Saturday, August 2, 2008

شكرا على الازعاج


اتطلع الى الافيش..لطيف..وجه احمد حلمى يشعرنى بالراحه...
-يالا نتوكل على الله ونحجز....؟؟؟

يتسأل اخى فى خبث...فهو يعرف اننى لست من ارباب السينمات..

-يرد ابنه:بابا..هو ده فيلم "كركر"؟؟؟

-لا ياحبيبى كركر خلص خلاص...ده فيلم جديد..


-بس انا عايز كركر..!!!
ترد والدته فى حزم.."اللى هى مرات اخويا"

-احنا هنبتديها بالزن..لما نروح ابقى شوفه على الكومبيوتر..للمره السبعين!!!!!

جلسنا وانا على اتم الاستعداد ان ازيح جو الكآبه..و
القفش ليفارقنى ولو فى الظلام لمده ساعتين فقطface
!!!!!

تمر ربع ساعه من الفيلم...

هو مافيش فلم تانى غير فيلم تانى غير ده يا شوشو؟؟؟

يتسأل ابن اخى وكله امل...

ولكن تاتى اجبتى مخيبه لكل اماله...لأا ياحبيبى...

طب انا هنام بقى...

انفجرت فى الضحك..
ينظر اخى الى فى استغراب شديد..وكأنى عملت عمله....مع ان المفترض ان الفيلم كومدى..واحتمال الضحك وارد يعنى...

!!

اكملت الفيلم...فى ملل..تؤ..انا عايزه اضحك بقى..!!!

الى ان جاء المستر سيين بلغه اهل السينما..وهنا بدات اشرد...
وافكر...

وجاء صوت شيرين يدغدغ مشاعرى...

"تعمل ايه لو نمت يوم وصحيت..ولقيت
اقرب ماليك فى الدنيا مش حواليك..!!!!

يالهوى...!!

هعمل ايه؟؟؟

وهنا انفجرت فى البكاء...وعلا صوتى...


ينظر الى اخى وزوجته...وهما يكتمان ضحكتهما...

اخيرا لقينا حاجه نضحك عليها
!!!

لم اهتم بغلاستهما...

وظللت افكر...

ينتهى الفيلم...

يسألنى اخى ببلاهه وهو يزيل اثر المنديل من على عيني:بس الفيلم جامد..اتبصتى؟؟؟
ارد بقوة..:جداااااااااااااااااااااااا..

عدنا وانا افكر...

والى الان افكر....


هتعمل ايه لو نمت يوم وصحيت ..ولقيت ..اقرب ماليك فى الدنيا مش حواليك؟؟؟
بتهيألى هتخاف تنام!!!!

N.B.

اظرف حاجه انك تبقى داخل فيلم كوميدي...وتخرج منه اكأب مما دخلت...
!!!!


انا مارضيتش احرق الفيلم..للى عايز يدخله..

بس يخلي باله انه مش هيضحك...


!!

10 comments:

كراكيب said...

شيماااء
الفيلم فعلا راااائع وفظييييع جدا
وفعلا محدش مصدق انك تبقى داخل فيلم لأحمد حلمي علشان تضحك يقوم معيط
الفيلم من اروع الافلام اللي شوفتها بجد
وكويس اوي انك ماحرقتيش الاحداث علشان الناس اللي مش دخلته

انا اول مرة ادخل البلوج بتاعتك
هخرج اتفرج عليها بقى
واديني اهو اول كومنت كمان;)

miro el niro kwaniro

Desert cat said...

طيب الحمد لله انك عملتى تنويه اصلى كنت ناوية ادخل اعوض سخافة كبارية
لكن مالها الحكايات

Anonymous said...

السلام عليكم يا شوشو

تصدقي فعلا حاجة تخوف ان الواحد يحاول مجرد محاولة يفكر فيها

اصحى الاقي الناس اللي بحبهم مش حواليا

يارب ماتكتبها على حد ابدا

وان شاء الله الفيلم الجاي يبقى احسن

(f)

عتبة واحد said...

الفيلم ده روعة انا دحلته اكتر من ست مرات


بس الحمد لله انى الناس عجابها الفيلم زى

wanna b a physician said...

هى دى مشكلة اللى دخل الفيلم وهو مش عارف انه مش كوميدى
بس فعلا لو الواحد هيصحى من النوم يلاقى اقرب ماليه مش حواليه ممكن اقرب ماليه ده يكون فرد ناس كتير بس اى كان
يمكن يكون حصل معايا شبه كدا بس اكيد مش زى حلمى فى الفيلم فاهمانى طبعا عشان مش نحرق الفيلم
اه نسيت اقولك الفيلم متاخد من قصة اجنبيية بتاعت فيلم beautiful mind
تحياتى وكل سنة وانتى طيبة

صباح الصباح said...

هوة كل النقاد بيشكروا اوى فى الفيلم
وعموما حلمى ممثل اثبت انة بجد استاذ
مع انى فى الاول لما كان بيثل مش كنت باطيقة!!
بس من ساعة ميدو مشاكل بقى عاجبنى اوى
وبعدين يا ستى مين معاة فلوس دلوقتى يروح سينما
دى بقت ب 30 جنية!!!

Gihad N. Sohsah said...

ممممممممممممممممم

ما عليييييييييينا


اعتقد ان لو دة حصللي
هنام ومش هصحى تاني

وبسسسسسسس

دينا فهمي said...

الجملة اللي لفتت نظرك في الأغنية هي اللي خلتني أدمع بردو
بس ماعيطتش عشان منظري قدام عمرو ((:

بس بجد مؤلمة جدااااااااااا

البت المشمشية حلوة بس شقية said...

شوشو الفيلم جامد جداااااااااااا انا لحد نص الفيلم قولت ايه الفيلم الرخم ده وبعد كدة اكتشفت انو قصة بجد اسمك على اسمى ياريت تنورى مدونتى المتواضعه هستنا زيارتك

aynzan said...

As this is written in Arabic, I dont understand whats written, but I liked the photos you 've posted here

www.aynzan.blogspot.com