Friday, November 16, 2007

كارهين نفسنا..






امبارح قريت كام بوست كده عن ظابط الشرطه الشرير اللى ضرب مواطن وهتك عرضه ...

اتحكم عليه بكام سنه سجن...تلاته تقريبا.حاجه كده يعنى...

والناس بقى فرحانه ومبسوطه..وكل واحد بيرد

وبيعبر عن كرهه العميق لظباط الشرطه..عشان هما بتوع الحكومه..

واللى يشتم..شتيمه مودرن...واللى يشتم شتيمه جامده...واللى يقولك عشان يتربوا..!!!

ماشي..اوك..هو يستاهل السجن واكتر..

بس يعنى لاهو اول ولا اخرضابط يضرب واحد لمجرد انه دخله القسم..!!

دى أ..ب...ظابط شرطه..!!

الحاجات دى بيتعلموها فى الكليه ..

امال هيقرروا الناس ازاى..ويخلوهم يعترفوا..بباكو شيكولاته وربع جنيه لبان؟؟
!!!

لا عماد الكبير اول ولا اخر واحد هيضرب..

ومش هو ده اللى شغلنى الصراحه..

اللى شغلنى وخلانى افكر واتأزم بجد...

كميه الكره لظباط الشرطه...!!!

وبعدين قلت لا..ظباط الشرطه مش هما بس الفئه المفتريه المكروهه من الناس..
!!!
الدكاتره اكيد برضه مكروهيين..لأنهم ..جزاريين..وبيمصوا دم الناس الغلابه..

ومغليين عالاخر..!!!

المدرسيين طبعا مكروهيين..لانهم بتوع الدروس الخصوصيه..وما ادراك ما فلوس الدروس الخصوصيه..!!


المسئوليين طبعا..طبعا مكروهيين....لانهم تنابله..سايبيين عيالنا تسافر بره يغرقوا..

وهما مقضينها مارينا صيف..شتااا...
!!!

بتوع الجيش كمان مكروهيين..اصلهم واكلينها والعه اوى..!!!!


رجال الدين..بقى يعنى مكروهييين على الاخر...لان كل واحد نمن الناس عايز شيخ على مقاسه...

!!!!

بتوع الميكروباصات ..مكروهين ..لانهم بيمشوا يبرطعوا فى الشوراع..

!!!

السباكيين مكروهيين..لانهم بيستعبطوا ع الاخر..وكل يوم يجوا يصلحوا الحنفيات وبرضه مافيش ميه..

!!!


بتوع الفجل ..مكروهين..من هنا للصبح..لانهم بيبيعوا الربطه بخمسيين قرش

!!!!!

وبجمع السابق ذكره نجد اننا
شعب كــــــــــــــــــــاره نفسه اسااسا...

وماله..

كفايه علينا حب الفنانيين والرقصات ولعيبه الكورة..
!!!!!

38 comments:

علا من غزة said...


أول تعليق :))

فعلا اشي عجيب .. وجدير بالملاحظة

فيه فئات كتير من الناس مكروهين تلقائيا ..
اظن ان السبب في كدة هو التعميم .. وهو الحل بردو لتقليل شحنات الكره من الجو
يعني المفروض ان احنا نبطل تعميم الغلط على كل افراد الفئة المعينة
.. وإلا حنلاقي مثلا في ناس بتكره كل المدونين علشان في ناس معينة منهم مثلا بيشتموا او لسانهم طويل :)
وهكذا

انا متابعاكي من زمان على فكرة .. بس يمكن هادي اول مرة بكتب تعليق

تحياتي :)

يا مراكبي said...

عندك حق .. إحنا شعب كاره نفسه .. ده حتى ممكن المصري يحب الخليجي والأجنبي ويعاملهم معاملة طيبة لكن ما يعملش كده مع المصري اللي زيه أبدا

وبره مصر إحنا مشهورين بكده .. بنأسفن بعض وما نخدمش بعض .. والكل عارف عننا كده .. مش سر يعني

المهم .. أنا أخدت بالي إن البوست بيقول إن المهندسين مش مكروهين والحمد لله

:-D

كلبوزة لكن سمباتيك said...

انا حاسة اني حاخد بوكس في اخر البوست او شلوت بعد ما اكتب الكومنت ده
مالك يا بنتي بتخانقي دبان وشك ليه
ابدا احنا شعب عسول خالص
مشفتيش مظاهرة الحب اللي عملناها علشان تامر حسني لما طلع من السجن؟

و الزملكاوية الوحشين اللي كانوا طايرين بالريس لما حضر الماتش الاخراني


اه تصدقي فعلا
احنا شعب كاره نفسه


تحياتي

Eric Matt said...


مين قال

دولا المهندسين كمان مكروهين

حتى اسالوا المقاولين

بس برضو الحمدلله اني مش مهندس

تحياتي يا دكتورة من ماناساس البلد واديني رجعت تاني الحمدلله

الـسـيـدة نـون said...

انا هتكلم عن نفسى يا شيمو
اه انا بكره ضباط الشرطة وبكره الدكاترة وبكره المدرسين وبكره سواقين الميكروبصات وبكره وبكره وبكره
بس انا مش بكره اى ضابط شرطة انا بكره ضابط الشرطة المفترى الظالم
مش بكره اى دكتور
بكره الدكتور المهمل اللى ممكن بسبب اهماله تحصل حالة وفاة لحد غالى عندى
مش بكره اى مدرس
لكن بكره المدرس اللى بيبخل بعلمه على التلميذ علشان قرش زيادة هياخده من الدروس
مش بكره كل سواقين الميكروباصات
لكن بكره سواق الميكروباص اللى خبط مروة صاحبتى قدام عنيا وجرى يوم 2 ديسمبر سنة 1998 ورجعت لاهلها جثة

انا بكره الظلم فى جميع اشكاله اذا كان الظلم ده متمثل فى ضابط ولا مدرس ولا دكتور ولا اى مسئول ولا اى انسان
انا بكره الظلم يا شيماء

Shower-Mirror said...

و بتوع البنوك كمان وحياتك مكروهين

:)

احنا اللى بنسلف الناس الفلوس عشان تهرب بيها بره البلد

اوعى تنسى ....

:)


تحياتى يا شيمو للمره الالف ...بوست تحفه كالعاده

عمرو فكرى said...

:D

Soooo said...

انا كرهتك اصلا

انا بهزر عشان ماتكرهينيش

الحكايه ببساطه اننا كشعب ما اتكاتفناش جنب بعض ومع بعض في اي حاجه
اللهم الا في كأس الامم الافريقيه بس
غير كده مافيش
وده لاننا ماتزرعش فينا الانتماء للوطن صح
لو ده اتزرع فينا بجد وباخلاص .. اقسملك بالله العظيم انك ساعتها ماكنتيش هتشوفي حرامي واحد عشان الظباط يبلطجو عالناس على حسو
ولا كنتي هتلاقي طالب فاشل يفكر ياخد درس خصوصي لان المدرس مش هيديلو حق اكتر من حقه في الوطن .. ولان اصلا الطلبه كانو هيبقو مجتهدين عشان وطنهم
وقيسي على كده كل المجالات

وعلى فكره .. الانتماء والوطنيه مش بالاغاني والشعارات .. لا .. بتعليم الناس يعني ايه كلمة وطن



سلاموووووز

الـسـيـدة نـون said...

انتى فين يا شيمو
غايبة علينا ليه

محمد العدوي said...

تمام .

احنا فعلا كارهين نفسنا ..

جميلة هذه النظرة

كل الود

تخاريف خاصه! said...

علا من غزة...

صح هو السبب التعميم..الناس بتتلك لبعض اصلا..!!!


ربنا يكرمك..ده شرف ليااا...

:)


يا مراكبى...

:D

احمد ربنا يابشمهندس...

منورنى..

تخاريف خاصه! said...

SAMPATEEK

مانا بقولك كفايه علينا حب تامر حسنى..وعماد متعب...

بلاش ابو تريكه عشان بحب لعبه..
:D

تحياتى ..ونورتىالمدونه





جرووووم

:D

طب ليه كده..بس...ده المهندسيين غلابه والله...بجد..وخصوصا فى بلدنا دى...

عود احمد يا اخى
:)

وهدورلك على حاجه نكره بيها بتوع الكومبيوتر ساينس

:P

تخاريف خاصه! said...

ابيه شاور...

:D

الاعتراف بالكره فضيله

:D

ربنا يكرمك يا ابيه دعواتك بقى...


عمرو فكرى
:D
ايه اخبارالاصابات؟

تخاريف خاصه! said...

سووووووورى
نوران معلش لغبط الترتييييب

:D

كلنا بنكره ظلم الظالمين...لحد مايتعدلوا...
بس

منورانى


SOOOO

ااااه دخلنا فى الانتماء والوطنيه والكلام الكبير...

احم...

بتهيألى المساله مش مساله وطنيه على قد ما هى كل واحد يبقى عارف حقوقه وواجباته وبيأديها لوجه الله..مش عشان فلان بيحاسبه او فلان فوق دماغه ولا عشان بيحب الوطن..لانك لو دورت على حب الوطن دلوقت..للاسف ماتلااااقيش..

تخاريف خاصه! said...

نوران تانى....

:D

معلش المفروض انى بزاكر عشان عندى امتحانات اخر السنه كمان اسبوع كده..!!!!!

دعوااااااااااااااااااااااتك

محمد العدوى...

ربنا يكرمك..

تحياتى

الـسـيـدة نـون said...

بالنجاح ان شاء الله يا شيمو
وربنا معاكى ومع اللى زيك يارب

اختك خيخة

Noony said...

والمترجمين مكروهين..بيعكوا الدنيا وبيوقعوا الناس في بعضها :)

بيني وبينك...أنا بكره الدكاترة والضباط -شرطة وجيش- والمحاميين مووووووووووت
سوري بقى :$

يا ستي...اهو كله برتقاااال :)

قومي شوفيلك كلمتين ينفعوكي...ياللا
:)
كملي مذاكرة يا بنوتة
نوني

قطوف said...

فعلا والله احنا شعب كاره نفسه
واجدع حاجه يركب الموجه يعنى لو تلقينا بنكره مهنه عشان الموضه نكره مهنه معينه تلاقى كله بيكرها
بس فيه حاجات عمر ما الناس هتكرها زى الدمايطه اللى انا منهم عشان شعب كريم واصيل

اسامة يس said...

السؤال هو ...؟

هل تحب ان تعذب حتى تعترف ..؟ اذا كانت اجابتك بنعم
فأنا لا احب
وإذ كانت اجابتك بلا
فلا تقل لماذا تكره الشرطة...
واذا كانت وسيلة البوبوني غير صحيحة فوسيلة هتك الأعراض العن واضل سبيلا
هذا كله بفرض انه يتعامل مع مجرم
فما بالك من انسان عادي بريء لا اخص واقعه بل اتكلم عن اي فرد بريء عذب

شكرا

السـيد شبـل said...

كلامك معقول جدا...... واحنا فعلا شعب كاره نفسه... واقصد بنفسه نفسه مش حتى غيره....عالب الشعب عنده احساس بالنقص وبينظر
لنفسه نظرة دونية....
ونبيشوف اى حد من دولة اجنبية افضل منة ...
انا مش عارف ايه السبب بالرغم من انا عرب والنبي عربى.....
ودى اهم حاجة
زمان كنا فراعنة اصحاب حضارة ود ين اه والله الفراعنه طلعوا مؤمنين طبعا باستثناء فرعون موسى...
المهم انا عامل مدونة جديد انا اصلا داخل عالم المدونات كله جديد
-----------------------------------
هستناكى تشوفيها وتقولى رايك بجد هبقي محبط لو فتحت الدونة بتاعتى ونا لقتش رايك-------------------
وهتلاقى ليكى لينك عندى وياريت الاقى اللينك بتاعى عندك

السـيد شبـل said...

المدونة الأولى على العالم
""""""""" بلا اسم """"""""
مستنيكم

السـيد شبـل said...

السيد شبل.. بلاإسم
--------------------------------
انا عايز اللينك بتاعى يكون كده
---------------------------------
دلوقتى هتقولى هو كمان .. هيتشرط؟
--------------------------------
بصراحة آه
--------------------------------
هتقولى طب انا مش ضايفك...
---------------------------------
لا خلاص معلهش ضيفينى بعد اذنك

Anonymous said...

اولا بيب بيب اهلى :$
احنا شعب الفتره الى فاتت خنقته الماده بجد وبقينا فى حرب اسمها لقمه العيشة بقينا بنتعامل مع اى حد غيرنا بكره وحقد وعدم اعجاب
نسيتى حاجه انى فى وسط ضباط الشرطه والمسئولين والمدرسين والمحامين وابناء الوظائف الواحده بنكره بعضنا البعض برضه

dr.Roufy said...

هههههههه
في نفسنا والعيشة كلهاوالله هما الى خلونا نوصل لكدا..كرهونا في نفسنا والعيشة كلها..لحد ما انحصرت اهتمامات الناس بالكورة والمغنيين

dr.Roufy said...

اعتقد ياشيماء ان دا سببه ان قيمة التراحم..قلت في حياتنا..عموما يعني
وان الى في ايده سلطة ايا كانت بيحاول يستفيد منها ومش مهم ايه التمن بقى
وطبعا سلطات الميري لا تُقارن بغيرها من السلطات..ويمكن دا السبب

صاحب البوابــة said...

وبجمع السابق ذكره نجد اننا
شعب كــــــــــــــــــــاره نفسه اسااسا...

وماله..

كفايه علينا حب الفنانيين والرقصات ولعيبه الكورة..
!!!!!

--------------

ختام راااااااااائع

تحياتي

أحمد سلامــة said...

تفرق بردو كتييييير
ده هتك عرض مش قفى

والشعب كاره نفسه لانو غلبان والضغوط عليه كتيره جدا جدا
ومش عاف يوجه طاقة غضبه في الاتجاه السليم
تقبلي عدم كرهي :)

basma saghir said...

انتي كدة جبتي الاخر فعلا
حسستيني اننا كلنا بنكره بعض...بس هو يمكن مش كره قوي احنا احتمال نكون مش طايقين بعض مش اكتر

Dr Emad said...

انا شايف ان الحكاية مش كره لفئه معينه وخلاص
لا هى العمليه متعلقه بممارسات معينه وخصائص معينه للفئه دى
وعلى حسب نظره الناس ليها وفهمهم لابعاد مهنتهم ووجهه نظرهم فيها اساسا
بس فى ثوابت معينة منقدرش نتكلم فيها
وهى ان واحد هتك عرض واحد
سواء كان ظابط او طبال حتى
الاتنين واحد وعقابهم المفروض يكون اكتر من كده بكتيييييير
اما بالنسبه للاسباب التافهه لكره فئات معينة زى الاطباء مثلا
فدى لاسباب غير منطقيه واكيد اللى بيفكروا كده ناس سطحيين
وبالتالى ارائهم مش تهمنا
بنحب كل الناس
وبنكره المتجاوز والمنحرف فى اى مهنه

موجة said...

حقيقي دي ظاهرة تستاهل نفوكس عليها .. ( نفوكس يعني نعمل فوكس عليها يعني نركز عليها بس بالانجليزي يا مرسي )
هههههههههههههههه
حقيقي الناس بقت تكره الظباط و العساكر .. دا انا و انا رايح القسم بس علشان اعمل ورق الجيش طبعا ما كنتش خايف اكيد بس ما كنتش مطمن .. فيه حاجة قالقاني ما هو اكيد مش زي ما بادخل بيتنا يعني .. و كنت متصور انهم ممكن يغيروا الصورة اللي في بالي لكن مش عارف اعتقد ان العيب فينا .. فرغم احترامهم الشديد جدا جدا ( ناس طيبين قوي يا خال ) ( ناس ذوق ذوق ذوق بصراحة ) .. اتمنت ساعتها اني ما ادخلش الجيش لانه ازا كانوا بيعاملوني كده و انا لسه باعمل ورق الجيش امال لو لبست الافرول المموه بتاع الجيش و بقت تجت سطوته ممكن يعمل فيا ايه
و الحمد لله ربنا استجاب لدعاء الغلبان
و خدت تاجيل ..
هما الفئة دي تعاملها كده .. و الله اعلم دا جزء من طبيعة عملها
ربنا يكفيني و يكفيكم شر الاقسام و لا يحكم فينا من لا يخافه و لا يرحمنا
آمين يا رب العالمين
بوست رائع و ملاحظة جديرة بالتناول
انا فاكر واحد قالي خبر سقوط عربية امن مركزي في النيل من على كوبري عباس و هيا راحة الجماعة توقف مظاهرة
كان فرحان و منشكح للغاية و ضلعت كل محاولاتي العاثرة علشان افهمه ان دول ما لهومش ذنب
خالص تحياتي

Tamer Nabil Moussa said...

المشكلة الان ان كل فئة اصبح فيها الخارج عن التقاليد والمتعارف عية

بدل ما يكون فى خدمة الناس بيكون عليهم

دة حالة عايزة يتعمل عليها ابحاث ونشوف اية التأثيرات والمتغيرات اللى قدت الى كدة.

تحياتى

تخاريف خاصه! said...

انا جيت
اسفه ع التأخير ف الرد..
:)
بسم الله نبدأ..

نووووونى...
كده...بتكرهى الدكاتره؟؟!!!!

:(
طب هما بيحبوكى يا ستى

:)

سي السيد...

هى دى المشكله التعميم ...انا اعرف ناس من دمياط كويسين جدا..وخدومين جدا جدا...على غير العاده يعنى...
:D

تخاريف خاصه! said...

OSAMA

طبعا ماحدش يحب يتعذب حتى يعترف..حتى لو كان جانى..كفايه العقاب..
بس زى ما بقول لحضرتك..انا مش بدافع عنهم..وطريقه بعض ظباط الشرطه دى..مش جديده يعنى مش ظباط اليومين دول بس..من زمان يعنى...
والشرطه زى ما فيها وحشين فيها كويسين..

انا بتكلم على كميه الكره المعمم للناس بين بعضها..
يعنى المفروض ماقولش انا بكره الشرطه...لا..
المفروض ان اننا اكره اسلام نبيه هو واللى زيه...

تخاريف خاصه! said...

...د.السيد الشبل

مش عيب ان اشوف ان حد احسن منى..مدام ده واقع..
العيب انى اشوفه و افضل واقف اتفرج عليه..
تحياتى...

رئيس جمهويه نفسي...

اولا..طبعا بيب بيب اهلى
:D

ثانيا .. عندك حق..ربنا لا يجعلنا فعلا من الحقوديين...

تحياتى

تخاريف خاصه! said...

ROUFY...

هى قيم كتير اختفت...فعلا من اهمها التراحم...
واظن اللى بيحصل فينا ف الامتحانات اكبر دليل..
:D

تحياتى يا قمر..

صاحب البوابه...

ربنا يعزك..

تخاريف خاصه! said...

احمد سلامه

لا يا دوك احنا مش شعب غلبان..احنا شعب نعسسااان..نيمان...كده

:D

تحياتى ..مع عدم كرهى..
:D

بيسو..

مش طايقين بعض..كارهيين بعض..هى نفس النتيجه...
انقطاع تواصل..وتشتت..
:)
منورانى
وسعيده بزيارتك

تخاريف خاصه! said...

DR.EMAD

صح ..يبقى انا اكره الممارسات والسلوكيات دى..واكره اللى بيمارسها..لكن مايبقاش كره عام وموجه لكل الفئه..الصالح والطالح..
انا مابتكلمش عن الشرطه بس..انا بتكلم عن اى فئه...

حضرتك فعلا اوجزت.."احب كل الناس..واكره سلوك المنحرف والمتجاوز فى اى مهنه

تخاريف خاصه! said...

موجه

الجيش.. تعليم وتهذيب واصلاح..
:D

منور المدونه حضرتك...

تامر نبيل..

الابحاث هتطلع ان الاسباب اللى ادت لكده..كبت الناس والضغوط الكتيره...
والمتعلقات...غياب اهم اسس ومبادئ الحياه من التراحم بين الناس..ورفع شعار "ياااالا نفسي"

تحياتى
:)