Monday, April 16, 2007

حدث..ويحدث كل يوم...


الو...ازيك عامل ايه؟؟؟
ايوة...الحمد لله انا كويس...انت عامله ايه؟؟؟
الحمد لله
كده طول المده اللى فاتت دى ماتتصليش بيا ولا تحاولى تكلمينى؟؟؟
يعنى انت اللى حاولت ...!!!انت اللى زعلتنى اخر مره...
برضه ....مهما تكونى زعلانه ...
تفضلى طول المده دى ماتتكلميش...
طب معلش حقك عليا..مانا كمان كنت زعلانه..
انت عارفه انا كل ما التليفون كان يرن اقول ...هى ..بس للاسف يطلع مش انت....
انت مش متخيله انت وحشانى قد ايه
وانت كمان واحشنى جدا..طول الفترة اللى فاتت وانا حاسه ان فى حاجه نقصانى...
انا فعلا ما قدرش اعيش من غيرك...
ولا انا يا حبيبتى

لحــــــــــــــــــظه صمــــــــــــــــــــــــــــــــت
........
......
الوووووو ...روحتى فين؟؟؟
انا هناااا
طب اتكلمى طيب...انت وحشانى عايز اسمع صوتك......
مهما قلتلك...مش هقدر اوصف اللى جوايا
وانا كمان والله..اللى جوايا ناحيتك اكبر بكتير وانت عارف اكيد...
عارفه انا طول الفتره اللى فاتت مش عارف اركز فى شغلى ..من ساعه اخر مره اتقابلنا واتخانقنا فيها
وحاولت اكلمك لقيت موبيل على طول غير متاح...
معلش......
بص يا احمد انا مش عايزاك تزعل منى تانى..ولا انا ازعل منك تانى..انا ماليش غيرك بجد...
واللى بينا اكبر من كده بكتير
احمد.....احمد مين؟؟
ايه احمد مين...أحمد انت...
انا مش احمد
!!!!
امال انت مين
؟؟؟؟
انا كريم...انت مش عارفانى يا دينا؟؟؟؟
ايه ده ..أنا مش دينا...انا ريهام....انت طالب نمرة كام؟؟؟
انا طالب نمرة
.......
لا النمرة غلط......
غلط ............ازاى؟؟؟
لحظــــــــــــــــــــــــــــــه صمت



طب معلش انا متأسف
لا ولا يهمك....

واغلق كل من كريم وريهام التليفون ..






بعد حوالى عشر دقائق

الو...ايوة يا انسه ريهام...انا كريم اللى اتصلت من شويه...
ممكن نتعرف..انا حاسس انى محتاج اتكلم معاك...
وانا كمان يا كريم..حاسه انى اعرفك من زمان..وبجد حاسه انى عايزة افضفض معاك.......
وهنا دقت الساعه الثانيه بعد منتصف الليل
............................................................................
هكذا هو الحب فى عيون كثير من الناس..
مجرد كلام فى تليفون..
واثاره مشاعر ..
وتلويث لمعنى الحب الحقيقى.....


هناك الاف من "كريم وريهام"

شغلهم الشاغل فى الحياه هو كلام الحب..
او كما اسميه انا
-الحب بالكلام-

جميعهم يرون الحب مجرد كلمه..او لمسه...
خروجه حلوة مع بنت جامده..وطبعا كلكم عارفين المصطلح اللى اقصده
او قاعده حلوة مع شاب روش...
للاسف
تجدهم
يتهافتون ..للوصول لذلك الزيف..
او مايطلقون عليه هم
الحب...
وان لم يحققوا كفايتهم من تجربه واحده...
يسارعون لتلك التجربه الثانيه..
بالطبع...
فالطريق ممهد..
وان لم تفلح الثانيه سيجد الثالثه..والرابعه...

ااااااااااااااااااااااااااااه
لو كان الحب شخصااااااا

لطردهم جميعا من مملكته...

فضفضه اليوووووووم
:)

ناس فى الحب تتكلم ..
وناس من الحلم تتألم...
ناس تقابلك بالاحضان ..
وناس تدور وشها ولا تسلم..
ناس تشوفها تحبها..
وناس من غير ماتشوفها تعلم
معلش اصلى مفروسه شويه..
:)
من كريم وريهام دول...
وماحدش يقولى هما معقول ماعرفوش من الصوت ان النمرة مش مظبوطه
لان الرد مشكوك فيه...
ممكن يكونوا عارفين بس بيستعبطوا..

بس خلاص

17 comments:

Noony said...

هي البنات دي معندهاش أهل تلمها؟
هي البنات والولاد دول أصلاً موجودين في الدنيا؟
دي حاجة تخنق بجد

ربنا يهديهم يا رب

أختك
نوني

Rivendell** said...

النص الاولاني كان فظيييييييييع

كان ينفع حتة قصة قصيرة بس تحففففففففففة

والله انا بطلت حتى اتناقش في الموضوع دا

خلي كل واحد سارح في دنيااااه

واللي بيشيل قربة مخروومة

هيجراله ايه

شطووووووووووورة

على دماغه فوراااا

Eric Matt said...


يااااااه
انت قولتي كلام كتير من اللي في قلبي يا صديقتي الخنيقة
:P

شوفي يا ستي أنا مش حعلق لانه كلام جميل غير بشوية فضفوضة
ولتحيا الفضفضة
:

ناس فى الحب تتكلم ..
وناس من الحلم تتألم...
ناس تقابلك بالاحضان ..
وناس تدور وشها ولا تسلم..
ناس تشوفها تحبها..
وناس من غير ماتشوفها تعلم
ناس تحب معاها تتكلم
وناس من سيرتها تتألم
ناس نورها بيطل عليك
وناس من شوفتها بتضلم
ناس ساكته من الحب
وناس مش عارفة تستسلم

أي كلام

تحياتي لك :))))

Shower-Mirror said...
This comment has been removed by the author.
Shower-Mirror said...

المفروض اللى يقول الكلام ده و احد فى سنى ( اول الثلاثينات بس و الله )

انما الجميل فى الموضوع ان انت اللى بتقوليه مع انك من الجيل ده ..الجيل اللى عايز يحب و يتحب و خلاص .. حتى لو كان كلام فى كلام ....

ربنا يكملك بعقلك ...


بس برده ارجع و اقول احنا بنظلم الناس ليه ...


احنا كلنا عارفين ان فى السن ده اد ايه البنات والشباب بيكون ضعيف


و بالذات فى مجتمعنا المزدوج ده .....

اللى بيخنق على الولاد و البنات لغاية ثانوى ...و فجأه يلاقوا الحريه كلها قدامهم ...


و لو ان اليومين دول العيال ماحدش بيعرف يخنق عليهم ... و كل واحد او واحده معاه موبايل و قاعد على النت ليل نهار ....


و الله على ايامى كان الواحد بيعمل خطه محكمه ...و يشترك فيها اصدقائه المقربين عشان بس يكلم واحده ...يكلمها بس ... و ممكن الخطه دى تقعد شهر بحاله .. لا و ايه دى زميلته فى الكليه مش واحده غريبه....و بعدين الخطه اللى بعديها لمدة 6 شهور عشان ياخد رقم تليفون البيت ...و ده طبعا يستلزم مؤامرات و خطط فرعيه و مواعيد و كلمات سر .. عشان يتفقوا ازاى هايتكلموا من ورا اهلها ...

اه فكرتينى بايام الشقاوه ...الله لا يعيدها

تحياتى ..و ربنا يكفيكى شر المكالمات الغلط ..و الكلام اللى يدوخ من نوعية :

انتى دخلتى كلية الطب ليه ..نظره من عينيكى كفايه اوى ،، انا خفيت خلاص


:)

•«ρяoιd»•™ said...

طبعا ملكيش حل في خفة دمك اللي سخرتي بيها من الموضوع ده

و بجد حاجه تفرس

المشكله الحقيقيه تكمن في ان البشر مبقوش عارفين يعني ايه حب اساسا

و كله عايز يخلع عنه النفاق اللي عايشين فيه في مجتمعنا المنافق

بس للإسف بيخلعوه بطريقه غلط

فاكرين إن الحريه في اني اكلم دي و دي و دي

و اكلمه ده و ده و ده

كلمه حلوه مع شوية تضحيات مع اي حد و السلام

دوري كده في وشوش الناس عن نظرة حب

نادر لما تلاقيها الا في الأطفال عشان لسه علي فطرتهم

الناس نسيوا يعني ايه حب بجد

نسيزا اصلا معني كلمه بحبك

دلوقتي بقت كلمه بحبك معناها عايزك للإسف

ربنا يهدينا جميعا

و كلما نفتكر يعني ايه حب بجد

تحياتي

تخاريف خاصه! said...

هو طبعا كلامكم كلكم صح وتمام جدا...
ياريت تبقوا انتو اللى حواليا على طول وبس...
بدال ما الواحد بيقابل ناس تعبانه كده...
والمشكله انك بتصدمى فيهم..
هو طبعا القصه دى مش حقيقيه بحازفيرها..
لكن المعنى واااااحد فى كله
انه دلوقت تبص فى الجامعه على اى واحد ..لازم تلاقى فى بنت ماسكه فى ديله...
طب ليه كده يا ابله...
ايه اصلنا مرتبطين...
ااااااااااااااااااه
لا والافظع اللى تلاقى ردها ...ايه يعنى مااما وبابا عارفين...أنا مابخبيش حاجه عنهم
عاااااااااااااااااا
لدرجه انى من كتر ما شفت ناس زى كده عن قرب يعنى او عن بعد..
جت عليا فترة و ابتديت احس انه لا ...أنا اللى غلط...

بس الحمد لله ...لم تأتى لى اى فرصه للانحراف حتى الان
:)

جرووووووم
فضفضتك حلوة اوى يا اخى..
خصوصا الكلمه دى..
ناس نورها بيطل عليك
وناس من شوفتها بتضلم

بجد حسيتها جداااااااااااااا النهارده
:)

اما ابيه شاور..
فوطى صوتك حضرتك..لا المدام تسمع...
:)

العزيز proid
بجد كلامك فعلا صح جدا..نفاق فى نفاق..
وفعلا لو دورت فى عيون الناس عن نظرة حب صادقه لوجه الله كده...صعب تلاقى..
ما اسهل الكلام وما اثقل الفعل

...................
بما ان الموضوع شعشع فى دماغى..
ياريت كل واحد يتخيل كده لو حب بجد..هيعمل ايه..
؟؟؟
ولو عايزين تطنشوا...طنشوا...
:)

ولكم منى كل التحيه

Anonymous said...

الحب اكبر
واعمق
وارقى من هذا الهراء
وهذه التفاهة
بكثيييييييييير وكثيييييييير

مايفعلون ويقولون..ليس حبا
انه مجرد اشباع رغبات

لكن الحب
برئ منهم


والفضفضة جميلة جدا
سلمت يداك :)

يعقــــوب .... said...

انا أول مرة ادخل المدونة و بصراحة جميلة و مواضيعها كلها ممتازة..قريتها كلها تقريبا...بخصوص كريم و ريهام دول فهما دول البجد حنيقين قوي

Eric Matt said...


تحت أمرك دائما

لو حبيت بجد حكتمه في نفسي

بس

تحياتي لك من ماناساس البلد

Anonymous said...

صدقيني البوست صادق اوي يا شيماء...

فعلا...الحب بلكلام....

اسوء انواع الحب و ارخصها..ديتها ايه يعني...50 جنيه تليفونات بعدين يخرجوا يتسلوا مع بعض....

ربنا يهديهم..و يهدينا و يهدّينا...

بوست صادق

safa7_karmooz said...

الاول بوست جميييييييييييل جدا...وبتحصل كتير اوى ...

بس كده شوهوا معنى الحب اللى بجد...اللى مش كلام بس ...كلام وافعال بتثبت الاقوال دى ...

ناس كتير بقت فاهمة المعنى غلط ...

ايييييييييه سونيا

ااه كنتى بتسألى لو الواحد حب بجد هيعمل ايه ....مممم

انا حبيت زمان بجد...تقريبا قعد سنة ..زواتفشكل من ناحيتها...هحاول اافتكر...ممممممم...كنا لما بنتقابل كل يوم مثلا او لما بننزل...كنا عاملين جدول طاعة ربنا ...نحسب الصلاة ..والسنن ...وكمان كان فيه ركعتين شكر بنصليهم ...وندعى ربنا انه يوفقنا فى حياتنا ...ونفضل مع بعض

لحد ما جت ظروف مكلكعه فى النص ...فرقت ما بينا ..:(

any way لسه الصبح قارى بوست زى اللى كتباه كده

http://spare-times.blogspot.com/2007/04/blog-post_17.html

بسا..:)

وجع دماغ said...

تذكرت كلمة قديمة للدكتور مصطفى محمود تقول
الحب هو أكثر شىء يمتلىء بالأوهام نتعامل معها على أنها حقائق
والموت هو أكبر حقيقة نتعامل معها على انها وهم

تخاريف خاصه! said...

whisper
كلامك صح..

وانت اجمل يا حبيبتى..

يعقوب

ربنا يكرمك ياارب وماتكونش اخر زياره..ان شاء الله

ارتعاشات

حلوة ديتها خمسين جنيه مكالمات دى...
:D
خصوصا ان الدقيقه بقت ب اربعين قرش باين..
مع فودافون ماتفوتش لحظه..
:D

تخاريف خاصه! said...

سفاح كرموز..

ممممم

ربنا ينعم علينا بالحب الحقيقى الحلال...

:)

نفسي افهم ايه
بسا دى...اللى على طول بتكتبوها..
:D


وجع دماغ..

كلااااااام روووووعه بجد

تخاريف خاصه! said...

اما جرووووم باشااا

طب انت كده هتتجوز ازاى بقى؟.؟؟

:D
:D

Anonymous said...

دا مش حب يا شيماء دا
self decieving