Saturday, March 31, 2007

انا والنساااااا 2

-سلام بقى يا عيال نتقابل بعد الراوند ان شاء الله..لما اخلص هرنلكم
نظرت الى الساعه انها الثانيه عشر وخمس دقائق..وكانت محاضرتى النسا والجراحه انتهت للتو..
وهنا مضيت وحدى فى الطريق..فصديقاتى كلهن توجهوا لمستشفى الجراحه ليبدأوا الراوند الجديد..
اما انا فاهلا بالنساااااااااا
:D
دخلت الى المستشفى وبمجرد دخولى سمعت صوت"اااااااااه هموت..ااااااااااااااااااه"
وكان صوتا شجيا له لحن و-تون -خاصه..وابتسمت..وانا اقول لها فى داخلى
"اطلعى من دول يابكاشه..
:D
صعدت على السلم وانا افكر..ماالذى اجبر هذه السيده -وغيرها طبعا
:)
مالذى اجبرها ان تتحمل كل هذه المعاناه طوال 9 اشهر..وان تتحمل كل هذه المخاطر اثناء الولاده..فقط لكى يخرج من احشائها هذه المولود الجديد..وتظن اناها بذلك قد ارتاحت..ولكنه يأتى ليحملها معاناه اكبر..سبحان الله فعلا..

استعنا ع الشقا بالله رددتها داخلى وابتسمت ابتسامه خفيفه وطرقت باب حجره الدرس
سلام عليكم
ادخلى يا دكتورة..من اول يوم متاخرين..
وهنا اختفت هذه الابتسامه وحل محلها ملامح الاسد عندما يود ان يفتك بفريسته
حضرتك المحاضره لسه خلصانه
امال زمايلك دول جم امتى؟؟
ماعرفش حضرتك يمكن ماحضروش المحاضره...
قلتها وانا ابحث عن مكان لاجلس فيها..فقط لاعطى الفرصه لنفسي بان اعد من 1 الى عشره كى لا ارد رد لا يليق..ولكى اعطيه هو ايضا فرصه للحياه
:D
طب لو سمحتوا بعد كده ماحدش يتأخر الراوند بيبدأ12 بالظبط..
يالها من الجمله الغبيه لا محل لها من اى اعراب.. عندها بدأت انا فى العد..1...2...3
واخذ الدكتور..يشرح ثم يشرح ثم يشرح الى ان جاء الى نقطه ال
HISTORY TAKING
او كيفيه سماع وتدوين شكوى المريضه
-يا جماعه زى مابناخد اسم اعيانه وعنوانها..لازم كمان ناخد رقم تليفونها وايميلها..
هنا نظرنا اليه تلك النظرة البلهاء..وانفجرنا من الضحك
ايميل ايه يا عم الحج ..صلى على النبى..هى العيانه دى لو عندها ايميل..كان ايه اللى هيجبها هنا...فى الدمرداش الكئيبه؟؟
قال ايميل قال..ده ناقص تقولنا لو ليها بلوج ناخد عنوانه عشان نبقى نبعتلها كومنتات...
عااااااااااااااااااااااااااااااااااا
وتوالت الايام..وفى كل يوم احاول ان اثبت لنفسي بان هذه الماده ليست "بالخنيقه"ولكن ..هيهاااااات..
كما قالها سعد زغلول فى اوائل القرن الماضى
"مااااافيش فايده"
وفى كل يوم تتعالى الصرخات والصويت_ولا اجدعها تصويت هنا..
:D
وفى كل مرة تطرب اذنى لسماع هذه السيمفونيات المتنوعه يتبادر نفس السؤال فى ذهنى.."ايوةيعنى انتو ايه اللى جابركو على كده؟؟؟


ولنا عوده ان شاء الله
قلت ماطولش عليكو المره دى ف البوست..
:)

معلش يا جروووم

استسمحك انى اقول انا فضفضه المرة دى

ناس مهيسه...وناس من الغلب مسأيه
ناس الحمل تاعبها...وناس محترفه أسيه
ناس بتروح مابترجعش ..وناس ف الدنيا منسيه
:)
هتعرفوا سر الفضفضه دى فى البوست اللى جاى
"حالات ..حالات"


ان شاء الله

:)
دمتم سالمين..
:)

Thursday, March 29, 2007

انا والنسااااااا...1

السلام عليكم يا اهل المدونا ت الكرام...
بما انى فضيت شويه بعد امتحان النسا اللعين..اللى من ابو خمسين.."خمسين درجه يعنى" قررت انى احكيلكم عن ذكرياتى مع
النسااااا..._اقصد ماده النسا والتوليد طبعا
هتقولولى واحنا مالنا يعنى..توجعى دماغنا ليه..هقولكم لاااااااااااااا..ده انتو هتقروه غصب عنكم...
:)
لا بجد عشان فعلا احس انى لسه قادره اتفاعل مع الناس..وانى ممكن يبقى فى فايده من اى حاجه ف اى حاجه انا بعملها...
فيلااااااا بينا نبتدى اولى حلقات...
"انا والنساااااا



حد ينزل بالتيترات.....
..........
13 يناير 2007
انه بومى الاول فى عامى الدراسي الجديد"سنه سته"ولعل سائل يسألنى"نعم...هو فى سنه دراسيه بتبتدى فى نص يناير؟؟؟؟
اما هذا فدعونى اقل له.."حضرتك احنا النظام عندنا فى هذه الكليه اللعينه ..غير ..غير يعنى
:(
السنه الدراسيه عندنا ممكن تتراوح مابين ال6 شهور وال13 شهر...فعقبال ما خلصنا سنه خامسه وخدنا شهرين اجازة ماهمش لازمه ..أبتدينا سنه سته ف نص يناير...
....
استيقظت فى السابعه الا الربع وكلى نشاط احسد عليه.
ياااه ده الكليه وحشتنى جدا..
كانت هذه هى صباح الخير التى قلتها لنفسي فى ذاك اليوم..
فحقيقه الاجازة ..مضت ولم يكن لها اى لون اة طعم او رائحه...وبالطبع لم يحاول احد ان يضف اليها اى نوع من مكسبات الطعم الاصطناعيه.._من اللى بتجيب السرطان..ماكنتش هتفرق معايا والله_
الا فى يوم النتيجه"نتيجه سنه خامسه"ففى هذا اليوم عدت لاتذوق طعم الامتياز من جديد...ولكنه لم يلبث ان ذاب هذا الطعم بعد حوالى قرابه ال36 ساعه
ارتديت ملابسي..ومضيت فى طريقى الى الكليه ..استرجع ذكريات السنه الماضيه..بحلوها ومرها..ولم يفيقنى الا هذا الصوت الذى استطعت ان اميز بسهوله انه صوت من النوع الظريف...

-ايوة
هالكارنيه يا انسه
لم اعط للرجل فرصه ان يكمل كلمته..ولعل كلمه"انسه"..

استفزتنى -ده مش لعل ..ده اكيد..:) -فرددت عليه بحده
كارنيه ايه..؟؟!انتو هتقرفونا من اولها..انا سنه سته جديد ولسه النهارده اول يوم...
..
ظهرت ملامح الفزع على الرجل واشاح بيده.."طب خلاص خلاص ..اتفضلى اتفضلى...
..
فمضيت وان اضحك فى داخلى.."قال انسه قال
:D
نظرت الى المدرج عاليا واخذت نفس عميق ومضيت بحطوات ثابته برأس مرفوع وظهر مفرود..وما هى الا خطوتين حتى قفز هذا الصوت الداخلى يداعبنى.."ايه ده..استنى استنى..انت قولتيله سنه كام يا حلوة..سنه سادسه..ايه ده يعنى انت بقالك ف الكليه المخروبه دى ست سنين..!!!
وحينها توقفت فى منتصف الطريق فى محاوله منى لان اراجع نفسي و"اركز"
لا ده طلع الموضوع بجد..وبحق وحقيقى..ايه ده سنه ساته...يعنى اخر سنه ف الكليه..يعنى اكبر ناس فى المنطقه دى..يعنى بكاررررللليوس...يعنى صبح صبح يا عم الحج...

وتولد داخلى احساس قوى بالسعاده..-بالظبط زى احساسى وانا راكبه
Top spin
فى دريم بارك وهى عماله تتطلع بينا لفوووووووووق...
ومضيت ف الطريق بخطواتى الثابته تلك فى محاوله لرسم صوره الفتاه الجاده..
:)

هى الساعه كام لو سمحتى؟؟ جاءنى هذا الصوت من جانبى...
-تمانيه الا تلت

وهنا تنبهت وعاد هذا الصوت الداخلى يداعبنى مرة اخرى...
ههههههه بالذمه مش عيب عليك..واحده ف سنك ده تنزل من بيتها ف الوقت ده وتيجى تحضر المحاضره
يابنتى انتى اللى قدك...زمانها بتحضر الفطار لجوزها...
وهنا رنت فى اذنى كلمه رجل الامن.."يااااااااا انسه.."كافلام السينما...
يا انسه ..يا انسه...سا انسه...
الى ان صعدت الى المدرج ودخلت..فلم يكن احد من اصدقائى قد جاء بعد..
فتوجهت بحركه لا اراديه الى مكاننا المعهود فى المدرج منذ العام الاول
نفس المكان..لم نغيره..الا لظروف قهريه -ان حد يجى يغلس ويسيب المدرج كله ويجى يقعد ف الصف ده..بنبقى عايزين ساعتها نكلوا
بسنانا..
ياله مكان عجيب..أخذت اتفحص زوايا المكان..التى اجبرتنا ان يكون هو مكاننا الاوحد فى هذه الاستاد الرهيب ..اقصد فى هذا المدرج العظيم..:)
وتذكرت بعض اللقطات من عامنا الاول ..وكيف كنا بحق..ونعم العياااااال..ولازلنا طبعا..
:)
وبالطبع لم يكن حبل اللقطات متصل..بل كان هناك كثير من االستوبات-جمع
stop
حوالى سبع مرات من زميلاتى العزيزات.
اهلا ازيك يا شيمو..
الحمد لله ازيك يا.....
ايه الاخبار باديه ايه
باديه نساااااااااا
يااااه ربنا يعينك..
كان هذا هو الحوار المتكرر ...


..الى ان جاء اصدقائي وجلسنا سويا كسابق عهدنا.."السته المرصوصين.."كما ادعوهم انا..
:)
وتعالت ضحكاتنا ونحن نتذكر كيف اصبح هذا الماكن عشره..:) بكسر العين..
الى ان جاء صوت جهورى هز المدرج...
بسم الله الرحمن الرحيم...يالااااااااااااااا كله يقعد ف مكانه....
وكانت هذه اولى كلمات فى اولى محاضرات النسااااااااااااااا
ولنا عوده ان شاء الله
:)

ٌ

Tuesday, March 27, 2007

!!صفحه..وعدت


صفحه 61
"يااالا بقى ربنا يسهل..هقعد اراجع ال
bleeding
بسم الله الرحمن الرحيم..
.................
بعد سطرين يدق جرس الباب..واسمع ذلك الحوار......

-"الدوام لله .. ام حمدى تعيشوا انتو...

اخترقت تلك الكلمات اذنى كالصاعقه!!!!...
"ايه.!!..معقول!....ام حمدى..البوابه بتاعتنا... ده احنا لسه باعتينها تجيب حاجات.!! انت متاكد يا بنى؟؟؟.. طب هى عربيه خبططتها وهى بتعدى..؟؟

لا دى هيه وهى واقفه قدام السوبر ماركت وقعت ع الارض..ماتت!!!!
...............................................................
وصله من البكاء استمرت حوالى نصف ساعه...
...
ثم بدأ التأمل
........يااااااااااااااه ده الواحد فعلا مايملكش ف نفسه حااجه...


لا اله الا الله

وبدأت اتذكر مواقفها معنا

وكيف تجمعت فيها كل معانى كلمه
"غلبااااااااااااااانه"
...................
ثم بدأ التفكير ف الموت
..........
هى فعلا ماتت...اه ماتت
مممممممم...يعنى طب ماتت ازاى...........
وهى ماشيه كده السر الاهى طلع ووقعت ع الارض
.....................
لا اله الا الله
........................
ايه ده ده الامتحان الشفوى
بعد بكره
....
طب هحاول اركز بقى شويه
................
مممممممممممممم
يعنى عشان اعرف ارد كويس والدكتور مايهزأنيش...
اصل انا عارفاهم بتوع النساا دول...لسانهم طويل
................!!
وعشان اجيب درجه حلوة ويبقى الواحد عمل اللى عليه.....
مممممممممممم
صح..............


بعد سطرين...
تؤ.....انا مش عارفه اركز خالص....
......
هحاول ماشدش نفسي
......يعنى انا لو لا قدر الله ماعرفتش اجاوب كويس ف الامتحان...
هيحصل ايه يعنى؟؟
ولا حاجه
........
هتضايق شويه......
وخلاص....
مممممممممممممممم


بعد 3 سطور
.........
طب يعنى هى ام حمدى ماتت كده وهى ماشيه ف الشارع........
كده يعنى!!!!!
..........
لا عربيه خبططتها ولا حاجه!!!!..........
اه سبحان الله....
طب ايه ده.؟؟؟؟..........
يعنى انا ممكن اموت دلوقتى؟؟؟؟؟؟..........
مممممم
.....................

طب لو مت ..هيبقى وضعى ايه؟؟؟
هقف ادام ربنا اقوله ايه...

هبقى من اهل اليمين.......ولا..........
..............
كل حاجه هتبقى شاهده عليا...

لا ينفع بقى هنا واسطه..ولا حاجه.........
.
وهنا انفجر ف البكاء...مره اخرى........


تدخل امى الى الغرفه......

"مالك يابنتى؟..معلش يا حبيبتى..ادعيلها ربنا يشملها برحمته...كلنا هنموت....
....................
نظرت اليها وانا اردد..."فعلا كلنا هنموت.....
.....
طب ايه ده؟؟.........
يعنى انت كمان يا امى..ممكن تموتى...؟؟؟

ده مش ممكن ........ده اكيييييييييييييييييييييييييييييييييييييييييدد

انتابتنى حاله من الخوف لم افصح عنها سوى ب
"ماما خدينى ف حضنك قوى"..........

تعالى يا حبيبتى ماتخافيش...


واخذت تقرأ بعض الايات وهى تمسح بيديها الرقيقه على صدرى ...

اقعدى يا حبيبتى ذاكرى ربنا معاك وانا هجيب الجرنان من بره واجى اقعد معاك...
...............


بعد ان هدأت قليلا...

امسكت بالكتاب مرة اخرى.......واخذت اقرأ...

ولكن من بين الحين والاخر..كنت اختلس النظر لامى...

فقط لاطمأن انها
حيه
!!!!!.

...............
بعد حوالى ساعتين....
امر من امام التليفزون
اسمع...
"
لا بد من المشاركه ..كى نستطيع ان نعبر المستقبل ونرسخ مبادئ الديمقراطيه..
"
استوقفتنى تلك الكلمات...
بل استفزتنى ...
"ياعم روووووووووووووح..ديمقراطيه ايه وعبور مستقبل ايه.. الست كانت ماشيه ف الشارع ماااااااااااااااااااااااتت لا شافتت ديمقراطيه..ولا هبولأليه.... ولا حتى لحقت تعبر المستقبل معاكووو"
ومضت تلك الليله العصيبه...
بعد ان صممت انا ان تنام امى الى جوارى وانا ممسكه بيديها...

داعيه ربى ان يديم عليها نعمه الصحه ..

وان لا يعذبنى فى الدنياا بفراقها
.....................
اللهم احسن خاتمتنا ..ولا تمتنا الا وانت رااااااااااااااااااض عنا
..................
الاحد
25-3-2007


Friday, March 23, 2007

تخريفه عاطفيه..!!


مها حضرتى السندوتشات يا حبيبتى-
ايوة يا حبيبى حاضر اهوه بشطف "عمر"..يا ابنى اقف عدل عشان اغسلك وشك كويس-
طب انا هسبقك ع المطبخ ..افتحلك العيش-
طب ربنا مايحرمنيش منك ابدا-
كانت الساعه تدق العاشره من صباح يوم الجمعه..يوم الجازة الرسميه او كما يسميه "ايهاب" يوم اللقاء العالمى..فهو اليوم الوحيد الذى يقضيه بأكمله مع زوجته"مها"وولديه"حازم" و"عمر"

-ها يا حبيبى وصلت لحد فين؟؟- قالتها مها بنبره ساخره
-ايوة مانا بشتغل اهوه بايدي وسنانى
نظرت اليه مها نظرة باسمه بعينين تملؤها كل معانى الحب والدفء
-انت هتفضلى باصالى كده كتير...شوفى شغلك ياالا ياهانم

قالها ايهاب وهم بان يخرج من المطبخ ولكن سرعان ماعاد وطبع تلك القبله الحانيه على خدها ..هامسا فى اذنها.
بحبك...
...........................................................................
-"حازم "امسك ايد بابا يا حبيبي..وانت يا عمر تعالى هنا...
-يابنى استنى لما العربيه تعدى وبعدين ابقى افتح الباب
ادخلوا يالااااااااااااا
قفز "حازم " وعمر" الى داخل العربه وهما يتبادلان الضحكات..وجلست مها كعادتها دائما الى جوار "ايهاب"
-ها يا ولاد عايزين تروحوا فين النهارده؟؟؟
قاطعها ايهاب قائلا..
بصوا بقى انا نفسي اروح حديقه الطفل من زمان ماروحنتهاش يا عيال..
فضحك عمر وحازم..قائلين..
"ماشى يا سي بابااااا"
وهنا انطلق ايهاب بالسياره صارخا صرخه الانتصار..

هيييييييييييييييييييييييييييييييييييييييييه
..................................................................
-ماتروحوش بعيد يا ولاد.."حازم"خلى بالك من اخوك..
-حاضر يا ماما..
-ياسيتى سيبيهم يلعبوا ..طول الاسبوع ما بيخرجوش..سيبيهم ينطلقوا شويه.. خلينا احنا كمان ننطلق..
ضحكه مها ضحكتها الشقيه قائله.."
-وماله يا خويا ننطلق. ..

وهنا ينظر اليها ايهاب نظرة حانيه ويمرر اصابعه بين اصابعها..كى يتحسس ذلك الخاتم العجيب "الدبله"
..او كما تسميه مها..
"الرابط العجيب"..
-فاكرة يا مها اول يوم شفتك فيه
....
-اول يوم ..اول يوم..لا مش فاكرة
..
-ايه ده معقول يا مها لحقتى تنسي؟؟؟
نظرت اليه مها وهى تضع كفها الاخر بين يديه
-
لا طبعا يا حبيبى هو انا اقدر انسي..
-ايوة انا قولت مش معقول تكونى نسيتى..دول يا دوب تسع سنين بس... فاكرة ساعتها انا كنت عندكم ف البيت..وشفتك لأول مره وانت جايبه صنيه القهوه وبتقدميها لى انا وماما...
-فاكرة يا خويا لما ساعتها قلتلك اتفضل القهوه...رحت انت باصصلى وقايلى..بس انا مابشربش قهوه
ساعتها مش قادرة اقولك يا ايهاب..ماكنتش قادرة امسك نفسي..كنت هفطس على نفسي من الضحك!!...
-هههههههه...راحت ماما بعد كده قالت لك حطى يا حبيبتى الصنيه هنا..احنا مش جايين نشرب قهوه ..احنا جايين نشرب شرباات ....
رحت انا ساعتها بصت لك كده..مش قادر اقولك يا مها ساعتها حسيت براحه قد ايه..حسيت انى اعرفك من زمان...حسيت ان بنا عشره كده.. انك منى...
...
-ربنا يخليك ليا اي حبيبى وما يحرمنيش منك ابدا
..
-طب وانت يا مها حسيتى بايه؟؟؟
..
- انا ...ولا حاجه
-لا بجد يا مها
- مهو بجد اهوه...حسيت بولا حاجه..كنت بس عايزة االارض تتشق وتبلعنى من كتر ما انت عمال تبصلى
...
وهنا ياتى "حازم"وعمر"ومعهم طفله اخرى...
-ماما عايزين سندوتشات
....
-حاضر يا حبيبى
-وانت اسمك ايه يا قمر
..
-اانا اسمى "مها"
نظرت اليها مها ضاحكه...
"الله اسمك حلو اوى يا مها...ههههه
خدى يا حبيبتى السندوتش ده ..بس اوعى ياكلوه منك
...
"يا مهااااااااااااااااااااااااااااااااااااااااااااااا"
"ايوة يا بابا انا هنا..
قترب منهم صاحب النداء..

-
مش معقول...ده حازم ..قالتها مها بصوت خافت
اخذ حازم يقترب اكثر..
-سلامو عليكو
رد ايهاب-
وعليكم السلام
-معلش البنت عملتلكم ازعاج
...
قالها "حازم"وعينيه عالقه على مها..نعم انها هى..مها ..حبه الاول..ياااااااه بعد السنين دى كلها..
رد ايهاب
لا ابدا خليها حضرتك تلعب مع الاولاد..
لم يرد حازم فقد كان سارحا فى الماضى
اكثر من عشر سنوات مرت منذ اخر مرة التقت عيناه بعينيها..كان ذلك فى حفله التخرج من الجامعه..انه يتذكر هذا اليوم جيدا..
فقد كانت فى كامل اناقتها المعهوده..وكان وجهها يشع نورا..ولكن كان فى عينيها سؤال حائر..وقلق غريب..لم يستطع تفسيره
عشر سنوات مرت ولكنه لم يستطع ان ينسي ذلك الوجه الملائكى ..الذى كان عالقا فى ذهنه..دائما ..وحال الايام بينه وبينها..

ومضت مها هى الاخرى تسترجع تلك الذكرى ..تذكرت اول يوم وقعت عيناه عليه..فى الجامعه..وكيف كان حبها له صامتا طوال سنوات الجامعه..وبدأ يتسلل اليها ذلك الشعور
انه
"حلاوه الذكرى"
الا ان اصابع زوجها التى تتحسس يديها افاقتها..
فاسرعت قائله..
-ماتقلقش عليها حضرتك
قالتها مها بصوت متحشرج..كى تكسر هذا الصمت ولتفيق"حازم"وتعيده الى الواقع من جديد...
-نعم؟؟؟
قالها "حازم"فهو لم ينتبه الى ما قالته مها..انها المرة الاولى التى يسمع فيها صوتها...
وهنا رد ايهاب
سيبها حضرتك تلعب هنا مع الاولاد ..ماتقلقش عليها..
-اه طب خلاص خليك يا مها ..العبى مع اصحابك ولما تخلصى ابقى تعاليلنا..هتعرفى ترجعى...؟؟
-
ماتقلقش يا عمو..انا عارف انتو قاعدين فين وهرجعها..
ابتسم حازم ومد يده يمسح على راس الطفل قائلا"
وانت اسمك ايه يا حبيبى؟؟
-اسمى حازم
...
فابتسم"حازم الكبير"ومضى عائدا الى زوجته
....
فسألته..-
هى مها فين؟؟؟
فرد باسما..
مع حازم..

شيماء
23-3-2007....
...................................................................................................................................................................
ويبقى فى حياتنا دوما..طيف الحب الأول..او وهم الحب الاول..._سموه براحتكو:)_فقط ليذيقنا معنى
حلاوة الذكرى

:)
بس خلاص

Monday, March 19, 2007

وجوه منتصف الليل


انظر الى الساعه ..انها الثانيه عشر الا عشر دقائق قبل منتصف الليل...
اطلق زفره حادة..حاره...
-"يااااااااه ده الدرس كان طويل قوى النهارده ...انا مش عارفه النسا دى الواحد يعمل فيها ايه؟؟

اقولها فى سري مع بعض علامات الزهق والارف على وجهى...

اخرج من باب المركز ..لاجد اخى ينتظرنى ..

امضى اليه بخطوات مثقله...

ووجه ينم على انه لم يكن درسا..بل كانت"علقه"

-"سلام عليكو...ازيك يا عمر..ايه الاخبار.. انت واقف من بدرى..؟؟

-الحمد لله يا حبيبتى..لا من عشر دقايق كده...

-معلش اصل الدكتور اتأخر معانا النهارده...

-ولا يهمك يا بنتى ..

هذا هو السيناريو الدائم لاايام الاحد والثلاثاء والاربعاء...

ملل....

ولكن لربما هناك شئ يكسر هذا الملل الرهيب ...


انه الطريــــــــــــــــــــــــــــــــــــــــق..


كم جميل ان تطلع الى وجوه الناس فى منتصف الليل...
: )
ويظل السؤال يلح على كلما تقع عيناي على وجوه منتصف الليل..

"انتو ليه مش فى بيوتكم..؟؟بتعملوا ايه فا لشارع لحد 12 بالليل؟؟"

هذا السؤال ليس استنكار ولا استخفاف...انه فضول حقيقى...

"ببقى نفسي اوقفهم واقولهم...انا كنت ف درس النسا..انتو بقى بتعملوا ايه..؟؟
...............
تستوقفنى بعض الوجوه ..شاب وشابه على الرصيف...

منتظرين ان يتوقف سيل العربات حتى يتمكنوا من عبور الشارع...

يمسك بيدها....ويحاول ان يعبر بها ...

لكم شعرت بدفْ حقيقى .. وتمنيت ان اوقف العربه لاقول له

.."خلى بالك منها."..
:)

.........................

-"يادى الميكروباصات..يابنى اقف على جنب يابنى..."

كان هذا صوت اخى وهو يوبخ احد سائقى الميكروباصات...

نظر اليه االسائق وقال له

-"معلش يا بيه.."

نظرت اليه..وتعجبت حقيقه من هذا الذوق الغير معهود من هذه الفئه..
:D

وتعجبت اكثر لصغر سنه...

فهيئته توحى انه لم يكمل العشرين بعد...
....

اما هذا فلم يكن بحاجه الى ان اسأله سؤالى..فلقد كانت الاجابه واضحه من نبره صوته..

"اكل العيــــــــــــــــــــــــــــش"
........................................


"يييييييييييه"
قلتها فى استنكار...

"هما العيال دول مالهومش اهل..."

كان المنظر يوحى بالاشمئزاز...مجموعه من العربات الفاخره المتراصه ..

بابواب مفتوحه..

يجلس عليها مجموعات من الشباب...

عند كشك صغير "المفروض انه كشك حاجات حلوة..."
وتجد الصيحات المتعاليه والضحكات المنفره.

.... الى تجبر لسانك ان يردد

"كاتكو الارف..."
.......................................................

-"ايه ده..معقول....؟؟"
اقولها فى ذهول......

-"ايه يا بنتى فى ايه؟؟

"شايف يا عمر..الست دى...دى ايه بتبات ف الشارع كده؟؟؟

"اه يابنتى انت اول مرة تشوفيها ولا ايه؟؟

اه...طب هى مالهاش بيت..؟؟؟


نظر الي اخى نظرة تدل على غباء السؤال..

-"ماهى لو كان ليها بيت كانت باتت فيه يا ذكيه...."


اجبرتنا حركه السيارات ان نقتر ب منها اكثر...

انها تجلس على الرصيف سانده رأسها على صورعريض...

وبجوارها وابوور الجاز ..


-"طب ما تستنى يا بنى لما نشوفها..."

كنت على وشك انا انطقها...لو لا اننى تخيلت بقيت الحوار...
:D
-
-
تشوفى مين.
.

-"الست دى يا بنى مش يمكن عايزة حاجه...


ونشوفها هى بايته ف الشارع ليه فى البرد ده..يمكن نقدر نساعدها..."

وتخيلت اخى بنظرته المعهوده..._والله دى احلى حاجه فيه
:D_

تخيلته .."يابنتى روحى نامى ولا ذاكرى...ولا شوفى هتعملى ايه..."

فآثرت الصمت ..واكتفيت بابتسامه خيبه الامل....


وظلت صورتها بهيئتها الرثه تلك عالقه فى بالى...حتى ......


غرقت انا ايضا فى السبات العميق..بعد ان اقنعت نفسي...

بانى فعلا .."ورايا كليه وبلاوى تانيه الصبح.."
: (
واخذت عهد على نفسي ان اتحسر عليها كلما نمر بها وهى جالسه فى مكانها المعهود
.

!!!
..............

Wednesday, March 14, 2007

القالك حد


إلقالك حد...لو ضاقت بيك..يفتح لك قلب...
يبقالك صحبه وأهل وبيت...يناديك لو أنت ف يوم ضليت..
ويشوفك لو ع الخلق دريت..ويحسك رغم البين والبعد...
والقالك حد...

إلقالك حلم من الأحلام..ماتسيبش سنينك للأوهام...
ده الدنيا مابين افراح وآلام..
والشوك ف سنين يطرح لك ورد...
والقالك حد...

إلقالك قلب يحن إليك..وحبيب يشتاق ويروح يراضيك..
لو طالت فى الايام لياليك..يبقالك فجر وشمس وبدر...

فجر وشمس وبدر...
القالك حد...





بقالى فترة حاسه احساس غريب..حاسه ان ماحدش شايفنى كويس...
حتى اقرب الناس ليا...مش شايفنى اسااسا..
فافتكرت الكلمات دى...

بس يااالا معلش..كله بيطلع ف الغسيل..
!!!!!!!!!!!
ومسيرهم ف يوم يشوفوا...
:D

Friday, March 9, 2007

يومى الاول بعد عامى الثانى والعشرين..


وياله من يوم..
:)

المفروض ان النهارده يوم ميلادى....
الحمد لله قفلت 22 بالتمام والكمال....

يااااااااه ده انا عايشه من زمان اوى..22؟؟
بس الصراحه السنه اللى فاتت دى اثرت فيا جدا..فعلا اتعلمت فيها حاجات كتير..ابتديت حاجات جوايا ترجع تانى بعد ماكنت فقدت الامل فى رجوعها....
نظرتى اختلفت جدا للى حواليا..ابتديت ابص لهم بنظرة اعمق شويه ..واخده كل جوانبهم...
يعنى عيوبهم ووميزاتهم وابتديت اجدولهم..:) واشوف الجدول نظامه ايه...
وكان طبعا اول من جدولتهم....نفسي....
وعلمت علامه صح على اللى ممكن يتغير...
وقلت هشوف هنجح ولا..........
فى حاجات نجحت ...وفى حاجات فى طريقها...بس للاسف فى حاجات لسه محلك سر فيها...........

ومن ملاحظاتى للجداول دى...
لقيت ان الوحيده اللى تعتبر خرجت من الجدول ده ..ناجحه صافى..:)..هى

"أمى"

فاقدر اقول انها بطيبتها وحنانها اللى يفوق الحد..تقدر تخليك غصب عنك ..من جواك..تسمع كلامها وتقتنع بيبه انه هو ده الصح..
من غير بقى فرض رأى ولا صوت عالى...

بنظرتها اللى كلها حب ولمستها اللى كلها دفْ تقدر تحتويك مهما كان الموقف..ومهما كنت غضبان.....
باهتمامها بيك تخليك غصب عنك تتعلم منها معنى العطاء اللى بجد وبحق وحقيقى يعنى....

لذا وفى هذا اليوم السعيد..:) ومن هذا المنبر اقولها عااااااااااااااااااالياااا.."احبك يا أمى..."احبك حب يفوق كل الحدود...
فأنت "أم" بحق.........
......................................................................................................
وخلال السنه اللى فاتت من عمرى دى برضه...

ابتديت اتأمل كده واخد بالى من حاجه مهمه جدا
انى بشوف ناس كل يوم..هى هى نفس الناس...فى الشارع ...
فى الكليه.. واحيانا هما هما نفس الناس ف المينى باص..
:)
منهم اللى رؤيتى لهم بتمثل شئ مهم فى حياتى..يعنى اتعودت عليهم ...ولما مش بشوفهم بحس ان اليوم فى حاجه ناقصه..
ودول اصحابى...
ومنهم اللى مايفرقوش معايا حاجه...
عادى....

بس بقى لقيت كده ان اللى انا عايزاهم يبقوا قريبين منى على طول..
فى كل وقت وكل مكان بعاااااااااااااااااااااااااااااااااااااد جدا عنى...
أختى...مثلا ..مسافره ...بحتاجلها كتيييييييييييييييييييير..
كل يوم مثلا لما اجى انام احس ان البيت ناقصه حاجه.......
بس مين عارف مش يمكن بعدها ده هو اللى زادها غلاوة ف قلبى......


وفى ناس برضه يمكن شفتهم ف حياتى مرة او مرتين..
.بس يااااااه اثروا فيا قد ايه...يمكن من غير ماهما يعرفوا...بس هو ده اللى حصل...
بامشي ادور عليهم بين وشوش الناس وساعات سبحان الله بلاقيهم.."حصلت والله وقابلت اخت عزيزه عليا مرتين بالطريقه دى..""بحبك اوى يا فرح...او يا جهاد..:)
:)

ففعلا بقى لو حد يقولى لخصى السنه اللى فاتت من عمرك دى فى كلمه اقول....
"اللقااااااااااااااا نصيييييييييييييييييييييب"
:)


ولنا عوده مره اخرى....مادام ف العمر بقيه...
وكل سنه وانا طيبه...
2007-3-10
:)

Tuesday, March 6, 2007

لون حياتك.....

يا من تدعى بأن الدنيا اصبحت سوداء فى وجهك..حاول انت ان تلونها باللون الذى تريد...
لا تسمح لأحد ان يتحكم فى لون حياتك..لا يهم بأى لون يراها هو..المهم هو بأى لون تحبها انت...
....فتلك هى حياتك انت..لحظاتك انت.. تمر من عمرك..انت...انت من سيحاسب عليها

فلا تدع الاخرين يتحكمون فيها بهذه السهوله....
اعرف انه قد مر بك الكثير...اعرف انه طالما تمنيت ان تجد نفسك شخص متبلد المشاعر حتى لا تشعر بكل هذا الالم وكل هذه الضغوط...
اعرف كم تمنيت ان تلقى بحساسيتك ورقتك فى اقرب سله مهملات..مع انك على يقين بانها هى الشئ ولربما الوحيد الذى يميزك عن من حولك فى هذا الزمان....

اعرف بانه قد مرت عليك تلك الحظات..لحظات مبكيه مضحكه..نعم...تبكى وتبكى الدموع دموعا..ولكن كى لا ترى عينيك المنكسره ..اى نظرة شفقه..تجد نفسك سريعا تضحك وتضحك بل تعلو بصوت ضحكك...عاليا حتى يغطى على نحيب قلبك....
اعرف تلك الحظه التى تجد نفسك فى امس الحاجه ليد رقيقه تمسح دمعتك برفق..فلا تجد الا هذا اللسان السليط...
اعرف تلك اللحظه التى يكون صمتك فيها رااايه تعلن بها ضعفك امام الجميع..وتسمعهم باذنك يرددون انهم لا يحتاجون لتلك الرايه العريضه..ليعرفوا انك ضعيف..فهذا شئ مألوف..!!
..
اعرف ذلك الاحساس بان حيااتك قد ضاقت بك...
وانت واقف فى منتصف الطريق ..تتلفت فى خوف ..تبحث عن شعاع نور يأتى لينجدك ..وتلتجأ اليه...

اعرف كل هذه اللحظات...اعرفها جيدا..ولأننى اعرفها..دعنى اقل لك..وبأعلى صوت.."
لون حياتك..بلونك المفضل..ولا تجعل تلك الرتوش السوداء تغطى على لوحه حياتك..بل حاول ان تلون هذه الرتوش ايضا..
واعلم بان الله هو احكم الحاكمين..امرك كله خير بين يدى الله فتوكل على الله ..وعش لحظات سعادتك..عشها بحق...استمتع بدفئها
..وتذكرها جيدا..لعلها تؤنس وحدتك..عندما ينفض من حولك...


انا كتبت الخاطرة دى يعنى فى غفله من الزمن... :D
كتبتها من دماغى على الكمبيوتر على طول..من غير ورقه وقلم ولا اى حاجه...
بس فعلا ...بفتكر كلمتها كتير اوى.. وبصحى كل يوم ..ببقى عايزة الون الدنيا كلها "فوشياااااااااااااااااا"

انتو كمان ..لونوا حياتكو...
:)

Saturday, March 3, 2007

الأولة... باسم الله.....

السلام عليكم ورحمه الله يا اهل المدونات الكرام...

يمكن دى فعلا اول مدونه اعملها واقرر انى اهتم بيها واواظب انى اكتب فيها...نظرا لان المدونات السابقه اصبحت فى طى النسيان..يالااااا ماعلينا

نبدا اولا بالتعارف..
انا طالبه فى اااااااااااااااخر سنه فى كليه الطب.."وما ادراكم وما كليه الطب"حيث الهدوووووء الذى لا يشوبه الا صوتين لا ثالث لهم.."اما ...يااااالهواااااااااااااااااااااااااااى...يا حبيبىىىىىىىى...ماكنش يومك يا خويااااااااا.."
او
صوت خناقه..بين بتوع الامن والمرضى او زوار المرضى...
لا بس الحمد لله لما ابتديت اروح مستشفى النسا ..سمعت زغاريد 3 مرات...وساعتها كلنا هيصنا وكأن فى انقلاب او ان الناس دى جايه ف المكان الغلط...

اما الهواء النقى فحدث ولا حرج.. قبل مادخل الكليه المخجله دى كنت لما بسمع حد يقول المقوله دى"انا مش بطيق ريحه المستشفيات"
كنت ابصلهم باستغراب شديد.."هى المستشفيات ليها ريحه..؟؟؟"
اما الان فعرفت الحقيقه المرة...اقصد الريحه المرة..التى هى مزيج من رائحه اكل العيانين..مع نفحات من روائح اخرى لا داعى لذكرها ..

الحمد لله فاضل سنه وسنه امتياز كمان ونخرج الى الشارع...من حيث اتينا...وكأنك يا ابو زيد ماغزيت...

ولنا بقيه مادام ف العمر بقيه...