Monday, March 19, 2007

وجوه منتصف الليل


انظر الى الساعه ..انها الثانيه عشر الا عشر دقائق قبل منتصف الليل...
اطلق زفره حادة..حاره...
-"يااااااااه ده الدرس كان طويل قوى النهارده ...انا مش عارفه النسا دى الواحد يعمل فيها ايه؟؟

اقولها فى سري مع بعض علامات الزهق والارف على وجهى...

اخرج من باب المركز ..لاجد اخى ينتظرنى ..

امضى اليه بخطوات مثقله...

ووجه ينم على انه لم يكن درسا..بل كانت"علقه"

-"سلام عليكو...ازيك يا عمر..ايه الاخبار.. انت واقف من بدرى..؟؟

-الحمد لله يا حبيبتى..لا من عشر دقايق كده...

-معلش اصل الدكتور اتأخر معانا النهارده...

-ولا يهمك يا بنتى ..

هذا هو السيناريو الدائم لاايام الاحد والثلاثاء والاربعاء...

ملل....

ولكن لربما هناك شئ يكسر هذا الملل الرهيب ...


انه الطريــــــــــــــــــــــــــــــــــــــــق..


كم جميل ان تطلع الى وجوه الناس فى منتصف الليل...
: )
ويظل السؤال يلح على كلما تقع عيناي على وجوه منتصف الليل..

"انتو ليه مش فى بيوتكم..؟؟بتعملوا ايه فا لشارع لحد 12 بالليل؟؟"

هذا السؤال ليس استنكار ولا استخفاف...انه فضول حقيقى...

"ببقى نفسي اوقفهم واقولهم...انا كنت ف درس النسا..انتو بقى بتعملوا ايه..؟؟
...............
تستوقفنى بعض الوجوه ..شاب وشابه على الرصيف...

منتظرين ان يتوقف سيل العربات حتى يتمكنوا من عبور الشارع...

يمسك بيدها....ويحاول ان يعبر بها ...

لكم شعرت بدفْ حقيقى .. وتمنيت ان اوقف العربه لاقول له

.."خلى بالك منها."..
:)

.........................

-"يادى الميكروباصات..يابنى اقف على جنب يابنى..."

كان هذا صوت اخى وهو يوبخ احد سائقى الميكروباصات...

نظر اليه االسائق وقال له

-"معلش يا بيه.."

نظرت اليه..وتعجبت حقيقه من هذا الذوق الغير معهود من هذه الفئه..
:D

وتعجبت اكثر لصغر سنه...

فهيئته توحى انه لم يكمل العشرين بعد...
....

اما هذا فلم يكن بحاجه الى ان اسأله سؤالى..فلقد كانت الاجابه واضحه من نبره صوته..

"اكل العيــــــــــــــــــــــــــــش"
........................................


"يييييييييييه"
قلتها فى استنكار...

"هما العيال دول مالهومش اهل..."

كان المنظر يوحى بالاشمئزاز...مجموعه من العربات الفاخره المتراصه ..

بابواب مفتوحه..

يجلس عليها مجموعات من الشباب...

عند كشك صغير "المفروض انه كشك حاجات حلوة..."
وتجد الصيحات المتعاليه والضحكات المنفره.

.... الى تجبر لسانك ان يردد

"كاتكو الارف..."
.......................................................

-"ايه ده..معقول....؟؟"
اقولها فى ذهول......

-"ايه يا بنتى فى ايه؟؟

"شايف يا عمر..الست دى...دى ايه بتبات ف الشارع كده؟؟؟

"اه يابنتى انت اول مرة تشوفيها ولا ايه؟؟

اه...طب هى مالهاش بيت..؟؟؟


نظر الي اخى نظرة تدل على غباء السؤال..

-"ماهى لو كان ليها بيت كانت باتت فيه يا ذكيه...."


اجبرتنا حركه السيارات ان نقتر ب منها اكثر...

انها تجلس على الرصيف سانده رأسها على صورعريض...

وبجوارها وابوور الجاز ..


-"طب ما تستنى يا بنى لما نشوفها..."

كنت على وشك انا انطقها...لو لا اننى تخيلت بقيت الحوار...
:D
-
-
تشوفى مين.
.

-"الست دى يا بنى مش يمكن عايزة حاجه...


ونشوفها هى بايته ف الشارع ليه فى البرد ده..يمكن نقدر نساعدها..."

وتخيلت اخى بنظرته المعهوده..._والله دى احلى حاجه فيه
:D_

تخيلته .."يابنتى روحى نامى ولا ذاكرى...ولا شوفى هتعملى ايه..."

فآثرت الصمت ..واكتفيت بابتسامه خيبه الامل....


وظلت صورتها بهيئتها الرثه تلك عالقه فى بالى...حتى ......


غرقت انا ايضا فى السبات العميق..بعد ان اقنعت نفسي...

بانى فعلا .."ورايا كليه وبلاوى تانيه الصبح.."
: (
واخذت عهد على نفسي ان اتحسر عليها كلما نمر بها وهى جالسه فى مكانها المعهود
.

!!!
..............

9 comments:

Shower-Mirror said...
This comment has been removed by the author.
Shower-Mirror said...

د.شيماء ...

جميل قوى ان الانسان يتفاعل مع اللى حواليه ...انا بستغرب على الناس اللى بتيقى عايشه و خلاص بدون ما تبص حواليها .

انتى فكرتينى بحاجتين :)

اولا : فكرتينى بأول بوست كتبته فى البلوج بتاعى من حوالى 8 شهور و كان تقريبا بيدور حول نفس الحاجه ( من فضلك حاولى تقريه )

ثانيا : فكرتينى بصديق عمرى اللى افترقنا بسبب دخوله كليه الطب .... لما كان بيقولى ان النسا دى اصعب ماده عندنا و حاجه زفت ...:) و كنت ارد عليه و افكار المراهقه تلعب فى رأسى : ازاى تقول كده .. دى المفروض تكون احلى ماده عندكوا ...:)

و على فكره اخر حاجه اعرفها عنوا من 7 سنين انه بقى معيد فى عين شمس .... تخصصه ايه ؟ ..:)ده سؤال .... امراض نسا طبعا ...

تحياتى و دايما خليكى مع الناس ... ركزى معاهم ... و تفاعلى ...هو ده التعليم الحقيقى .

شكرا لزيارتك ليا و الكلمتين الحلوين ....تحياتى

The Groom said...



ممكن تعملي حاجات كتير أكتر من مجرد النظر اليها بحسرة و التحسر عليها داخليا

أحد الأسباب القوية التي دفعتني لترك مصر هي أن أحقق ما يكفي من أحلامي خارجها عشان أرجع أغير فيها - وأول حاجة حعملها أني حدور على كل ست عجوزة زي كده و أحاول أغير حياتها

أو حياة أي طفل بريء مالوش ذنب غير أنه اتولد في الشارع

سلميلي على عمر وقوليله ميبطلشي يبتسم أبدا - اضحك الصورة تطلع حلوة

أتمنى ألا تزول الابتسامات مادام في الجسد قلب ينبض

سلاااااااام

تخاريف said...
This comment has been removed by the author.
تخاريف said...

Shower mirror..
النسا.....
انا بسميها النسا..اللعينه...

دى ليهاذكريات معايا....
هحكى عنها بس لما اخلص الامتحان الاول..ان شاء الله..
ادعولى...:)

تخاريف said...

The groom
اولا شكرا على زياره حضرتك العزيزة..
وان شاء الله ماتكونش الاخيره...

انا عارفه ان بأيدى اعمل لها حاجات كتير..

والنيه موجوده...
بس ايه الواقع..وايه اللى حصل ساعتها!!!...
انى مشيت وسبتها...
وبس...:)

ربنا يقدرنى بجد فعلا وماكتفيش بنظره الحسره ..
ليها ولكل الغلابه اللى زيها..
وعلى فكرة بقى اخويا ده..زى العسل..وبعتبره ابويا التانى..
ربنا يخلينى ليه يارب..
:D

dr-m said...

التأمل ..
أحيانا بيكون هواية جميلة مريحة أبسط حاجة بتقولي الحمدلله وأحيانا بيكون تفكير لا ارادي لاجبار الانسان علي التفاعل مع كل اللي حواليه وبيكون في الحالة دي شر لابد منه..
احيانا بنتمني نغير كل الاوضاع الغلط لكن فجأة بنتصدم برصيف الواقع زي اللي كانت نايمة عليه الست دي..

تخاريف said...
This comment has been removed by the author.
تخاريف said...

Dr-M
شكرا على الزياره..
:)

احنا ممكن نصطدم برصيف الواقع بس ..لازم يكون عندنا امل..يانشيل الرصيف ده..يا نعدى منه لللاحسن..
بس نخلى بالنا واحنا بنعدى..

:D