Thursday, May 31, 2007

اقرب الناس ليك...1

السلام عليكم ورحمه الله يا اهل المدونات الكرام
ازيكم..يارب تكونوا بالف خير...
:)

طبعا كلكم ملاحظين الاستفتاء اللى متلقح اعلى الصفحه ع اليمين
..بقاله كده حوالى شهر..

هو كان عن اقرب الناس ليك..
هو السؤال بسيط..بس عمييييييييييق..
ويعكس حاجات كتييير جدا...

36 شخص وشخصه صوتوا فى الاستبيان
وكانت النتيجه كالاتى..

النتيـــــــــــــــــــــــــــجه



يعنى شخص واحد بس هو اللى قال ان اقرب الناس ليه ...والده
فى مقابل 11 شخص قالوا ان اقرب الناس ليهم ..هى والدتهم العزيزة..
وبرضه شخص واحد بس هو اللى قال ان اقرب الناس ليه هو..اخوه
فى مقابل شخص واحد برضه اللى قا ل ان اقرب الناس ليه او ليها طبعا..
..هى اخته
ووولااااااااااااا حد خااااالص قال ان صاحبه هو اقرب الناس ليه
!!!!!!!!!!!!!!!

وخمسه قالوا ان اقرب الناس ليهم هى صحبتهم
وسبعه قالوا ان نفسهم اقرب ليهم من اى حد
وعشره قالواا ان اقرب الناس ليهم ..ولا حد من دووول...


ننتقل الان الى التحليل التفصيلى من الاستديوو
بعد الفااااااااصل
شويه وراجعه...
حد ينزل بالاعلانات...
نحب نتعرف...
وراااااااااااااناااااااااااا ايه..
ورناااااااااااااااااااااا ايه
ورانا حاجات كتير والله
:D
سلام..
...................................................................
عدنــــــــــــــــــــــــــــــــا
احم
الميك...فى حاجه مش شغال..
...
ايوة..كده كويس...
نبدأ...
ممممم
اولا بس نوضح الهدف من عمل هذه الدراسه التخريفيه...
مممممم
هو يعنى اهم هدف ..
انى فعلا اشوف اقرب الناس للناس...
نعم
يعنى ايه اقرب الناس للناس...
؟؟؟
هو فى ناس اصلا قريبن من ناس تانين؟؟

ماعلينا نبقى نناقش الموضوع ده فى حلقه تانيه
عشان وقت الحلقه
اوك

نرجع بقى..
لو رجعنا كده لفوق نشوف النتايج
هنلاقى
عده ملاحظات..
اولا
عدد المصوتين كان اكبر ماكنت اتوقع الصراحه
فبالتالى الصويت طلع عالى
زى مايكون السؤال جه ع الجرح
:)
نيجى بقى لتحليل اول النتايج

ودى بصراحه انا شيفاها نتيجه متوقعه...
ان شخص..شخص واحد بس هو اللى قال ان والده اقرب الناس لييه...
ممممممممم
واحد من وسط 36
وده نتيجه التطور الطبيعى للحاجه السقعه...
:)

نتيجه بقى فرض الوصايات ..وليه وازاى وعشان ايه..ولا...
مانا عارفه الابهات دول..
مابيصدقوا يبقوا ابهات..
زى مايكون اول مرة
او حد هيجي يا خد مكانهم ولا حاجه..
.
:D

نتكلم بجد بقى...
بعيدا عن التخريف..
:)
تفتكروا فعلا الاب بعيد عن ولاده للدرجه...
دى؟؟؟؟
طبعا انا هنا ماقصدش بُعد المكااان..
لا اقصد بُعد الرووح..
بُعد التفكير..
ُبعد المشاركه...
مممممممممم
انا شايفه ان الاب عشان كونه راجل..
بيحس انه لازم يبقى قوى..
كلامه..قوى..
تصرفاته قويه..

فبيفرض بقى قوته
دى على اولاده..
ونظرا برضه للمرة التانيه انه راجل..
فصدره مابيبقاش فيه متسع انه يسمع يشوف العيال عايزة ايه
ولا بتفكر ازاى..
ولا حاسه بايه...
اهم حاجه انهم يسمعوا الكلام وبس..
غير الام..
اللى العاطفه عندها بتخلى صدرها واسع جدا لولادها..
فبتتحمل رغبتهم..
وتحاول وفق بين اللى هما عايزين واللى هى عايزة تمشيه..
فبتوصل بيهم لنقطه التقااء
ده بقى بيخلى العيال اه بيحبوا ابوهم جدا..
واه بيحسوا بالامان والقوه فى وجوده...
بس للاسف..بيفقده هو حاجه مهمه جدا..
هو ماحاولش يفكر فيها..

انه يكون اقرب الناس لولاده
مش عشان هو مش مهتم..
لا عشاان هو بيبقى عنده اعتقاد تام وقناعه تامه
انه عارف كل حاجه عن عياله..
فبالتالى هو اقرب الناس ليهم..
وهو مش مدرك الفرق الكبـــــــــــــــــــير
اللى بين الوضعين..



مممممم
طبعا لكل قاعده استثناءات
وانا هنا لا بتكلم على قاعده..
ولا بتكلم على استثناء
دى مجرد ملاحظات
من واقع الحياه
بالصوت والصورة...
تحاول ان تنقلها لكم تخاريف..
من بين الناس..
:)
للاسف وقت حلقتنا خلص..
وبنوعدكم اننا هنكمل تحليل باقى النتيجه
قريب ان شاء الله...
هتنزل على حلقات..


بنشكر كل الناس اللى هنا واللى مش هنا..
و
بس خلاص
سلاموو عليكوو
ومستنين الردود..
وياريت اللى اقرب واحد ليه هو والده..
يشرح لنا تجربته..
....................
ياما فى ناس من العين لازقه وقريبه
لكنها من القلب بعيده بالامياااال
وناس بينك وبينها بلاد تركب الافيال..
لكنك بتسمعها ..بترد الندااا
..
:)



Sunday, May 27, 2007

New Start!!




مضى شريف يتصقح قائمه ال
Missed calls
رانيا2
وهنا ابتسم
وردد داخله
اايوة كده..وحشتينى اوى..
اما اكلمها ..
Dailling Rania
تررررررررررررر...ن ترررررررررررر..ن
الو
الو ازيك يا رانيا
ازيك ياشريف عامل ايه وحشنى..
وانت اكتر يا حبي
ها ايه الاخبار عندك
الحمد لله بستعد اهوه ..الست بتاعه الحنه جت والبنات ابتدت تيجى..
طب كويس..ماينفعش انا كمان اجى..؟؟
انت...لأااااااااااااااااااااا
لا؟؟كده ؟؟ماشى..انا زعلان..
هتيجى تعمل ايه فى وسط البنات..
بنات ؟....بنات مين..انا ساعتها مش هبقى شايف غيرك..
احم...طب ياالا اتكل على الله ..عمالين ينادونى...
طب خلاص خلاص ماتزوقيش..
بقولك صحيح..خلصى الليله دى بدرى بقى..
ونامى كويس عشان بكره ماتبقيش تعبانه..

بكرة...ليه اشمعنى...؟؟
اه انت ناسيه ولا ايه ..حضرتك احنا فرحنا بكرة..
يووووووووه يا راجل مش كنت تقول من بدرى..
والله؟؟
هههههههههه
لا بجد.. اقفل بقى ..اصحابى عمالين يندونى..
طيب هقفل اهوه..
بس
استنى
ايه تااااااااااااانى..
عايز اقولك على حاجه
نعم
بجد انا فرحان اوى..ربنا انعم عليا بيك..بجد انا فرحاااااااااااااااان..فرحاااااااااااااااااااااان

واناكمان بجد فرحانه اوى.. واديك انت قولت اهوه..
انا نعمه ربنا انعم عليك بيها..
اوعى تيجى بقى كمان سنه ولا اتنين تقولى زهقت..


لا طبعا وانا اقدر..يتقطع لسانى ساعتها..

طب ياالا بقى اقفل بقى....
حاضر
سلام يا حبي..
مع السلامه
اغلق شريف الموبيل واخذ يفكر فى غده..بل فى حياته القادمه كلها..وظل يفكر ويفكر.. ويحلم..
حتى اشرق صباح اليوم التالى..
يوم الفرحه
:)

......................................................................
لما لقيت الناس مكتئبه..ماهنش عليا اكتئابكوو
وكتبت البوست الجديد بسرعه..


عشان ماحدش يكتئب..
:)

ربنا يجعل ايامكو كلها افراح
:))))))))))))

Saturday, May 26, 2007

Missed life!!


مضى شريف يتصفح قائمه المكالمات التى لم يرد عليها..
"missed calls"
نهى..الساعه 5:20
ييييييه ...نهى..طيب..هبقثى اكلمها اشوفها عايزة ايه دى..

لمياء الساعه 5:50
لمياء...طنش طنش..احنا مش ناقصين نكد..

حنان الساعه 6:05
حنان ..يا بنتى انا مش لسه مقابلك الصبح..عايزة ايه بقى؟؟؟
افففففففففففففف

رانيا (2)الساعه 7:00
وهنا خفق قلبه بشده..ايه ده رانيا ..معقول ...
ياااااااااااااااااه
دى بقالها سنتين واكتر كمان
يجى سنتين ونص كده مابتتكلمش..
ولا حتى بترن..
من اخر مره اتقابلنا كلنا فيها.......
ياااااااااااااه انا فاكر كويس..
كنا كلنا متجمعين فى خطوبه واحد زميلنا..
فاكر كويس انا لما حاولت تلمحلى كده..

ان فى عريس متقدملها..وكده..

وانا ساعتها عملت نفسي مش واخد بالى ..
وقلت يا واد طنش خالص...

انا ساعتها ماكنتش متأكد من مشاعرى ناحيتها.
..
ا...
وهى كان باين من كل تصرفاتها انها بتحبنى..

ا ه كنت مشدود لها بس يعنى كان لسه بدرى..
كنا لسه متخرجين..
وانا كنت حاسس بقى
انى يا ارض اتهدى ماعليكى قدى..
واللى تتجوزنى دى لازم ولازم..
وانا لازم اجرب واشوف واعيش ...
لحد ما الاقى اللى تعجبنى وتدخل مزاجى اوى
..
ممممممم
مش عارف..
من ساعتها بقى وهى لا بتتكلم ولا حتى بترن..
وانا كمان نفضتلها..

يااااه معقول يجى سنتين عدووووا كده...
لا سنتين ايه ..تلاته يا عم...
بس مانكرش انها كانت بتيجى على بالى..كتير..
وكنت بفتكر الحنيه اللى كنت بشوفها فى عنيها
..
ياااااااه .
.ماشفتهاش فى حد بعدها...
كتير بحس انها بتوحشنى.. زى ماهى وحشانى دلوقت كده وعايز اكلمها
...
طب ايه...
ممممممم
ماتكلمها يعنى فيها ايه..؟؟
شوفها عايزة ايه...مش يمكن...
ماشي .. هنشوف...
dialling Rania....
تررررررررررررررررر..ن...ترررررررررر..ن
الو..
الو ايوة..رانيا...
ايوة انا ..مين...شريف...!!!ازيك يا شريف عامل ايه؟؟
كويس انك لسه فاكرة صووتى..
لا ما هى النمرة لسه متسجله عندى..ازيك انت عامل ايه؟؟
انا الحمد لله كويس..انت ايه اخبارك
انا الحمد كويسه..
اصلى لقيتك رنتى عليا مرتين وانا كنت نايم ..
ايه ده ...؟؟امتى؟؟
من شويه كده...
اااااااااااااااااااه معلش اصل مودى كان ماسك الموبيل بيلعب فيه...
مودى مودى مين؟؟
مودى ابنى..ايه ده انت ماتعرفش..انا عندى مودى سنه ونص..
انت عارف بقى عيال اليومين دول..ما بيلعبش الا بالموبيل..
كومبيوتر ..
يفضل ينخرب فيه..
مش زينا زمان..
هههههههه

ماشاء الله ربنا يخلي..
وانت ايه اخبارك ...عندك ايه دلوقت؟؟
انا ..انا ااااا لسه متجوزتش..
معقول ليه كده يابنى..شد حيلك بقى.. ربنا يكرمك ان شاء الله
اوك
مبسوطه اوى يا شريف انى سمعت صوتك..

وانا اكتر والله يارانيا...
اوك مش عايز حاجه؟؟
لا ابدا ربنا يكرمك..
طب سلاموو عليكوو
وعليكم السلام

اغلق شريف الموبيل..واخذ يفكر فى مامضى من عمره..
وهو لاهيا عابثا..
لم يذق طعم الاستقرار مرة..
تلفت حوله..
فلم يجد نفسه الا وحيدا فى ظلام تلك الغرفه الدامس..
شئ واحد يبدو مضيئا هناك..
انه الموبيل مره اخرى..
فاغلقه...
ومضى الى فراشه..ليبدأ محاولته اليوميه..كى ينام
...........

Tuesday, May 22, 2007

تاج يفرح..

ا السلام عليكم يا اهل المدونات الكرام
عاملين ايه..
يارب تكونوا بالف خير..فى الحر ده...
يااالا الحمد لله
التاج ده بقى جالى من العزيزه
rivendell
عجبنى اوى بصراحه ..وقلت لازم ارد عليه...
:)

يااالا نبدأ..باسم الله
احب شخص لقلبك فى الدنيا؟؟؟
أمى الحبيبه..
انسان مستعد تضحى بحياتك_ركز فى كلمه حياتك_عشانه؟؟
ممممممممم
ماما برضه..ماحدش يستاهل كده غيرها هى بس...
انسان كرهته لدرجه الجنون وتمنيت لو تمسك سكينه
وتنقض عليه وتغرزها فى قلبه تقتله
وتقف تبص علىجثته وتشفى غليل قلبك؟؟؟

ايه فيلم الرعب ده...
هو بصراحه فى واحد كده..كان نفسي اعمل فيه كده بس خلاص المسامح كريم
وبجد والله فعلا تغاضيت عن االاذى النفسي اللى سببهولى
وبقيت بشوفه يصعب عليا اساسا...
:)
ما هو اجمل كتاب قراته ومحتفظ بيه حتى الان؟؟
اعط الصباح فرصه..لعبد الوهاب مطاوووع كتاااااااب راااااااائع جدا...
بحبه جدا..وقريته كذا مره وفى كل مره بحس كل كلمه مكتوبه...
:)
اسم كتاب برضه متعلق بيه وبتقراه من فترة لفتره؟؟
هو برضه اعط الصباح فرصه..ولا تحزن للشيخ عائض القرنى..
برضه ده بحس انى ببقى محتاجه
support
من فترة للتانيه...
اهم جهاز منزلى متعلق بيه وبتستخدمه كتير؟؟؟
هو فى غيره الكومبيوتر...
والبوتاجاز..
:)
مكان تحس بالراحه لما تتدخله؟؟
مسجد النور..اللى فى العباسيه..
بحب المكان ده جدا..
شئ تحس بالراحه النفسيه لما تبصله..؟؟
السماااا بالنهار بس...

مكان تحس بيه للحنين الى شئ لا تدرى ماهو
وذكريات جارفه الى لا شئ؟؟؟

مممم
شارع كده ورا مستشفى حسبو..
فيه سنتر كنا بناخد فيه زماان
كل ماعدى من جنبه دلوقت..احس الاحساس ده جدااااا
اجمل مدينه زرتها الى الان فى مصر؟؟
هو فى غيرها
اسكندريه طبعا..
اجمل مكان طبيعى شفته فى مصر؟؟
البحر عند القلعه فى الاسكندريه...
شخصيه كرتونيه بتحبها ؟؟
بحب جيرى جدااااااااااااا جدااااااااااااا
نوع هاتفك المحمول.؟؟؟
نوكياز
3230
سرعه بروسسور جهازك وحجم الذاكره
ومساحه الحاجت الدينيه؟؟؟

فبلاش احراج...
انا يدوب اخرى العب جيمز واكتب شويه حاجات..غير كده....
ابيض يا ورد..
:)
فى سؤال فوته...

اهم هدف واضعه الان لحياتك؟؟؟
ايه السؤال ده...
انا بجد خلاص بطلت مساله الاهداف والكلام ده...
عايزة بس اخلص واتخرج واشتغل واعمل حاجه مفيده...
وبس..
مواصفات فتى احلامك؟؟؟
اهم حاجه ..انه يتقبلنى كده ..كلى على بعضى...
take it all or leave it all

:D
واكيد عشان يكون كده لازم يكون صافى جدا من جوااااااااااااه وراااجل كده...
وده طبعا شئ صعب فى الايام دى بس لسه الامل موجود...
وياخد بأيدى عشان ابتدى انا وهو نعيش الحياه اللى انا بتمناها حياه بقى فعلا بقى زى مابيقولوا كده فى ظل الرحمن...
ربنا يستر بقى...
ادعولى
:)
صف ما يأتى شعورك عندما تسمع كلمه مصر؟؟؟
بتصعب عليا جدا
لما بتسمع كلام عن اليهود..؟؟
بتغاظ...من نفسنا مش منهم
لما بتشوف ظابط شرطه؟؟؟
مممممم عادى يعنى...
احنا مابنخفش...
:D
لما بتشوف الكناس العجوز فى الشارع؟؟
بيبقى فى سؤال واحد فى دماغى...ولاده فين؟؟؟
افكارك اتجاه شاب يلبس جلبيه بيضاء قصيره وعمامه ولحيه وبجيبه سواك وبيده مصحف؟؟
بصراحه انا عن نفسي...بنبسط وبحس انه بصراحه قوى..لانه اكيد قابل هجووم رهيب من كل اللى حواليه ..ومع ذلك هو مصممم على اللى هو شايفه ومريحه..
احساس يراودك فى اشاره مرور مغلقه بسبب مسؤل كبير؟؟
ببقى هتفرس

وبكده يكون التااااج خلص...
وبس اللى عجبه التاج وعايز ياخده ..يتفضله
بالهنا والشفا...

..........................................................
بجد كل ماتفتكرونى ادعولى ..عندى امتحان جراحه كمان اسبوع ..
هو اي نعم عبيط ب 30 درجه بس...
بس برضه ادعولى..
ياالااا
سلامووووو عليكوووو
منشكحه انا واى بعد مارديت ع التاج الحلو ده
:D
ربنا يكرمك يا سها
:)

Friday, May 18, 2007

انا..هو انا...


السلام عليكم
ازيكم عامللين ايه؟؟

يارب تكونو بخير...
عايزة اسألكم سؤال كده..
بيخطر على بالى كل ما اشوف الصورة دى
ممممممممممم
ياترى...
ما مدى تقبلك للاخر...؟؟؟
يعنى مثلا لو الاخر ده غيرك

وهو اكيد كده

غيرك...

ملامحه غيرك..

صوته غيرك..

اخلاقه غيرك...

رأيه غيرك..

افكاره غيرك...

ميزاته غيرك..

عيوبه غيرك...

هدومه غيرك..

عربيته غيرك...

اكله غيرك...

لعبه غيرك..

كله كده...

كله على بعضه كده ...

غيرك...

هتتقبله ازاى...؟؟؟

هتتجنبه؟؟؟

ولا هتصدم بيه؟؟؟
ولا بقى هتحاول تفرض سيطرتك عليه ..والا لازم يبقى زيك...؟؟؟

ولااااااا بقى..

انت اللى هتحاول تبقى زيه....
؟؟؟

هو يمكن الكلام مش قادر يوصل

ويجيب معنى السؤال الحقيقى اللى عايزة اسأله

بس اللى فهم حاجه يقول

عشان بجد السؤال ده محيرنى انا شخصيا جدااا
ومحسسنى انى

psyco
:)
ودعواتكم بقى لحسن شكلى خلاااااااص
جالى الهوس هوس رسمى...


Saturday, May 12, 2007

التلاجه هى الحل..


التلاجه هى الحل...

ولو فريزر يبقى تمام اوى
وخصوصا ان الدنيا حر.....
احلى حاجه عشان االواحد يعيش ف العالم ده..
انه يحط اعصابه ..
لا مش بس اعصابه..
يحط نفسه ..كله كده على بعضه فى تلاااااااااجه..
سبعتاشناشر قدم...
يدوب..يدوب عشان يعيش بسلام ..
بس
.........................

مرراتى قربت تتفققع خلاص للمرة السبعين...

دعواتكم...

عشان بجد ..مفقعوعه...
وسنواليكم باسباب الفقع تبعاااااااااااااااااااااااااا

Friday, May 4, 2007

كم تشتكى





السلام عليكم...ازيكم..عاملين ايه..
قولت اريحكم شويه من تخاريفى...
:)

المرة دى جايبلك نشيد بحبه جدا..
دى كلماته...

كم تشتكى وتقول إنك معدمُ
والأرض ملكك والسما والأنجُُمُ...
ولك الحقول ..وزهرها وأريجها
ونسيمها والبلبل المترنم
والماء حولك فضةُرقراقةُ
والشمس فوقك عسجدُ يتضرمُ


والنور يبنى فى السفوح وفى الذره
دورًا مزخرفهً وحيناً يهدم
هشت لك الدنيا فمالك واجما
وتبسمت... فعلام لا تتبسمُ
ان كنت مكتئباً لعزٍ قد مضى
هيهات يرجعه اليك تندمُ


او كنت تشفق من حلول مصيبةِ..
هيهات يمنع ان تحل تجهمُ
او كنت جاوزت الشباب..فلا تقل..
شاخ الزمان فإنه لا يهرمُ..
انظر فمازلت تطل من الثرى
صورُ تكاد لحسنها تتكلمُ..
هى دى تقريبا ابيات لالييا ابو ماضى..
و
النشيد هنا بصوت الرائع احمد ابو خاطر
..
http://www.quran-voice.com/vb/showthread.php?t=7148

بس هو تقريبا لازم تسجلوا ع المنتدى ده..
عشان ترفعوا النشيد..
معلش اصل مش عارفه ارفعه من عندى..
بس هو حلو وهيعجبكو..
وادعولى..
:)

دمتم سالمين

معلش البوست فوق..
:)
نأسف لهذا التخريف..