Friday, April 27, 2007

نظريه الكعب

السلام عليكم ورحمه الله يا اهل المدونا ت الكرام..

كيف
الحال؟؟؟
يارب تكونوا بالف خير..
ان شاء الله
ال
يكم الان
نظريه المكعب...

احم .........

النظريه دى مجهود حوالى 3 سنين
تفكير
وتعمق
وجهد
..وعرق..
وكل حاجه
نفسكوا فيها...
:)

لا بجد..


كله يفتح فخوا معايا كده..
وتعالوا نراجع بس شويه حاجات كنا بناخدها فى الهندس
زماااااااااان فى اعدادى..
from the land beyond
..beyond..

:)
المكعب...
هو شكل هندسي منتظم..له سته اوجه..
كل وجه عباره عن مربع...
مساحه المكعب
=
طول الضلع تربييييع
اس اتنين يعنى..

حجم المكعب
=
طول الضلع تكعيب
اس تلاته يعنى

لذيذ اوى المكعب ده..
كنت بحبه اوى زمان فى المسائل
لان حسابته وقوانينه كانت سهله
:D
يااالا خلينا فى موضوعنا...

كله يتخيل كده انه واقف قدام
مكعب كبيييير

هاااااا

هتشوف كام وجه للمكعب ده وانت واقف كده ؟؟؟

واحد صح...

طب ماشي...
روح لف كده واقف عند الزاويه...
.هااااااا
شايف كام وجه؟؟؟
اتنين ..
مممممم

صح..
طب...
تقدر تشوف كل اوجه المكعب فى نفس ذات الوقت؟؟؟

حلوة فى نفس ذات الوقت دى
:)

امممممممم
لا طبعا...

الا فى حاله واحده بس؟...

ان يبقى المكعب ده متفرغ..
من جوا ومسموح لك تدخل جواه...

زى البتاعات اللى داخله فى المكعب اللى فى الصورة دى..
ساعتها هتشوف كل الاوجه السته...
مممممممممم

هكذا هو الانسان....
ماهو الا مكعب متحرك...
...
ركزوا معايا كده..
لما تيجى تقرب من اى اانسان..
مش هتقدر فى الاول..
تشوف منه غير وش واحد بس ..
اللى هو عايز يوريهولك

صح

بس بعدين لما تبتدى بقى انت تلف حواليه..
او بالاصح الدنيا هى اللى تخليك تلف حواليه
وتشوفه فى كذا موقف

ساعتها هتشوف وشوش كتير

ماكنتش شايفها فى الاول..

بالظبط زى المكعب..

بس للاسف

فى فرق واحد بس..

ان المكعب معروف..ان له ست اوجه بس..

وسبحان الله كل واحد زى التانى...

راح ولا جه..
مكعب
:)

لكن الانسان له عدد لا نهائى من الوشوش..

مجهوله المصدر

وغير معلومه المقاييس

فمثلا تلاقى

الوش المبتسم..

والوش المكتئب

والوش الحزين

والوش العكر

والوش الجبس..

وده مخصوص للمواصلات
:D
وغيرها من الوشوش...

ياترى تعرف انت ليك كام وش؟؟؟

معلش فضفضه المره دى ملهاش علاقه بالبوست اوى..

بس سبحان الله هى جت كده..
اتنين بحبهم وربنا يعلم..
:)

بعتولى رسالتين على موقع مجهول

كده كان بقالى خمستلاف سنه مادخلتش عليه..

:)
وسبحان الله ..

كنت محتاجه رسالتهم دى اوى..

ناس كتير ملهاش لازمه
وناس وجودها فى حياتك يعمل ازمه
ناس تقرب منها تحس ان ليها كاريزما
وناس كده.. تحاول تلقطها فى وسط الزحمه
:)

ربنا يعنا كلنا على انفسنا
معلش
طولت عليكم
بس انتو اخواتى..فاستحملونى..
دمتم سالمين يارب..
:)

Thursday, April 26, 2007

اعجاز نخل خاااااااااااااااااااويه..



Let it rain..to wash me clean..




.......................................

ياريت
.....
فجأه حسيت انى بقيت سودا اوى من جوايا..
حاجات كتير انطفت من جوايا...
حاجات اتمسحت...

اتغيرت...
اتغيرت كتييييييييييير

...

:(

كنت زمان بقول
ياااااااه..لو الواحد يعيش فى عالم مثالى..
والناس كلها مثاليه وماشيه ع الخط مظبوط...

ده كانت الدنيا تبقى تمام...

طب بقى..
انا بقى..
انفع اصلا اعيش فى العالم المثالى ده..
...؟؟؟

كانت الاجابه مش واضحه اوى قدامى..

دلوقت


للاسف....


:(
:(

ادعولى بجد..انى اقدر
ارجع تانى..
راضيه عن نفسي..





Monday, April 23, 2007

بنحكى...





بقالى كام يوم معكوكه فى الدروس والكليه ..وبقضي وقت طويل مع اصحابى..
كنت كاتبه البتاعه دى من زمان ..
وانا فى طريقى الى امتحان ماده من اغبى ما يمكن الا وهى ا
community
وانا فى سنه رابعه..
كتبتها وانا فى الطريق ساعتها..
ورحت ظبط الامتحان
:)

بس افتكرتها جدا النهارده..وقعدت اقولها فى سرى طول اليووووم

حتى فى المينى باص وانا مروحه..
:)
بحبها اوى..بحس ان كل سطر فيها بيحكى عن موقف فعلا انا مريت بيه فى يوم من الايام..

اسيبكو معاها بقى...
:)

بنحكى وتكتر الحكايات..
ونضحك وتجلجل الضحكات..
ونبكى وتطلع الاهااااات

وكل ده والدنيا ماشيه بين خد وهات..
بين اه..ولا..وساعات..
بين كلمه ..ونظرة..وحركات..
بين اقنعه.... وزيافات..
بين لحظه حلوة عدت فى انبساط...
ودمعه الم نزلت من سكات...
..بين حب حقيقي
هو احلى الذكريات.
.
وشعور مزيف كنت فاكرة انه خالد
فجأه لقيته مات...
مين هيقدر يرجعه تانى للحياة ؟
.............

:)

بس كده..
:)
انتظروانظريه المكعب قريبا..ان شاء الله
بس اترحم بس شويه من الهم ده...

اسألككم الدعاء...
ربنا يكرمكم كلللللللللكم..
ياااااااارب
ويكرمكنى معاكم..
دمتم سالمين..
:)

Thursday, April 19, 2007

لكم احبك..


لكم احبك...فقربك من عينى يجعلنى دائما اشعر بالاطمئنان...
فأنت جزء منى..من كيانى..من شخصيتى..

فمن خلالك ارى لهذا الكون روح وطعم...

عندما تغيبين عنى اشعر بان هناك شئ ينقصنى..
ومهما حاولت ان اصف شعورى عندما اتحسس ملامحك
....رقتك...ِشفافيتك...
فلن اوفيك حقك...

احيانا ازعم اننى قادرة ان استغنى عنك..
وان استبدلك ..بمن هى افضل منك......
ولكن ماهى الا لحظات ...ويعاودنى الحنين...
لاعود اليك وك
لى لهفه...

اتذكرين اول لقاء بيننا...

عندما وقعت عينى عليك ...بهرنى جمالك الهادئ..
وتولد ذلك الحبى الابدى فى قلبى..
واخذت اردد..انها هى..هى التى ابحث عنها...


مرت الان سنتان منذ ذلك اللقاء...
وحبك فى قلبى
يزداد يوما بعد يوم..
لذاااااااااااااااااا
دعينى الان اقولها عالياااااا
لكم احبك يا نظارتى الحبيبه...
..

Monday, April 16, 2007

حدث..ويحدث كل يوم...


الو...ازيك عامل ايه؟؟؟
ايوة...الحمد لله انا كويس...انت عامله ايه؟؟؟
الحمد لله
كده طول المده اللى فاتت دى ماتتصليش بيا ولا تحاولى تكلمينى؟؟؟
يعنى انت اللى حاولت ...!!!انت اللى زعلتنى اخر مره...
برضه ....مهما تكونى زعلانه ...
تفضلى طول المده دى ماتتكلميش...
طب معلش حقك عليا..مانا كمان كنت زعلانه..
انت عارفه انا كل ما التليفون كان يرن اقول ...هى ..بس للاسف يطلع مش انت....
انت مش متخيله انت وحشانى قد ايه
وانت كمان واحشنى جدا..طول الفترة اللى فاتت وانا حاسه ان فى حاجه نقصانى...
انا فعلا ما قدرش اعيش من غيرك...
ولا انا يا حبيبتى

لحــــــــــــــــــظه صمــــــــــــــــــــــــــــــــت
........
......
الوووووو ...روحتى فين؟؟؟
انا هناااا
طب اتكلمى طيب...انت وحشانى عايز اسمع صوتك......
مهما قلتلك...مش هقدر اوصف اللى جوايا
وانا كمان والله..اللى جوايا ناحيتك اكبر بكتير وانت عارف اكيد...
عارفه انا طول الفتره اللى فاتت مش عارف اركز فى شغلى ..من ساعه اخر مره اتقابلنا واتخانقنا فيها
وحاولت اكلمك لقيت موبيل على طول غير متاح...
معلش......
بص يا احمد انا مش عايزاك تزعل منى تانى..ولا انا ازعل منك تانى..انا ماليش غيرك بجد...
واللى بينا اكبر من كده بكتير
احمد.....احمد مين؟؟
ايه احمد مين...أحمد انت...
انا مش احمد
!!!!
امال انت مين
؟؟؟؟
انا كريم...انت مش عارفانى يا دينا؟؟؟؟
ايه ده ..أنا مش دينا...انا ريهام....انت طالب نمرة كام؟؟؟
انا طالب نمرة
.......
لا النمرة غلط......
غلط ............ازاى؟؟؟
لحظــــــــــــــــــــــــــــــه صمت



طب معلش انا متأسف
لا ولا يهمك....

واغلق كل من كريم وريهام التليفون ..






بعد حوالى عشر دقائق

الو...ايوة يا انسه ريهام...انا كريم اللى اتصلت من شويه...
ممكن نتعرف..انا حاسس انى محتاج اتكلم معاك...
وانا كمان يا كريم..حاسه انى اعرفك من زمان..وبجد حاسه انى عايزة افضفض معاك.......
وهنا دقت الساعه الثانيه بعد منتصف الليل
............................................................................
هكذا هو الحب فى عيون كثير من الناس..
مجرد كلام فى تليفون..
واثاره مشاعر ..
وتلويث لمعنى الحب الحقيقى.....


هناك الاف من "كريم وريهام"

شغلهم الشاغل فى الحياه هو كلام الحب..
او كما اسميه انا
-الحب بالكلام-

جميعهم يرون الحب مجرد كلمه..او لمسه...
خروجه حلوة مع بنت جامده..وطبعا كلكم عارفين المصطلح اللى اقصده
او قاعده حلوة مع شاب روش...
للاسف
تجدهم
يتهافتون ..للوصول لذلك الزيف..
او مايطلقون عليه هم
الحب...
وان لم يحققوا كفايتهم من تجربه واحده...
يسارعون لتلك التجربه الثانيه..
بالطبع...
فالطريق ممهد..
وان لم تفلح الثانيه سيجد الثالثه..والرابعه...

ااااااااااااااااااااااااااااه
لو كان الحب شخصااااااا

لطردهم جميعا من مملكته...

فضفضه اليوووووووم
:)

ناس فى الحب تتكلم ..
وناس من الحلم تتألم...
ناس تقابلك بالاحضان ..
وناس تدور وشها ولا تسلم..
ناس تشوفها تحبها..
وناس من غير ماتشوفها تعلم
معلش اصلى مفروسه شويه..
:)
من كريم وريهام دول...
وماحدش يقولى هما معقول ماعرفوش من الصوت ان النمرة مش مظبوطه
لان الرد مشكوك فيه...
ممكن يكونوا عارفين بس بيستعبطوا..

بس خلاص

Friday, April 13, 2007

انا خنيقه؟؟!!!؟

انت حاجز فين يا بنى؟؟
-هناك ورا البنت الخنيقه اللى هناك؟؟؟
كنت مشغوله فى وضع كتبى و_تظبيط القاعده:)_قبل ان يبدأ الدرس...
حينها اخترقت تلك الكلمات اذنى ..حاولت ان استوعب..
تلفت حولى..فلم يكن فى تلك البقعه البعيده من قاعه الدرس..
احد غيرى
ّّّ!!!
اذن
.....
فانااااااا تلك الخنيقه
!!!!!!
...........
نظرت نظرة بلهاء لذلك "الزمبل"فى محاوله منى ان اكذب اذنى واقنع نفسي بان ما سمعت ممجرد هلاوس عاديه
ولكن الموقف كان بالفعل..
حقيقه...
ظللت انظر لصاحب تلك الكلمه..وهو ماض فى طريقه لباب المركز ليمارس هوايته مع بقيه اصدقائه فى توصيف الناس ...

اممممممممم
لم استطع ان احدد مشاعرى فى تلك اللحظه..فكانت الصدمه اكبر من اى شئ.
...
انا ....خنيقه.........
شكرا

........
:D
,,,,وسرعان ما تصدرت ال88-بس بالعربى-سرعان ماتصدرت ملامحى..
واعتلى الغضب وجههى
وكدت انفجر غيظا وانا اردد
اهو انت اللى خنيق وستين خنيق....هه...بس
:(
وحاولت ان ابعد تفكير ولو للحظات عن هذا الموقف الخنيق..
ولكن

هيهاااااااااااااااااااااات
ظل ذلك الهاجس
ثوانى كده هو انا بجد خنيقه؟؟؟
طب هو يعنى ايه خنيقه اصلا؟؟؟
يمكن قاصده عشان بقعد لوحدى فى معظم الاحيان لما بيكون اصحابى مش موجودين؟؟؟
يمكن
ولا عشان مابكلمش ولاد كتير ..
؟؟
جايز..
ولا انا اساسا شكلى يوحى بكده؟؟؟يعنى البوز التمام ..والتكشيره المعتبره؟؟؟
اكييييييد
وحاولت ان استجمع كل حواسي فى ذلك الوقت
كى اتخيل نفسي وانا جالسه...وان ارى نفسي فى مرأتى الذاتيه؟؟؟
استغفر الله العظيم...خنيقه خنيقه يعنى...الواد فعلا ماجبش حاجه من عنده
:D
وفجأه هدأت اساريرى-زى ما بيقولوا-وابتسمت...
وقفز فى ذهنى ذلك المقال لعبد الوهاب مطاوع-رحمه الله- بعنوان
ارجوك حاول ان تفهم
يحكى فيه قصه رجل هائم فى الشارع يصطدم بالماره
حتى كاد احدهم ان يمسكه ويتشاجر معه
فما كان من الرجل الهائم الا ان قال له""
اعذرنى فانا لم اشعر اننى اصطدمت بك..
فولدى قد مات منذ ايام..ولا اعرف ماذا سافعل بدونه فى الحياه"

وهنا تبدلت مشاعر الرجل- المخبوط- فبعد ان كاد ان يقتله..
ربت على كتفيه ودعى له بان يشرح الله صدره..
ومضى وهو مشفق عليه
وفى هذا المقال حاول الكاتب ان يوضح كبيف تباينت مشاعر الرجل فى لحظه..
بمجرد ان فهم ..
وان على الناس الا يحكم احدهم على الاخر
بتلك المواقف الظاهريه
دون معرفه خلفيتها ودوافعها...

لحظه صمت اخرى...

وتذكرت ايضا تلك الكلما ت الرنانه ل-تامر حسنى-حفظه الله
:D
فى اغنيه برنامج دعوه للتعايش
وهو يقول
اعرفنى قبل ماتكره

الان عرفت معنى هذه الكلمه

اعرفنى قبل ماتكره

وماهى الا لحظات حتى جاء "الزميل:المخنوق منى مش عارفه ليه
...هو وصديقه وجلسا خلفى...

وودت وقتها ان التفت اليه واقول له

"على فكرة بقى ..........
انا مش خنيقه..ها
........

ومضت الحصه بسلااااااااام دون اى خسائر فى الارواح
:)
وخرجت منها بدرس لن انساه

انه ليس الخنيق من جلس وحده بعيدا عن الاخرين
لكن الخنيق من اتهم الاخرين بالخنقه دون دليل
:)

Wednesday, April 11, 2007

يا ما الهدوم بتدارى

يا ما لهدوم بتادرى
وانت ولا دارى...
....
ياما فى قلوب تعبانه
وانت ولا دارى...

ياما فى عيون حيرانه
وانت ولا دارى
.......
يا ما فى عقول مرضانه
وانت ولا دارى
.............
يا ما فى نفوس مخنوقه..مداسه مكبوته
وانت ولا دارى
...............
ياما فى ضحكه مكتومه ...ع الوش مرسومه
وانت ولا دارى
.............
يا ما فى صرخه الم فى الفضا... بتسممع
وانت ولا دارى
..........
يا ما فى ايدين بتترعش ..وعيون بتدمع
وانت ولا دارى
................
يا ما فى جروح مقفوله..وف نفس الوقت ....محسوسه
وانت ولا دارى
................
يا مافى ناس بتغيب ع العين
لكن م القلب هتروح فين؟؟
وانت ولادارى
............
ياما فى عربيه متانتكه معديه..
وانت ولا دارى
.............
يا ما فى حمار..جارر جرار!!..
وانت ولا دارى
...............
يا ما فى دوا موصوف م الهوا
وانت ولا دارى
..................
ياما فى مرض ..ووصفه القدر..
وانت ولا دارى
..................
ياما فى رجاله لابسه ومستأسده
وعيونها متلفته
وانت ولا دارى
................
ويا ما فى رجاله... ساكته .. بس سكوتها قوة
وانت ولا دارى
..............
ياما فى ناس بتجرى.ورا القرش
وانت ولا دارى
........
يما ناس عماها الكرش
وانت ولا دارى
..............
ياما عقول بتفكر..
وياما قلوب تتعصُر
وانت ولا دارى
وياااما ..ويامااااااااااا.............
شفت كل ده بيحصل وانت ولا دارى
ده صحيح..يا ما الهدوم بتدارى..
............................................
ماتتغرش باللى عينيك بتشوفه...
ده يااما الهدوم بتداارى
:(
:(
:(

النهارده فى الدرس بالليل حصلت حاجه غريبه جدا..ومؤلمه فعلا وبينت حاجات كتير
ادعو يا جماعه كتير....
ادعو لكل مهموم وقلقان...
ادعو لكل مريض..وتعبان
ادعو لكل الى حاسس انه مخنوق
ان ربنا يشرح صدره وييسر امره

ادعو بجد
ادعوبظهر الغيب
ادعو...
:(

Monday, April 9, 2007

يوم اخر عادى جدا...


كان يا مكان يا سعد يا اكرام مايحلى الكلام االا بذكر النبى عليه الصلاه والسلام...
:)
كان فى بنت عاديه جدا...
قابلت صاحبتها العاديه جدا برضه...
قرروا فجاه انهم يقضوا اسبوع مع بعض...
لانهم واحشين بعض جدااا بطريقه مش عاديه جداااااا
اول يوم قاموا الصبح فطروا فطااار عادى جدا...
وقاعدوا يذاكروا شويه لحد ميعاد الغدا........
قاموا حضروا الغدا
واتغدوا غداااا عادى جدااااااااااااااااا
بعدها اتفرجوا على فيلم عادى جداااااااااااا
لحد ميعاد النوم .......
ناموا على سرير عادى جدااااااااااا..
....
وحلموا حلم عاااااااادى جدااااااااااا
وضرب المنبه الصبح الساعه 8 عادى جداااااا.....
ومروا الست ايااااااااااااام بالمنظر ده...........
عادى جداااااااااااااااا
لحد ما صحيوا فجأه اليوم السابع......
حسوااا احساس مش عااادى جدااااااااااا
حاسوا انهم عايزين يغيروااااااااا
وانهم زهقوا من يومهم العادى جداااااااااا
قرروا انهم يفطروا فطاااااااار مش عادى جداااااااا
طب نفطر ايه؟؟؟؟
فضلوا يفكروا تفكير مش عادى جدا...لحد ما ميعاد الغدا جه........
قالوا خلاص مش مهم
نتغدى غدا مش عادى جدااااااااااااااا
طب ايه نعمل ايه ع الغدا؟؟؟
فضلوا يفكروا برضه تفكير مش عادى جدااااااااااا
لحد ما ميعاد النوم جه........
قالوا خلاص مش مهم ننام.......
نفضل قاعدين نعمل حاجه مش عاديه جداااااااا
طب نعمل ايه..مش عادى جداا.........؟؟
نعمل ايه مش عادى جداا.....؟؟؟؟
فضلوا يفكروا تفكير مش عادى جدا......
لحد ما جه صبح اليوم التامن......
ولقوا ان فرصتهم فى عمل شئ مش عادى جدااااااا
خلصت.......
فبصوا لبعض......
وقرروا انهم يحاولوا يخلوا عمرهم اللى جاى مش عادددددى جداااااااا......
ازاى؟؟؟؟؟؟؟؟؟؟
ربنا يستر بقى؟؟؟
وما يقضوش بقيت عمرهم يفكروا برضه تفكيرهم اللى مش عادى جداااا
......ادعولهم بقى انهم يقضوا ...ولو يوم..واحد..
مش عااادى جدااا.

:D

................
البوست ده كتبته لما واحده صاحبتى قابلتها اون لين..
فبسألها ايه الاخبار؟؟
فقالتلى يوم اخر عادى جدا...
:)


لو حد فهم مغزى ا لبوست ده يقول؟؟؟

واديله ربع جنيه
:)

Saturday, April 7, 2007

ويبقى التاج على رؤوس المدونين...

السلام عليكم ورحمه الله..

بما ان د .ارتعاشات ربنا يعزه بعتلى تاج...
....
اول تاج فى حياه هذه المدونه...
فانا هرد عليه...سريعا...
:)

وربنا يسهل...
اول تاج.....
احم
تكلم عن هوايه لما بتمارسها بتستغرق فيها تماماوتنفصل عن عالم الواقع لفترة من الوقت اثناء ممارستها؟؟؟

ممممممم
هو ممكن اقول الكتابه..وان كنت انا مش بعتبرها هوايه..بعتبرها علاج نفسي المفروض كل واحد يعمله مع نفسه..
بس هى دى فعلا الحاجه الوحيده اللى بنفصل فيها عن الواقع تماما..
:)

التاج االثانى...
هل مقدار سعادتك او شعورك_ايا كان عند تمرير التاج لك يختلف حسب المدون الذى يمرر لك التاج؟؟
ممممم
بصراحه انا ماقدرش ارد على السؤال ده لان مافيش غير ارتعاشات هو اللى مررلى تاج
بس عامه اكيد هفرح بالكل..
:)

السؤال الثالث

هل ترى للتاج اهميه حقيقيه؟؟

هو اكيد له اهميه...يعنى اللى ممره ده بيبقى عايز يعرف رد على اسئله التاج..عشان تكتمل صورة معينه فى دماغه عن اللى هو باعتله التاج..

السؤال الرابع
هل فكرت فى عمل تاج خاص بك؟؟
االرد اخر الجلسه....
:)
قصدى اخر البوست...
السؤال الخامس
هل تفضل قراءه اجوبه التاج عند المدونين الاخرين؟؟ام لا تهتم سوى بالتدوينات االاخرى؟؟
هو انا فهمت الشق الاول من السؤال...
اه بحب اقرى اجوبتهم....بس هما بس يجاوبوا بصراحه
:)
عندما ترد على التاج مالذى تراعيه اكثر؟؟؟
اكتر حاجه انا فعلا حاولت اراعيها هنااا.
هى الصراحه....
:)
هل تحرص على قراءه اجابات من تمرر لهم التاج؟؟وهل تغير اجابتهم للتاج شئ فى ادراكك؟؟

كلاكيت تانى مره..دى اول مره يتبعتلى فيها تاج...
بس اكيد هحرص على قرايه اجوبتهم..امال انا هبعته ليه؟؟؟
ومش عارفه اذا كانت هتغير حاجه ولااااااا....
.......
هل تلتزم حرفيا باسئله التاج؟؟؟
اينعم
ماهى نوعيه التاجات التى تفضلها؟؟؟
كلاكيت تالت مره...دى اول مرة يتبعت لى فيها تاج...بس اكيد بحب التاجات اللى دمها خفيف...

هل كنت طالبه شاطره ف المدرسه؟؟؟
جداااااااااا ...للاسف
ايه اكتر ماده حبيتيها فى المدرسه والكليه؟؟
فى المدرسه كنت بحب الرياضه جدااا..والفيزياء..
وفى الكليه..
الحاجه الوحيده اللى حبيتها هى الباطنه..وخصوصا القلب

و الانف والاذن
غير كده ...ماقلوكوش...
:(
ايه اكتر ماده كرهتها فى المدرسه والكليه؟؟
فى المدرسه..كان ممكن ابلع الجغرفيا والتاريخ...بس اللى فعلا كنت كرهاه كرهاه ..هو الاقتصاد...كنا بناخده فى تالته ثانوى وكان قرفنى فى عيشتى..
فى الكليه...وبما ان الارف كتير...
لكن اكتر حاجه قرفتنى برضه هو طب المجتمع...
!!!!!!!!!
كنت عايز تطلع ايه وانت صغنن؟؟؟
زمان وانا صغيره..ماكنش نفسي اطلع حاجه..كان نفسي ابقى كبيرة وشاطرة ومتفوقه وبس...
لا فكرت ف يوم ادخل طب ولا الكلام ده.؟..يمكن فى ثانويه عامه..ابتديت اقول ادخل صيدله..بس ماكنتش بميل للكيمياء اوى..
فتراجعت...
بس اهو الحمد لله...الوااحد برضه يرضى بنصيبه...


:)


كده التاج تقريبا خلص يا ارتعاشات...
انا بقى عايزة امرر تاج..غير اللى فوق....
هو عباره عن سؤالين..

1-ازاى عرفت عنوان مدونتى؟؟؟
2-ازاى اثرت مدونتك فى شخصيتك؟؟؟
يمرر هذا التاااااااااج...ل
ارتعاشات طبعا_ماهو كما تدين تدان...
shower mirror
the groom
Noony
esmeralda


,كفايه كده...
والسلام ختاااااام...

Friday, April 6, 2007

انا والنسااااااا 4..اخر واحد الحمد لله

السلام عليكم ورحمه الله..
اخر حلقه من
"انا والنسااااااااااا"
الحمد لله عشان انا اصلا اتخنقت..
:)

يالااااااا نخش ف الموضوع على طول...
حاله3
هذه الحاله لم اشاهدها بعينى صراحه..ولكن روى لنا زميل عزيز..عن تلك الحاله..التى اراها انا فى نظرى..
"حاله مخجله"

سيده لا اتذكر عمرها..
حامل...

انجبت من قبل ثلاث اطفال..
وفى كل مرة يولد الطفل قبل موعده ..فيحتاج ان يوضع فى "حضانه

لكن وبكل اسف يكون الرد فى كل مرة..
- الحضانات هنا كلها مشغوله مافيش حضانه فاضيه..
فتذهب الام فى محاوله ان تبحث عن حضانه اخرى فى مكان اخر..باجر معقول....
ولكن فى كل مرة..تنتهى تلك المحاولات بالفشل..وتعود الى بيتها متشحه بالسواد
وهى ترثى اطفالها فى كل مرة..بهذا المثل الرهييب
- العين بصيره والايد قصيره
الى هنا..والمسأله ليست مخجله بالدرجه...
يروى لنا زميلنا عن الدكتور الذى كان يلقى الدرس عليهم فى ذلك اليوم..
فما ان سمع الدكتور قصه هذه السيده..الاوقد صاح فى وجهها وطردها من حجرة الدرس
!!!!!!!!!!
-واكيد طبعا الموضوع لم يخالو من شتيمه ع الماشي...
واخذ الطلاب يضحكون على هذا الموقف ..
والدكتور طبعا..يقف كالغضنفر ليكمل الدرس
ولاااااااااا عزااااااااء للضمير.,..
:(
"اول مرة احط السمايلى ده هنا..بس بجد فعلا اتألمت جدا لست دى"

حاله 4
هذه الحاله لم اراها فى المستشفى ولكن شاهدتها فى التليفزون...
شاءت الاقدار..بعد ان لعب الشيطان اللعين برأسي وخيل لى ان هناك فقناه تدعى
MBC1
تعرض برنامج اسمه
"كلام نواعم

وانه بالطبع برنامج جميل
باين يعنى من الاسم..يمكن يأاثر فى الواحد
:)

مااااعلينا
المهم
كان االبرنامج يستعرض..حالات الامهات المثاليات..
والاتى كافحن من اجل اولادهن...

والست دى امى..والقصص دى يعنى...
:)
فكان هناك ثلاث مذيعات _منهم واحده مصريه_وكانت ضيفه البرنامج سيده عندها 4 اولاد..جميعهم يعانون من مشاكل فى السمع وابنها الاول يعانى ايضا من تاخر عقلى بالاضافه الى مشاكل الصمم..
اما ابنها الاخير فهو معافى والحمد لله
وظلت تحكى كيف انها تحملت..وضحت وسهرت الليالى....و....و...و
....
وكيف ان المجتمع يبخس بحقهم فى الحياه..ولا يقدم لهم خدمات..ولا ينصفهم..و\...و....و
........
ظلت تحكى طويلا-لحد مازهقتنى الصراحه- وما استنتجته من كلامها انها هى
ايضا تعانى من مشاكل فى السمع وبعض العيوب الخلقيه
وانها بعد ولاده ابنها الاول وظهور اعراض التأخر العقلى
..وبعد مراجعه الطبيب الذى اوضح لها حاله ابنها
وان اولادها القادمين معرضون بنسبه عاليه
ايضا لتلك المشاكل..والعيوب الخلقيه..

ولانها طبعا ليست سيده عاديه ...بل هى السيده الفولاذيه
"وش مخنوق"
ضربت طبعا بكلام الدكتور اجدعها حائط..
وساااارت على دربها غير مكترثه...
وكانت النتيجه ابن ثانى
وثالث
يعانيان من الصمم والبكم طبعا ..

وابن اخير معافى
بالاضافه الى ابنها الاول المتأخر عقليا..
واخذت طبعا مذيعات البرنامج يمدحونها
وكيف انها بحق ام مثاليه..و...و..و

........
نظرت الى الريموت باحثه عن زرار الغلق..
ومضيت الى حالى وانا _؛مفقوعه_منها ومن البرنامج
..ومن نفسي اولا لانى روحت اتفرجت عليه

وظللت اكرر ها
"الجهل..الجهل..الجهل.."

ولكن فى النهايه تدارك شيئا هاما...
وهو انى خارج اطار المشكله تماما..
فبالتالى ليس لى الحق فى اى حكم
:)
!!!!!!!!!!!!!

وكفايه عليكو كده بقى عشان انا اتخنقت وانتو اكيد اتخنقتوا............
الحمد لله شهرين النسا عدوا على خير وكان ختامها مسك ف ى الامتحان الحمد لله
:)
وربنا يسهل بقى فى الجراحه.........

وبس...
هرد على التاج بكرة بقى يا ارتعاشات..
:)
وشكرا لحسن قرأتكم..
دمتم سالميييييين
:)

Wednesday, April 4, 2007

انا والنسا 3

السلام عليكم ورحمه الله.
كيف الحال..
يلااااا نكمل ذكرياتى مع النسا..
يارب ماتكونوا اتخنقتوا..
:)
يلااااااا
حالات...حالات

حد ينزل بالتيترات برضه...

مرت ايام وايام...وفى كل يوم يزداد لدى شعور داخلى..بان"احنا والله يا ستات غلابه..واللى يقول غير كده يبقى هو المفترى..
...
:)
ساحكى لكم بعض الصور النسائيه الانسانيه..التى تعتبر نقطه فى بحر مما نراه كل يوم..
دعونا نبدأ بهذه الحاله
حاله 1
سيده عمرها 22 عام فقط_يعنى قدنا_ماعلينا
:D
حامل فى ثلاث توائم ..وعمر الحمل32 اسبوع ..اجهضت من قبل خمس مرات..
!!!
نظرت اليها فوجدتها مستكينه..ملامحها مصريه اصيله..بجد والله..واضعه يدها على بطنها البارزه..كأنها تحاول ان تطمئن هذا الثلاثى..وتطمئن نفسها من قبلهم..بان كل شئ سيكون على مايرام..وانهم لن يلقوا نفس مصير اخواتهم السابقين..
!!
-انت متجوزة من امتى؟؟؟
-ماحدش يقول ان السؤال ده حقودى..
:)
السؤال ده طبيعى جدا فىحالات النساااا
:)
-من اربع سنين!!!
نظرت اليها وقد ازدادت شفقتى عليها..وتذكرت ذلك المسلسل الكئيب لفردوس عبد الحميد_مش فاكرة اسمه_وودت ان اتقمص شخصيتها ولوللحظه..واخذ تلك الفتاه..او السيده..واضمها الى صدرى واطمئنها..ولكن حال المكان والزمان دون ذلك...
واخذت تقص علينا تاريخها المؤسف وكيف فقدت هؤلاء الخمسه اثناء الحمل..
-وهما مستنين اسبوعين كده ولا حاجه ..عشان يولدونى فتح بطن
!!!!
-نعم!!!فتح بطن كمان....
يالهوى يعنى بعد ماتعبتى المرات اللى فاتت دى..كمان هتولدى فتح بطن..
واخذ نفس السؤا ل يدور فى ذهنى مرة اخرى..
طب هى يعنى ماكنتش خايفه على نفسها طول المرات اللى فاتت؟؟طب والمرة دى..مش خايفه..مستعده يعنى انها تتضحى بنفسها عشان تخلف..؟؟؟
وهنا دارت تلك الفكرة الخبيثه فى ذهنى...
طب هما لو قالوا للرجاله بصوا..احنا هنيجى كده ونفتح لكم بطنكم ونطلع منها عيل..
حتى من غير حمل ولا حاجه عشان نخفف المهمه..
:D
والعيل ده هيبقى ابنكم..
ياترى هيكون رد هم ايه؟؟؟؟
:)

حاله 2
اما هذه السيده فهى فى ال32 من عمرها ..حامل فى 30 اسبوع..ولديها بنتان..وجاءت الى المستشفى بعد تدهور حاله القلب نتيجه مضاعافات من حمى روماتزميه على القلب اصابتها منذ ان كانت ف العاشره من عمرها...
كان وجهها ..جميل هادئ الملامح..ولكنه باهت...

- طب انتى خدتى وسائل منع حمل؟؟
-اه وشلتها قبل الحمل ده
-ليه؟؟
- عشان اجيب الولد..
الاجابه ثلاث كلمات ولكنها تكشف عن معان كثيرة..سهل فهمها من نبره صوتها ..ونظرة عينيها الذابلتين..
-طب انت مش عارفه انك ممكن تتعرضى لمخاطر ف الحمل..تدهور حالتك وانت اساسا عندك القلب؟؟
-معلش بقى..ربنا يسترها..
وظللت طوال الدرس افكر فى حال هذه السيده..لو انه-لا قدر الله-اصابها شئ اثناء الحمل..ماذا سيكون مصير بناتها..
وما ذا لو اتت بذلك الولد المرجو..ورحلت ..
همت ان تمضى الى العنبر..
-خلى بالك من نفسك..وماتحمليش تانى مهما حصل..
لم استطع ان امنع نفسي من انا اوجهه اليها تلك الكلمات..
واكتفت هى بالرد..
-ربنا يسترها...

ولنا بقيه..
الجزء الاخير..
فى البوست القادم باذن الله
دمتم سالمين
:)


Monday, April 2, 2007

اخرج ..واقفل الباب وراك..



التاريخ 31 مارس 2005
انا فاكرة كويس السنه اللى فاتت ف نفس اليوم ده..كنت متأثره ومضايقه..
بس السنه دى..
خلااااااااااااااااااااااااااااااص





بححححححححححححححححححححححححححححححححححححح

فضفضه..
-خلاص خدنا التصريح منك يا جرووم:)

لا تفتح الباب..ولا ترده ..ولا تقفله
سيبه هيجي الهوا يعدله..
لو بعت قلبك مرة..هيجي يوم تتمنى تقتله..
ده الحب اخد وعطا...وواحد بنسترجله


بس بجد بجد انا نفسي ارروح اشكر صاحب هذا الداء..
بجد فعلا لانه فوقنى ..:)
لانه ادانى فرصه انى اعمل حاجاات كويسه
كنت بس بعملها عشان تلهينى
بس دلوقت الحاجات دى..بقت جزء من حياتى..
:)

بس
وماتقلقوش عليا..
ده بس كان اثبات حاله...
:)