Wednesday, April 4, 2007

انا والنسا 3

السلام عليكم ورحمه الله.
كيف الحال..
يلااااا نكمل ذكرياتى مع النسا..
يارب ماتكونوا اتخنقتوا..
:)
يلااااااا
حالات...حالات

حد ينزل بالتيترات برضه...

مرت ايام وايام...وفى كل يوم يزداد لدى شعور داخلى..بان"احنا والله يا ستات غلابه..واللى يقول غير كده يبقى هو المفترى..
...
:)
ساحكى لكم بعض الصور النسائيه الانسانيه..التى تعتبر نقطه فى بحر مما نراه كل يوم..
دعونا نبدأ بهذه الحاله
حاله 1
سيده عمرها 22 عام فقط_يعنى قدنا_ماعلينا
:D
حامل فى ثلاث توائم ..وعمر الحمل32 اسبوع ..اجهضت من قبل خمس مرات..
!!!
نظرت اليها فوجدتها مستكينه..ملامحها مصريه اصيله..بجد والله..واضعه يدها على بطنها البارزه..كأنها تحاول ان تطمئن هذا الثلاثى..وتطمئن نفسها من قبلهم..بان كل شئ سيكون على مايرام..وانهم لن يلقوا نفس مصير اخواتهم السابقين..
!!
-انت متجوزة من امتى؟؟؟
-ماحدش يقول ان السؤال ده حقودى..
:)
السؤال ده طبيعى جدا فىحالات النساااا
:)
-من اربع سنين!!!
نظرت اليها وقد ازدادت شفقتى عليها..وتذكرت ذلك المسلسل الكئيب لفردوس عبد الحميد_مش فاكرة اسمه_وودت ان اتقمص شخصيتها ولوللحظه..واخذ تلك الفتاه..او السيده..واضمها الى صدرى واطمئنها..ولكن حال المكان والزمان دون ذلك...
واخذت تقص علينا تاريخها المؤسف وكيف فقدت هؤلاء الخمسه اثناء الحمل..
-وهما مستنين اسبوعين كده ولا حاجه ..عشان يولدونى فتح بطن
!!!!
-نعم!!!فتح بطن كمان....
يالهوى يعنى بعد ماتعبتى المرات اللى فاتت دى..كمان هتولدى فتح بطن..
واخذ نفس السؤا ل يدور فى ذهنى مرة اخرى..
طب هى يعنى ماكنتش خايفه على نفسها طول المرات اللى فاتت؟؟طب والمرة دى..مش خايفه..مستعده يعنى انها تتضحى بنفسها عشان تخلف..؟؟؟
وهنا دارت تلك الفكرة الخبيثه فى ذهنى...
طب هما لو قالوا للرجاله بصوا..احنا هنيجى كده ونفتح لكم بطنكم ونطلع منها عيل..
حتى من غير حمل ولا حاجه عشان نخفف المهمه..
:D
والعيل ده هيبقى ابنكم..
ياترى هيكون رد هم ايه؟؟؟؟
:)

حاله 2
اما هذه السيده فهى فى ال32 من عمرها ..حامل فى 30 اسبوع..ولديها بنتان..وجاءت الى المستشفى بعد تدهور حاله القلب نتيجه مضاعافات من حمى روماتزميه على القلب اصابتها منذ ان كانت ف العاشره من عمرها...
كان وجهها ..جميل هادئ الملامح..ولكنه باهت...

- طب انتى خدتى وسائل منع حمل؟؟
-اه وشلتها قبل الحمل ده
-ليه؟؟
- عشان اجيب الولد..
الاجابه ثلاث كلمات ولكنها تكشف عن معان كثيرة..سهل فهمها من نبره صوتها ..ونظرة عينيها الذابلتين..
-طب انت مش عارفه انك ممكن تتعرضى لمخاطر ف الحمل..تدهور حالتك وانت اساسا عندك القلب؟؟
-معلش بقى..ربنا يسترها..
وظللت طوال الدرس افكر فى حال هذه السيده..لو انه-لا قدر الله-اصابها شئ اثناء الحمل..ماذا سيكون مصير بناتها..
وما ذا لو اتت بذلك الولد المرجو..ورحلت ..
همت ان تمضى الى العنبر..
-خلى بالك من نفسك..وماتحمليش تانى مهما حصل..
لم استطع ان امنع نفسي من انا اوجهه اليها تلك الكلمات..
واكتفت هى بالرد..
-ربنا يسترها...

ولنا بقيه..
الجزء الاخير..
فى البوست القادم باذن الله
دمتم سالمين
:)


12 comments:

The Groom said...


لا حول ولا قوة الا بالله

ربنا يصلح الحال يا رب و يشفي كل مريض و يسترها على الجميع


بالنسبة لموضوع الرجالة فالله الذي خلق في النسوة القدرة على الحمل خلق لهم تلك القدرة العجيبة على التضحية و قوة التحمل و لو كان في الرجال لخلقها فيهم

حكمة الله تعالى

فضفوضة:

ناس بتتمنى تحمل و ناس م الحمل عيانة
ناس بتعياوتمرض و ناس ع الصحة بطرانة
ناس مريضة في جسمها وناس نفوسها عيانة

اهو كلام

شكرا لك و تحياتي من ماناساس البلد على البوست الجميل ده

Shower-Mirror said...

مش عارف هاتفتكرينى و الا لا ... لما تخلفى اول طفل ... و فى ساعتها هاتنسى كل اللى حصل اثناء الحمل و الولاده و هاتقولى و انتى مدروخه من البنج ...البيبى فين عاوزه اشوفه ....:)


او لو انتى زى حالاتى بترجعى من الشغل ... و باسمع صوت رجلين الملاك الصغير و هو جاى يجرى عليا و بيصرخ من الفرح بابى جه ..بابى جه ...


هاتعرفى ساعتها هما ليه الستات بيعزبوا نفسهم كده ...

عشان يجيبوا حد يحبهم كده ...حب خالص ...بيور ....حب لله ...من غير اغراض ..من غير مقابل ....

تحياتى ... ويارب تعرفى قريب ...

و ميرسى انك مابتجيش عندى خلاص ... اول مره اشوف دكتوره ندله ... :)

Noony said...

سبحان الله

وفي الآخر ينادوا بالمساواة بين المرأة والرجل..طب تيجي ازاي دي؟

الحمد لله رب العالمين على نعمة الصحة واحفظها من الزوال يا رب العالمين.

سلامات
نوني

تخاريف said...

جروم باشا...
:)
الحمد لله..وشهد شا هد من اهلها

:D
الفضفوضه رائعه جدا

:)


...............
ابيه
SHOEWR MIRROR
طبعا عندك ..حق..
احساس الامومه ده احساس تانى خالص..
:)
ومعلش لو زياراتى قليله عندك..والله رحت البلكون ..بس للاسف ماكملتش الفيلم لاخره هناك..
الاسبوع ده كان طحن فعلا ف الكليه..
ياااالا الحمد لله..
هروح هناك اهوه..
:)
Nonny
لا احنا بتوع المساواه ..ولا احنا قدها..
:)
ربنا يسلمك يا قمرة..
:)

N.B.
معلش هو انا فى حاجه حصلتلى النهارده قلت اكتبها هنا..بما ان اصحابها كلهم هنا..
النهارده افتكرتكم انتو التلاته بالذات
والله بجد
شفت واحد كده بيركن عربيته ومعاه مراته قاعده جنبه وورا ف الكنبه ولدين زى القمر..
افتكرت ساعتها ابيه شاور..
:)
وبعدين جه واحد بينادى على بنت صغيره..بيقولها تعالى يا نونى..
افتكرت يا نونى..
وكانت بنوته زى القمر على فكرة..
وبعدين قابلت اصحابى فصاحبتى بتحكى حكايه كده..
افتكرت جرووووم على طول..
:)
بس مافيش داعى اذكر الحكايه..
:D

Whisper said...

السلام عليكم حبيبتي

اول مرة ازور مدونتك..وان شاء الله متكونش اخر مرة

البلوج ده بجد مؤثر جدا

للاسف رغم التطور والثقافة والتعليم..الا ان لسة في ناس في بلدنا كده

بجد ربنا ياخد بايد السيدات دول


وانتم السابقون...ونحن اللاحقون..هاييجي علينا يوم نشوف احنا كمان سيدات زي دول



لك كل تحياتي :)

تخاريف said...

whisper
عندك حق فعلا..
ويمكن هى دى الحاجه الوحيده اللى كانت مخليانى عايزة اتخصص نسا..
قبل ما ادرسها طبعا
:D

The Groom said...


أولا أنا قصدت أنه لو جعل الله للرجل القدرة على الحم لوضع فيه نفس الحنان

ولكن الله سبحانه و تعالى خلق فيه حنانا من نوع اخر وكل ميسر لما خلق له

ثانيا مصمم أعرف الحكاية :(

يعني اشمعنى هما ؟

ماليش دعوة

وأي خدمة فضافيضي جاهزة

تحياتي من ماناساس البلد

Rivendell** said...

اي اي اي


كل البؤس اللي بنشوفه في الحالات


انا بحس انه اتطبع على روحي واتختم عليها بختم احمر عمره ما هيروح ابدا

ert3ashat said...

الولد..الولد...اهو فكر متخلف..
دكتور النسا كان بيقولنا ف واحده كانتخلفه 4 توائ ولد و تلات بنات...و جات متابعة ولاده بعدها ب شهرين لقوا الواد مربرب و بكرش و البنات مفاعيص..في ايه يحاجه..
طلع بترضع الواد من درها و البنات لبن بودره........

و عموما الولاد يفتحوابطنهم ليه..كفايه يفتحوا دماغهم في الشغل عشان هي تولد في مستشفى نضيف
سيبتلك تاج عندي

Esmeralda said...

بصى يا ستى
الحالة الاولى
داه شعور طبيعى جدا
الامومة غريزة و احتياج مهما كانت الطرق صعبه لتحقيقه
و اعتقد ان لا قدر الله فشلت حاتحاول خمسين مرة تانيه

الحالة التانيه
ماتظلميهاش
اتهمى الجهل و المجتمع

المسلسل اسمه
و لازال النيل يجرى

سلام

تخاريف said...

صح برافو عليك يا
Esmeralda
,مازال النيل يجرى...
انا مش بظلمهم..ده انا بجد فعلا كنت مشفقه عليها..
بجد
بس للاسف مش عارفه بقى ربنا كرمها وعملت ايه...

The Groom said...


تخاريف

معلشي أنا كنت مخرف بعيد عن الكمبيوتر لما دخلتي على الشات على مدونتي

بس ايه رايك؟ :)

هاهاها جربي براحتك

سلام من ماناساس البلد و برضو مصمم اعرف الحكاية