماما قلتلو سيب القطه وخليها فى حالها؟...
ساب مدرسته ورما كرسته وراح جر شكلها...
راحت القطه مخربشه ايده لما مسك ديلها...
وادى جزاء اللى مايسمعش كلمه ماما تقولها....
..
.!!!


ومن هذا المنبر ..اوصيكم ونفسي..كل واحد يخلى باله
واوعى يهوب ناحيه ديل القطه
..!!!


Friday, October 26, 2007

بيع العِشره!!







احيانا يشعر الانسان بان هناك رابط معين يربطه باناس بعينهم..

قد يكون ..صداقه..حب ..

.الفه..موده..

او حتى مجرد ارتياح...

قد تختلف صوره هذا الرابط
.ولكن يظل شئ يجمع ويميز كل تلك الروابط..

انه العِشره....
بكسر العين...
قد تتوه كل هذه الروابط والعلاقات ..
او تقتلع من جذورها....


ومع ذلك كنت اعتقد ان الِعشره..

وان كانت هى الشئ الوحيد الباقى...كافيه بان تبقى على تلك العلاقات
..وتحميها...

ربما يتخيل اليعض ان العِشره تعنى قضاء وقت طويل مع اشخاص

يشاركونك الكثير من يومياتك الحياتيه..
تتخيل انك تعرف عنهم كل شئ..اخلاقهم..طباعهم..ميولهم... اسرارهم

كل شئ...

فهم "عِشره"

ولكنك بعد كل هذا تصطدم بهم..

وتجدهم فجأه اشخاص غرباء عنك...

كلماتهم..لمساتهم..حتى نبره صوتهم..

كأنك لم تكن تعرفهم من قبل..!!!!

تحاول ان تقنع نفسك بان كل هذا...مجرد هواجس وخيالات..وانك تعرفهم جيدا..
فهم"عِِشره"

الى ان يأتى يوم..تقف فيه امامهم ذاهلا..

تراهم يبيعون تلك العشره..وبمنتهى السهوله...

ولا يجدون طوال تلك السنين اى شئ يجعلهم يشترونك..

ويشترون عِشرتك ولو بالقليل...

تستمع الى كلماتهم الجافه..ومبررارتهم الواهيه..

تجد ذلك السؤال يلح فى ذهنك..ويستفزك..

"من انتم...؟؟؟؟؟

تنظر فى عيونهم ..تحاول ان تجد اجابه لهذا السؤال ..

ولكنك تجدها عيون غريبه..مجهوله الهويه..!!!

تدور دوامه الافكار ..كيف..كيف لم اكتشفت كل هذا الكم من العناد والخداع..؟؟

تمر امامك الذكريات...

اول الكلمات...

اعلى الضحكات...

اعذب المشاعر...

واصدق الدمعات...

ادق التفاصيل...

فهم "عِشره"...
!!!
تتلفت حولك..تجد كل شئ قد انتهى...

وتم بيع العِشره وبارخص الاثمان..


تجلس ساكنا..باحثا عن "استيكه"للذاكره...

كى تمحى هؤلاء الاشخاص وذكراهم من ذاكرتك...

وبالفعل..

تبدأ فى المسح...

ولكن بعد فتره تشعر بان ذاكرتك قاربهت ان تفرغ ..

فتقرر ان تبقى ولو شئ بسيط من ذكراهم...

تنظر الى الجزء المتبقى...

تجده ذكرى

"بيع العِشره"..
فتفضل ان تمسحها وتصبح ذاكرتك خاويه..

على ان يكون "بيعك"هو ذكراهم الوحيده...
!!!!

Saturday, October 20, 2007

بلا نييييييييله!!!







بحب اقرا الجرناان اوى يوم الجمعه...
ومن عادتى انى امسكه واقراه من الاخر للاول..

يعنى امسك اخر صفحه اقراها الاول..

الاقيلك الخبر ده..

تكريم نبيله عبيد فى لندن...

قلت وماااااااااااله مايجراش حاجه ...الست الحاجه بقلها زمان وزمان بتفن

..وبتدى ..وبتدى..

.حقها بقى تتكرم..

واهى برضه اهو اسمها اى حد بيتكرم من بلدنا دى..وخلاص

طب مين اللى مكرمها..؟؟؟
الاقيلكو اللى مكرمها
"الجمعيه المصريه الطبيه بالمملكه المتحده....

نننننننعم؟؟؟!!


ليه ان شاء الله!!!


عملت ايه الابله نبيله للطب؟؟؟

زاكرت وطفحت الغلب ست سنين؟؟..

اتبهدلت فى المواصلات عشان تروح الكليه تتبهدل هناك برضه ؟؟؟

اهلها دفعولها من لحمهم الحى فى الدروس عشان تبقى دكتورة بتفهم وعليها القيمه.؟؟؟؟

عمرها اتعرضت لضغط الامتحانات..اكتر من 115 امتحان من ساعه دخول الكليه..!؟؟؟

عمرها مسكت قلم وفضلت تكتب بيه طول الساعتين فى الامتحان؟؟؟

عمرها اتهزقت فى امتحان شفوى؟؟؟

عمر دكتور صمم انها فعلا "مابتفهمش..ورأيها ده مالوش قيمه ..رأيه هو وبس..؟؟

عمرها دخلت المشرحه بتجرى عشان تلاقى مكان يدوب..تقف فيه وتشوف كويس...؟؟؟


عمرها صحيت من صبحيه ربنا الساعه 7 الصبح عشان تلحق المحاضره

..وف الاخر الدكتور مايجيش..؟؟

عمر حد قالها ان مرتبها هيبقى يادوب 200 جنيه وكام جنيه كمان عليهم..؟؟


عمرها مسكت سماعه ولو بالمقلوب..ولو فى فيلم من افلامها..؟؟؟


ولا مؤاخده يعنى..عمر حد قالها يا دكتووورة؟؟؟؟


طبعا تلاقيهم بعتين لها التذاكر...
اكيد..والاستضافه فين..
فى فندق..ماعرفش ايه فى لندن...
اه طبعا....ماهووو
.,....

وفى وسط بقى التساؤلات الثوريه

ديه جت ماما بمنتهى الهدوء
يابنتى سيبى الجرنان وقومى زاكرى..الامتحان فاضل عليه شهر...

بصيتلها ..وفرغت كل شحنه الغضب فى كلمتى المأثورة

"يعنى هما اللى زاكروو عملو ايه.


.بلا نيله..
!!!!!

Sunday, October 14, 2007

اكرهه..واحبه..جدا جدا


اكره رائحه السمك جدااااااااا




اكره تنظيف السمك جداااااااااا





اكره قلى السمك جداااااااااااااااا






اكره الاطباق والمطبخ بعد السمك جداااااا



لكنى


اعشق طعم السمك جدااااااااا جداااااااااا


:)


وهكذا انا فى كل شئ......

......

:)

كل سنه واحنا بجد طيبيييين جدا جدا....


:)

Monday, October 8, 2007

للأسف..!!




اصبح العالم قريه صغيره...


كلٌ يعيشُ فيها..في عالمه

...
!!!!!

Monday, October 1, 2007

سبح اسم ربك الأعلى....3

السلام عليكم ورحمه الله
كيف الحال يا اهل المدونات الكرام..ايه اخبار الشهر الكريم معاكووو...
خلاص داخلين اهوو ع العشر الاواخر..ايام العتق الذهبيه..
اللهم اجعلنا جميعا من عتقاءك فى هذا الشهر الكريم..
احناا المره اللى فاتت كنا خدنا فكره كده مبسطه عن ازاى القلب بينبض..
المره دى هنتكلم اكتر عن ازاى القلب بيضخ الدم لكل اجزاء الجسم..
ده شكل القلب من بره..

زى ماقولنا المره اللى فاتت ان القلب ده عضو عضلى اجوف..

بيتكون من اتنيين اذين(ايمن وايسر)واتنين بطين (ايمن وايسر)برضه
يعنى اربع حجرات..

الاذينين هما المسئولين عن استقبال الدم من الجسم كله..
والبطينين هما المسؤلين عن ضخه للجسم كله تانى بس بعد مايكون بقى اتحمل بالاكسجين والغذا...
تلاقى بقى سبحان الله تكوين جدار الاذين العضلى مختلف عن تكوين البطين
تلاقى جدار الاذين رفيع وعضلاته رفيعه ..
عشان تكون عنده ليونه وقدره على استيعاب الدم اللى جايله من الجسم كله..
وتلاقى فى نفس الوقت جدار البطين سميك وعضلاته قويه جدا..
زى ماباين فى الرسم فوق..

كل ده عشان يقدر بقى يضخ الدم فى الشرايين الرئيسيه اللى تفضل تتفرع ..تتفرع ..تتفرع لشرايين اصغر فاصغر..فاصغر..
عشان توصل للخليه اللى انت مش شايفها اساسا فى صباع رجل حضرتك وحضرتى الصغير...
يالله..!!!!
!!
وبين كل اذين وبطين فى صمامات...الصمامات دى حكايه وايه من اعظم ايات الله فعلا...
الصمامات دى عامله كده شبه الباب المروحه
بمرور الدم فى اتجاه معين بس...يعنى من الاذين للبطين بس..لكن العكس لا...
يعنى تخلى طريق الدم
one way
طب ازاى يعنى ..هى بتفهم؟؟؟
اقولك اه سبحان الله..بتفتح وتقفل بفرق ضغط الدم..
اه لا احنا كده هنغوط...وهتسرحوو منى..


:D
ممكن لو بصيتو على الرسومات المبسطه دى وعلى الاسهم تقدروا تتخيلوا الدم بيلف ازاى فىالجسم عشان يوصل لكل خليه...

.يعنى من غير تفاصيل طبيه يمكن مش الكل يقدر يتخيلها..
الصمامات دى هى المحور الرئيسي لاتمام الدوره الدمويه على احسن حال..وبالكفاءه اللى هى عليها..
لو باظت بقى تسمع عن فلان عنده لغط ع القلب..
فلان عنده ارتجاع فى الصمام ا الميترالى..فلان عنده ضيق فى الصمام الاورطى..

ربنا يعافينا ويعافيكوو يعنى ...
عشان كده
Thanks to these valves..
:)
والحمد لله اللى ابدع خلق الصمامات دى اللى يعنى قطرهابيتقاس بالميللى ميترات...
سبحان الله فعلا..!!

المره الجايه بقى هنتكلم عن الرئيتين..
وازاى الانسان بياخد النفس من مناخيره..ويطلعه برضه من منخيره
:D
دمتم سالمين
ولاتنسونا من صالح الدعاء
N.B
مالهاش علاقه بالبوست
وانا بعمل
search
عشان الاقى الصور اللى بالعربى دى..
فكتبتت الدوره الدمويه
فطلعتلى صور منها الصور دى
واذ فجأه ابص..الاقى وش واحد رافع ايده كده..
تؤ..الوش ده مش غريب علياا
شفت فين الوش ده قبل كده...
طلع فى الاخر الاخ الهمام ..
زينه شباب مصر..
رافع راسنا وشايل فاسنا..
الاخ محمد عطيه ..اول من فاز بلقب سوبر ستار فى ستار اكادمى..
طب وده ماله وما ل الدورة الدمويه...
طلع الاخ بيغنيلها ..
!!!!
وانا اللى ثقفتى الفنيه محدوده..


شفتوا الدوره الدمويه مهمه ازاى..
خلت محمد عطيه يغنيلها..!!!

يااااااارب ياااهااااااااادى...
:)