Thursday, March 29, 2007

انا والنسااااااا...1

السلام عليكم يا اهل المدونا ت الكرام...
بما انى فضيت شويه بعد امتحان النسا اللعين..اللى من ابو خمسين.."خمسين درجه يعنى" قررت انى احكيلكم عن ذكرياتى مع
النسااااا..._اقصد ماده النسا والتوليد طبعا
هتقولولى واحنا مالنا يعنى..توجعى دماغنا ليه..هقولكم لاااااااااااااا..ده انتو هتقروه غصب عنكم...
:)
لا بجد عشان فعلا احس انى لسه قادره اتفاعل مع الناس..وانى ممكن يبقى فى فايده من اى حاجه ف اى حاجه انا بعملها...
فيلااااااا بينا نبتدى اولى حلقات...
"انا والنساااااا



حد ينزل بالتيترات.....
..........
13 يناير 2007
انه بومى الاول فى عامى الدراسي الجديد"سنه سته"ولعل سائل يسألنى"نعم...هو فى سنه دراسيه بتبتدى فى نص يناير؟؟؟؟
اما هذا فدعونى اقل له.."حضرتك احنا النظام عندنا فى هذه الكليه اللعينه ..غير ..غير يعنى
:(
السنه الدراسيه عندنا ممكن تتراوح مابين ال6 شهور وال13 شهر...فعقبال ما خلصنا سنه خامسه وخدنا شهرين اجازة ماهمش لازمه ..أبتدينا سنه سته ف نص يناير...
....
استيقظت فى السابعه الا الربع وكلى نشاط احسد عليه.
ياااه ده الكليه وحشتنى جدا..
كانت هذه هى صباح الخير التى قلتها لنفسي فى ذاك اليوم..
فحقيقه الاجازة ..مضت ولم يكن لها اى لون اة طعم او رائحه...وبالطبع لم يحاول احد ان يضف اليها اى نوع من مكسبات الطعم الاصطناعيه.._من اللى بتجيب السرطان..ماكنتش هتفرق معايا والله_
الا فى يوم النتيجه"نتيجه سنه خامسه"ففى هذا اليوم عدت لاتذوق طعم الامتياز من جديد...ولكنه لم يلبث ان ذاب هذا الطعم بعد حوالى قرابه ال36 ساعه
ارتديت ملابسي..ومضيت فى طريقى الى الكليه ..استرجع ذكريات السنه الماضيه..بحلوها ومرها..ولم يفيقنى الا هذا الصوت الذى استطعت ان اميز بسهوله انه صوت من النوع الظريف...

-ايوة
هالكارنيه يا انسه
لم اعط للرجل فرصه ان يكمل كلمته..ولعل كلمه"انسه"..

استفزتنى -ده مش لعل ..ده اكيد..:) -فرددت عليه بحده
كارنيه ايه..؟؟!انتو هتقرفونا من اولها..انا سنه سته جديد ولسه النهارده اول يوم...
..
ظهرت ملامح الفزع على الرجل واشاح بيده.."طب خلاص خلاص ..اتفضلى اتفضلى...
..
فمضيت وان اضحك فى داخلى.."قال انسه قال
:D
نظرت الى المدرج عاليا واخذت نفس عميق ومضيت بحطوات ثابته برأس مرفوع وظهر مفرود..وما هى الا خطوتين حتى قفز هذا الصوت الداخلى يداعبنى.."ايه ده..استنى استنى..انت قولتيله سنه كام يا حلوة..سنه سادسه..ايه ده يعنى انت بقالك ف الكليه المخروبه دى ست سنين..!!!
وحينها توقفت فى منتصف الطريق فى محاوله منى لان اراجع نفسي و"اركز"
لا ده طلع الموضوع بجد..وبحق وحقيقى..ايه ده سنه ساته...يعنى اخر سنه ف الكليه..يعنى اكبر ناس فى المنطقه دى..يعنى بكاررررللليوس...يعنى صبح صبح يا عم الحج...

وتولد داخلى احساس قوى بالسعاده..-بالظبط زى احساسى وانا راكبه
Top spin
فى دريم بارك وهى عماله تتطلع بينا لفوووووووووق...
ومضيت ف الطريق بخطواتى الثابته تلك فى محاوله لرسم صوره الفتاه الجاده..
:)

هى الساعه كام لو سمحتى؟؟ جاءنى هذا الصوت من جانبى...
-تمانيه الا تلت

وهنا تنبهت وعاد هذا الصوت الداخلى يداعبنى مرة اخرى...
ههههههه بالذمه مش عيب عليك..واحده ف سنك ده تنزل من بيتها ف الوقت ده وتيجى تحضر المحاضره
يابنتى انتى اللى قدك...زمانها بتحضر الفطار لجوزها...
وهنا رنت فى اذنى كلمه رجل الامن.."يااااااااا انسه.."كافلام السينما...
يا انسه ..يا انسه...سا انسه...
الى ان صعدت الى المدرج ودخلت..فلم يكن احد من اصدقائى قد جاء بعد..
فتوجهت بحركه لا اراديه الى مكاننا المعهود فى المدرج منذ العام الاول
نفس المكان..لم نغيره..الا لظروف قهريه -ان حد يجى يغلس ويسيب المدرج كله ويجى يقعد ف الصف ده..بنبقى عايزين ساعتها نكلوا
بسنانا..
ياله مكان عجيب..أخذت اتفحص زوايا المكان..التى اجبرتنا ان يكون هو مكاننا الاوحد فى هذه الاستاد الرهيب ..اقصد فى هذا المدرج العظيم..:)
وتذكرت بعض اللقطات من عامنا الاول ..وكيف كنا بحق..ونعم العياااااال..ولازلنا طبعا..
:)
وبالطبع لم يكن حبل اللقطات متصل..بل كان هناك كثير من االستوبات-جمع
stop
حوالى سبع مرات من زميلاتى العزيزات.
اهلا ازيك يا شيمو..
الحمد لله ازيك يا.....
ايه الاخبار باديه ايه
باديه نساااااااااا
يااااه ربنا يعينك..
كان هذا هو الحوار المتكرر ...


..الى ان جاء اصدقائي وجلسنا سويا كسابق عهدنا.."السته المرصوصين.."كما ادعوهم انا..
:)
وتعالت ضحكاتنا ونحن نتذكر كيف اصبح هذا الماكن عشره..:) بكسر العين..
الى ان جاء صوت جهورى هز المدرج...
بسم الله الرحمن الرحيم...يالااااااااااااااا كله يقعد ف مكانه....
وكانت هذه اولى كلمات فى اولى محاضرات النسااااااااااااااا
ولنا عوده ان شاء الله
:)

ٌ

16 comments:

The Groom said...


أنا مش بكره الطب أوي بس بكره الكيمياء

يعني لو أدرس طب من غير كيمياء كان زماني أستاذ تشريح متميز والله

أنا مش بكره الدم و لا بقرف و سادي كده و بتاع تعذيب وأهم حاجة بهتم بالتفاصيل

اهاهاها كومينت مالوش لازمة

بس البوست جامد و فكرني بنفسي في اخر سنة ليا في الكلية و كمان أول يوم ليا فيها

ممم قول للزمان ارجع يا زمان

تقبلي أحر التعازي تاني يا دكتورة تخاريف و اوعي تكوني بتزعلي من اللقب ده

شوية فضفضة جاي مخصوص عشانك أقولهوملك:

ناس ملهاش في العلام و ناس بتدرس النسا
ناس جاية تقرا و ناس غلسة ع المسا
ناس في كليات و ناس في الدنيا مغمسا
ناس بترتاح و ناس في الشغل مدبسا

هي فضفضة ركيكة شوية بس معلشي مانا مش دايما وهمي

تحياتي من ماناساس البلد

The Groom said...


صحيح نسيت اسف والله

سلميلي على عومار كتير أوي

وقوليله انا بعاكسه بس عشان مينسانيش :)

بس لو شفتيه شايل عصاية و جاي يضرب قوليلي بسرعة عشان استخبا

سلااااااااام

Dr_M said...

كل ده من النسا .. ربنا يستر
ربنا يكرمك السنة دي وتخلصي علي خير كفاية بقي كدة
يلا كملي خلينا نشوف النسا عملت ايه

Rivendell** said...

عقابلي يارب


الاحساس دا جالي اول السنة

وان خلاص

الواحد طهق وقرف

وبقاله 5 سنين بحالهم في نفس المكان اللعين


ربنا يصبرنا

ert3ashat said...

طب :):):):):):):)........ربنا يتولانااااااااا و الله :):):):)....انا سعيد انمي بقابل زملاء المهنه على النت....
مدونتك حلوه اويي

safa7_karmooz said...

اول موقف مع الراجل بتاع الامن ...بيفكرنى وانا بدخل المدرج اابص بصة ...او وانا داخل الجامعه يقولى كارنيه ...بقوله حقوق ...وابصله بصة قرف ...يعرف طوالى ...انى قديم فى الكلية فاعدى ... :D

بس ...يعنى ربنا يكون فى عونكم جميعا 6 سنين ....والسنة 13 شهر huh

مسنتظرين البقية ..:)

Shower-Mirror said...

ربنا يقويكى ....واضح فعلا ان النسا دى ماده صعبه ... :)

مستنيين باقى الكلام .... :)

تخاريف said...

نبتدى الردود...
:)

The Groom
هوانا مش فاهمه ايه علاقه الطب بالكيمياء؟؟؟

احنا خدنا كيمياء بس ف اولى وتانيه قبل الميلاد..وكانت حيويه كمان!!!

ومتشكرين حضرتك ع الفضفضه..
اسمحلى اكتبها على كتاب النسا
:)


اما بالنسبه لعمر فماتقلقش ده قلبه طيييييييييييييييييييب
:D

تخاريف said...

DR-M
اه بالله عليكم ادعولنا كتيييير

بس ياريت تعرفنى او تعرفنى على نفسك اكتر...
اصل حاسه انى اعرفك..وانتى كمان او وانت كمان...
ياريت معلش
:)

تخاريف said...

Rivendell
ايوة كده..لازم بتوع طب يواسوا بعض ..
:)
شدى حيلك ف الباطنه والاطفاااااااااااااال
ربنا يكرمنا كلنا يارب

:)

تخاريف said...

ert3ashat
ربنا يكرمك..

اسم مدونتك جاامد جدا...
:D

تخاريف said...

سفاح كرموز...

14 سنه خدمه ف ثانوى..ويقولى كارنيه..

:D

Shower mirror
دعواتك بقى..
ابتدينا الجراحه..
(وش بيتحسر على حاله



واخيرا وليس اخرا...

ترقبوا نزول البوست الجديد...
:)

Noony said...

أخر سنة في الكلية كل لحظة فيها جميلة وكل لحظة بتفكرك بلحظاااااااات أجممل (هي لازم تكون أجمل) حصلت في السنين اللي قبلها وخصوصاً أولى كلية...ولسة البقية تأتي في المساء والسهرة...بقية الذكريات أقصد
:)
استمتعي بكل لحظة فيها عشان الذكريات دي هي اللي قعدالنا..وربنا يوفقك..ويقومك بالسلامة يا أم فاروق
مش هقولك "آنسة" لأنها كلمة فعلاً مستفزة

متتأخريش بالبوست الجديد

The Groom said...


أي خدمة يا دكتورة تخاريف

مليش دعوة انا مش بحب الكيميا برضو

الفضفضة أؤمريني بس وانا عالطول اعملك كل يوم بوقين منها

اكتبيها على اي حاجة ان شاء الله سور الكلية

بس بشرط واحد

حطي لينك ليا تحتيها و لمدونتي لزوم الدعاية

:)

لا والله انت حرة بجد دي اهداء خاص ليكي

سلميلي على عمر و قوليله لما انت طيب أوي بتتنرفز من عومار دي ليه؟

يا عوووومممااااررر

:))

سلااااام من ماناساس البلد و كل سنة و انت طيبة بكل الايام الحلوة و المولد

تخاريف said...

ربنا يكرمك يا
groom
وماتقلقش حقوق النشر محفوظه...
:)
وكل سنه وكل المسلمين بخيير..
:)

دمتم سالمين..
:)

whisper said...

يا سلام عليكي يا حبي

نفس الاحاسيس والمشاعر اللي كانت جوا الواحد اليوم ده

لا فعلا اجمد حاجة اننا اكبر ناس في المنطقة..والكبير كبير ههههههههه

ياللا معلش..ربنا يهونها علينا وتعدي على خير


ونروح بقى للامتياز اللذيذ موت زي ما انتي عارفة والريكويستات والذي منه :(


مع تحيات زميلتك في الكفاح :)