Saturday, April 7, 2007

ويبقى التاج على رؤوس المدونين...

السلام عليكم ورحمه الله..

بما ان د .ارتعاشات ربنا يعزه بعتلى تاج...
....
اول تاج فى حياه هذه المدونه...
فانا هرد عليه...سريعا...
:)

وربنا يسهل...
اول تاج.....
احم
تكلم عن هوايه لما بتمارسها بتستغرق فيها تماماوتنفصل عن عالم الواقع لفترة من الوقت اثناء ممارستها؟؟؟

ممممممم
هو ممكن اقول الكتابه..وان كنت انا مش بعتبرها هوايه..بعتبرها علاج نفسي المفروض كل واحد يعمله مع نفسه..
بس هى دى فعلا الحاجه الوحيده اللى بنفصل فيها عن الواقع تماما..
:)

التاج االثانى...
هل مقدار سعادتك او شعورك_ايا كان عند تمرير التاج لك يختلف حسب المدون الذى يمرر لك التاج؟؟
ممممم
بصراحه انا ماقدرش ارد على السؤال ده لان مافيش غير ارتعاشات هو اللى مررلى تاج
بس عامه اكيد هفرح بالكل..
:)

السؤال الثالث

هل ترى للتاج اهميه حقيقيه؟؟

هو اكيد له اهميه...يعنى اللى ممره ده بيبقى عايز يعرف رد على اسئله التاج..عشان تكتمل صورة معينه فى دماغه عن اللى هو باعتله التاج..

السؤال الرابع
هل فكرت فى عمل تاج خاص بك؟؟
االرد اخر الجلسه....
:)
قصدى اخر البوست...
السؤال الخامس
هل تفضل قراءه اجوبه التاج عند المدونين الاخرين؟؟ام لا تهتم سوى بالتدوينات االاخرى؟؟
هو انا فهمت الشق الاول من السؤال...
اه بحب اقرى اجوبتهم....بس هما بس يجاوبوا بصراحه
:)
عندما ترد على التاج مالذى تراعيه اكثر؟؟؟
اكتر حاجه انا فعلا حاولت اراعيها هنااا.
هى الصراحه....
:)
هل تحرص على قراءه اجابات من تمرر لهم التاج؟؟وهل تغير اجابتهم للتاج شئ فى ادراكك؟؟

كلاكيت تانى مره..دى اول مره يتبعتلى فيها تاج...
بس اكيد هحرص على قرايه اجوبتهم..امال انا هبعته ليه؟؟؟
ومش عارفه اذا كانت هتغير حاجه ولااااااا....
.......
هل تلتزم حرفيا باسئله التاج؟؟؟
اينعم
ماهى نوعيه التاجات التى تفضلها؟؟؟
كلاكيت تالت مره...دى اول مرة يتبعت لى فيها تاج...بس اكيد بحب التاجات اللى دمها خفيف...

هل كنت طالبه شاطره ف المدرسه؟؟؟
جداااااااااا ...للاسف
ايه اكتر ماده حبيتيها فى المدرسه والكليه؟؟
فى المدرسه كنت بحب الرياضه جدااا..والفيزياء..
وفى الكليه..
الحاجه الوحيده اللى حبيتها هى الباطنه..وخصوصا القلب

و الانف والاذن
غير كده ...ماقلوكوش...
:(
ايه اكتر ماده كرهتها فى المدرسه والكليه؟؟
فى المدرسه..كان ممكن ابلع الجغرفيا والتاريخ...بس اللى فعلا كنت كرهاه كرهاه ..هو الاقتصاد...كنا بناخده فى تالته ثانوى وكان قرفنى فى عيشتى..
فى الكليه...وبما ان الارف كتير...
لكن اكتر حاجه قرفتنى برضه هو طب المجتمع...
!!!!!!!!!
كنت عايز تطلع ايه وانت صغنن؟؟؟
زمان وانا صغيره..ماكنش نفسي اطلع حاجه..كان نفسي ابقى كبيرة وشاطرة ومتفوقه وبس...
لا فكرت ف يوم ادخل طب ولا الكلام ده.؟..يمكن فى ثانويه عامه..ابتديت اقول ادخل صيدله..بس ماكنتش بميل للكيمياء اوى..
فتراجعت...
بس اهو الحمد لله...الوااحد برضه يرضى بنصيبه...


:)


كده التاج تقريبا خلص يا ارتعاشات...
انا بقى عايزة امرر تاج..غير اللى فوق....
هو عباره عن سؤالين..

1-ازاى عرفت عنوان مدونتى؟؟؟
2-ازاى اثرت مدونتك فى شخصيتك؟؟؟
يمرر هذا التاااااااااج...ل
ارتعاشات طبعا_ماهو كما تدين تدان...
shower mirror
the groom
Noony
esmeralda


,كفايه كده...
والسلام ختاااااام...

10 comments:

The Groom said...


الله يكرمك ويوفقك بلا حدود يا د.تخاريف

انا سعيد بك و بمدونتك في وقت قلت فيه السعادة او كادت تنعدم

شكرا على التاج و لو اني بكره التاجات لكن ولو حرد عليه عشان متزعليش

حجاوب على التاج بتاعك قريب جدا ان شاء الله

ادعيلي كتير و ادعي لعمتي في المدينة المنورة بجد متنسيش

الله يكرمك و يوفقك يا رب

ربنا يصلح الحال

تحياتي من ماناساس البلد

Shower-Mirror said...
This comment has been removed by the author.
Shower-Mirror said...

ازيك يا شيمو يامدبسانى .... :)

انا كنت مستخبى من حكاية التاجات دى و ماحدش عارف طريقى ....


بس هارد عشان خاطرك ... و انا مبسوط مووت انك افتكرتينى بالتاج ده ....

اكيد عشان عارفه انك انت كمان من العزاز عليا ....

هارد عليه قريب انشاء الله ...

ابقى تعالى شوفى باقى الفيلم ..... :)

تحياتى

تخاريف said...

جروووم

انا كده هعيط حضرتك..:(
ربنا يكرمنا كلنا يارب ويشرح صدرك وييسر امرك..
ويشفى عمتك..وتطمنا عليها قريب ان شاء الله

shower mirror

ربنا يكرمك بجد انا كده هعيط بجد..
:)
ربنا يسعدكوا كلكم يااااارب
:)

الوردة السوداء said...

ايه الدبلوماسية دى

انا بحب الستفاضة فى الكلام
عشان افهم الناس

عموما تتعوض فى تاج تانى

saso said...

ممم ..عرفت لينك مدونتك ازاي
هاقولك انا طيب
دايما بيلفت نظري تعليق ذكي اروح لصاحب المدونة ..وكده جيت عندك
حلو اني ابتديتها بتاج ..علشان حاجة اعرفك منها اكتر من البوستات التانية
:)

ert3ashat said...

اشكرك بشده يا تخاريف....على التاج

و اجاباتك جميله و الله...عسل

Noony said...

أغيب كم يوم..ألقي ناس بيجيلها تاجات وناس بتبعت لي تاجات و أسئلة وبوستات جديدة وحركات
ربنا يكرمك يا ستي

بس في حد بيحب الفيزياء في الدنيا دي؟
أنا ملحقتش أعلق في البوست اللي فات عشان كنت مسافرة..بس يا رب آجي على بالك على طول..وأطلع بنوتة صغننة وأمورة
ههههههههههههههه

شكراً على التاج يا قمر
وشدي حالك في المذاكرة يا دوك

نوني

تخاريف said...

الورده السوداء

ليه هو انا غامضه اوى كده..
:D
ان شاء الله تتعوض فى تاج تانى..
منورانى بجد..
:)

saso
منورانى حضرتك برضه..
ويارب ماتكونش اخر زياره...
وهروح ادعبس عندك..
:)

ارتعاشات اللى مدبسنى...
كل ده شكر؟؟؟
العفو حضرتك..
:)
بجد بشك فيك...
:D
NOONY
هههههه
طبعا صغننه واموره...
:)
وحمد لله ع السلامه...
:)
وردى ع التاج بقى..
:)

Esmeralda said...

ماشى
حاخد التاج
بس مش حاجاوب دلوقت عليه
باحب اجاوب فى الروقاااااااان

شكرا يا كميل