Thursday, June 5, 2008

طبيعي ف الكشك!

‏'طبيعي ف الكشك‏!‏‏' يعلو صوت 'نائبة ' النسا والتوليد في كشك الولادة
معلنا عن مجئ مولود جديد علينا استقباله ومساعدته
ليتم مروره وخروجه لهذة الدنيا بسلام..
دون اية مشاكل..اسرعت لأتعقم واخذت وضع الاستعداد
وبدأت تلك الوصلة المعهودة'يلا يا ستي احزقي يا ماما ..
ماتقطعيهاش يلا..ها.. ها برافو عليك ..
الي ان طلت علينا..كانت عيناي اول من رأتها ..ويداي اول من لمستها..
فأنا اعترف بأنى اول من أذيتها وأخرجتها لهذة الدنيا..
لكني اعتذر فالذنب ليس ذنبي! تصرخين يا صغيرتي..لم يحن وقت الصراخ بعد!
انت لسه شفتي حاجة!
-ها يا دكتورة شيماء خلاص كدة؟
-ايوة ياستي حمد الله علي سلامتك جبتي بنت زي القمر ..هتسميها ايه؟

-هسميها شيماء يارب اشوفها دكتورة زيك كدة!

يعلو صراخ تلك ال' شيماء'في نبرة اعتراضية حادة..
وكأنها ادركت ما قالته امها!!