Wednesday, February 13, 2008

هو وهى وصاحبتهم..1

-هى : الحمد لله الواحد خلص الكليه وخلص من البهدله دى..!!

-صاحبه هى :اه الحمد لله...ربنا يسهل ف الشغل بقى...


- هى :ايه ده ..هو الواحد هيرجع يتبهدل تانى فى الشغل..

-صاحبه هى..بس علت صوتها شويه : طبعا...امال انت عايزة تقعدى فالبيت..

بنتبهدل طول الست سنين عشان تيجى ف الاخر تقعدى فا لبيت.!

-هى..وهى تكتم ضحكتها : فعلا عندك حق الواحد لازم يشتغل.. وماله لما يتبهدل.. بس بهدله عن بهدله تفرق..!!!!


- هو.. واحد زميل هى وصاحبتها ..وحاطط عينه على صاحبه هى..: يعنى انت مثلا لو جه واحد واتقدملك


وكان عايزك تقعدى فى البيت ..تقولى ايه؟


-صاحبه هى.. : مش عارفه ..بس ساعتها اكيد هقدر اوفق..بين بيتى وشغلى..

-هو وهو متحمس شويتين..: طب والنبتشيات؟؟؟هتعملى فيها ايه؟؟؟؟

صاحبه هى..: لا مانا ساعتها هختار تخصص سهل ومافيهوش نبتشيات..

هو..: مافيش حاجه اسمها كده ..انت كده بتاخدى فرصه واحد كان ممكن بيها يفتح بيت...

صاحبه هى تنفعل بقى.. : يعنى ايه يعنى..مانا ذاكرت زى زيه..

-هو .. وهو محموق شويتين تلاته اربعه..: بس ف الاخر برضه انت مش زيك زيه..لازم تراعى دى...

-هى تتدخل عشان شمت ريحه شياط..:خلاص ياجماعه صلوا ع النبي..
..

19 comments:

Fatma said...

ههههههههههه
أول تعليق وأول زيارة
انا شفت حوار زى ده بردو
هو .. انتى عايزة تشتغلى بعد ما تخلصى
هى .. طبعا امال بتعلم وبقرف نفسى ليه
هو .. طيب ما تتعلمى وتقعدى فى البيت احسنلك من البهدلة والقرف ده
هى .. وانا اسيب حقى فى الشغل ليه واقعد فى البيت
هو .. علشان تستنى ابن الحلال
هى .. ابن الحلال ييجى براحته وانا بشتغل دى مش حجه
هو متغاظ اتنين تلاته عشروميه .. براحتك

وأى خدمة

Rivendell** said...

هههه والله يابنتي شر البلية ما يضحك يعني انا استغرب اوي البنت اللي بعد دا كله تقولك اقعد في البيت .. طب دخلتيها ليه يا ننوسة عين ماما واللا اللي ييجي يقولك اقعدي في البيت طب بتاخد دكتورة ليه يا ننوس عين مامتك
حسابات الناس العجييييييييييبة
واه تقولك انا اخد حاجة اكاديمي وابقى بقيمتي ولا مش عايزة نباطشيات زي ماتكون النباطشيات دي هتستمر للابد , كل الناس عايزة كل حاجة وعايزينها دلوقتي حالا

Noony said...
This comment has been removed by the author.
Noony said...

بصراحة...واسمعوا كلام واحدة اتخرجت وبتشتغل ومتبهدلة ومش دكتورة وأمضت 6 سنين من حياتها في التعليم المبهدل دة

في الوضع وفي الزمن اللي احنا عايشينه، البنت أكرملها تقعد في بيتها

بكرامتهاااااااااااااااااااااا
ويجي ابن الحلال اللي يطلع عينها إن شاء الله
وإن اتأخر شويتين، تتسلى بالشغل شوية بس برضه البيت أكرملهاااااااااااااااا

اسمعوا كلامي يا بناويت

في الآخر البنتهتفضل طول عمرها بنت حتى لو دخلت طب

مش كدة ولا اييييييييييييييييه؟
:)
نوني

bota said...

السلام عليكم

طبعا الحوار ده بنشوفه كتير
انا عن نفسي مستعده اتنازل عن حقي في الشغل لو ده هيحل ازمه البطاله
ففعلا يبقى الجنش الناعم ممكن في الحاله ديه يقعد فعلا في البيت
بس اعتقد ان فيه ناس بيبقى الشغل بالنسبه ليها حاجه اساسيه علشان تعرف تعيش
فبما ان احنا مش هنعرف نفرق يبقى خلاص اللي يلاقي فرصه وميشتغلش يبقى .........ههههههههه

معلش اول مره اجي واتكلم كل ده رغايه بقى
ربنا يوفقك

أحمد سلامــة said...

مش عارف يا نوني يعني البنات متتعلمش بقى وخلاص مدام كده كده قعاد في البيت
------
المهم يا دوك
ابقى قولي لـ هو والله ده الموجود
واكيد في هي تانية تنفعه
وسلامي لهي الأولانية

Noony said...

لو سمحتي يا شيمو سيبيني على أحمد

هضربك يا احمد يا سلامة
أنا مقولتش إن البنت ماتتعلمش..لو سمحت متقولنيش كلام ماقولتوش

البنت تتعلم أحسن وأفضل من أي ولد طبعاً..أنا مش ضد التعليم
أنا ضد شغل البنات في الوضع الحالي
ومع الناس الجميلة الموجودة في زماننا دة وبأمخاخهم الفذة دي

بص، أنت مش هتفهمني ولا تعرف أنا قصدي إيه أبداً غير لما تبقى بنت وتتعرض للي احنا بنتعرضله

ونروح بعيد ليه، عندك أنا مثلاً..أنا باشتغل بانزل من بيتنا الساعة كم؟
6:30 الصبح وبرجع الساعة 6:30 بالليل..يعني 12 ساعة كل يوم
تفتكر أنا لما أرجع البيت بعد اليوم الطويل دة (ناهيك عن قرف الشغل نفسه والخنقة الاحتكاك بناس أقل حاجة يستاهلوها هي الحرق) أبقى عندي أدنى قدرة إني أعمل أي حاجة في البيت؟ بيتي؟
من غسيل وطبخ ونظافة وزيارات عائلية؟ وإن كمان فيه أطفال فهيبقوا رعاية مضاعفة...تفتكر إن ينفع واحدة تشتغل بالأسلوب دة وترجع تعمل الحاجات دي وتقدر توفق بينها من غير ما هي تنهار في الآخر (على الأقل)؟

بالمناسبة السعيدة -1- كل الأشغال دلوقتي كدة ولو لقيت حاجة أهون لو سمحت دلني عليها -2- أنا باتكلم عن شغل البنت عموماً، أما عمل الطبيبات فطبعاً مهم جداً على الأقل في بعض التخصصات يا دوك، بس بشرط توفير ظروف ومواعيد ملائمة لعمل المرأة -3- مع إني متخرجة بقالي فترة وبشتغل بس بخلص كورس أدخل في دبلومة ولما خلصت كل الحاجات دلوقتي حاسة بفراغ وبدور على حاجة أدرسها عشان بستمتع بالدراسة والمذاركة وجو الامتحانات -4- مامتي كنت بتشتغل من وهي في الكلية لغاية من كم سنة لما طلعت على معاش مبكر فلو سمحت منفيش مجال لمقارنة زمان بدلوقتي -5- ايه اللي جابرني؟ فراغ بعيد عنك...واحدة مش وراها حاجة، على الأقل باشتغل بعلمي وبدل ما أطلب من ماما مصروف

متهيألي كدة وضحت وجهة نظري

سوري يا شيموووووووز على الهيصة اللي عملتها دي
بس كان هيجرالي حاجة لو مقولتش الكلمتين دول
وانت عارفة أنا مطلسمة بالعافية :)

سلام عشان جالي استدعاء أروح الشغل بكرة (يوم اجازتي)..اروح أعمل حاجة مفيدة في دنيتي قبل ما أنام

نوني

رئيس جمهوريه نفسى said...

اولا انا ضد انى البنت تقعد فى البيت لو جات ليها فرصه عمل مناسبه لانى عمل البنت بيخليها تكتسب خبرات حياتيه من احتكاكها الخارجى بتكسبها لاولاده بتنفعهم فى المستقبل
ثانيا العصر الى احنا فيه لو البنت والولد بيشتغلوا يادوب بيكفو نفسهم يعنى بتساعد فى حمل البيت
موضوع فرصه بتاعت واحد يستحق اكتر منها اعتقد انى الكل ذاكر والكل اتخرج ومش ذنبها انى الحكومه طناش مش موفره حاجه لحد

يا مراكبي said...

أنا مش فاكر سمعت الحوار ده قبل كده فين

فين يا مراكبي فين

فين يا مراكبي فين

المهم عندي دلوقت .. هو إنت كنتي هي وألا صاحبة هي؟

تخاريف خاصه! said...

fatma

هههههههههه

واضح ان الحوار ده منتشر
:D

نورتينى...



RIVANDELL
الجميله

انت كلامك جميل وصح الصح..بس صدقينى المشكله ان اولويات الواحد او الواحده بمعنى ادق هنا ..يعنى اوك هى تعبت وكل حاجه بس فعلا بجد هى بعد كده فى نظرى احتمالات انها مش تقدر توفق بين البيت و الشغل (والمقصود هنا بالشغل هو الشغل اللى بذمه يعنى فعلا تشتغل مش قاعده مكاتب وخلاص مش ده الشغل اللى انا اقصده)

وكما قال الشاعر...
كل فوله وليها كيال...

:D

تخاريف خاصه! said...

نونى

كلامك فعلا المفروض كل بنت تفكر فيه كويس...

وبكرر تانى انا الشغل اللى اقصده هو الشغل..لكن قاعده المكاتب والتسالى باتقوير الكوسه وعمل بلوفرات للاطفال مش ده اللى اقصده خالص...


احيك يا نونى


BOTA

لا اتفضلى اتكلمى براحتك يا فندم بيتك ومطرحك..
:)

تخاريف خاصه! said...

احمد سلامه

:D

الله يسلمك يا دوك..وماتغيبش علينا ...

نونى..

:)


ربنا يعينك يا حبى

تخاريف خاصه! said...

رئيس جمهوريه نفسي..

اوك بيكسبها مهارات وكل حاجه من احتكاكها الخارجى..
بس معلش ف نفس الوقت هى اللى بتتعب حقيقى...

يا مراكبى

ههههههه

انا هى وخلاص ..

:D

بت خيخة وأى كلام said...

والله يا شيمو
انا شايفة
ان الكليات العملية بالذات
زى الطب والصيدلة والهندسة
انه ماينفعش واحدة بنت تكون درست فى كلية من الكليات دى وفى الاخر تقعد فى البيت
يعنى لو كان فى نيتها انها هتقعد بعد ما تخلص دراسة كانت درست حاجة بسيطة مش متعبة ومش مكلفة ماديا وذهنيا
لان على ما اعتقد ان الدراسة فى الكليات اللى زى دى بتكون محتاجة جهد جبار من الطالب
فحرام ان البنت تقعد تدرس كل ده وفى الاخر لما تيجى تتجوز وجوزها يقولها قعدى فى البيت تقوم تقعد
كدة ماينفعش

ويستحسن انها تتجوز واحد يكون نفس مهنتها لانه هيقدر اكتر طبيعة عملها

بس خلاص
اختك خيخة

lonlysmily said...

امممممم
والله انا بقول زى صاحبه هى
انا زى زى اى ولد ذاكرت وتعبت وطلع عينى بهدله ومذاكرة
وبعد اما اخلص انا اللى اقرر اشتغل ولا لا
اصل حرام اتعب كل كدا واهلى يصرفوا عليا اد كدا علشان اعد فى بيتنا استنى العدل
ميرضيش ربنا دا

يمامة شاردة said...

جوايا إحساس بيقوللي إن انتي هي
:D مش صاحبة هي

مااااا علينا
ماقدرش أعمم و أقول البنت لازم تشتغل بعد الجواز .. أو لازم ماتشتغلش
الظروف و تفاهم الطرفين هما اللي بيحكموا

يعني مثلا أختي اتخرجت من صيدلة _عين شمس "وما أعظمها!!"_ و اتجوزت و قعدت في البيت بمزاجها .. زوجها قال لها براحتك اعملي اللي يريحك

و هي دي راحتها :)

نقطة تانية :
أنا شايفة حكاية إن البنت المفروض ماتشتغلش عشان توفر فرصة عمل لشاب تاني .. ده مبدأ عقيييييييم

و بجد .. كل واحد دماغه مريحاااااه

سكــر said...

يعنى قعدتم ترغو

لغاية الاكل ما اتحرق

ههههههههه

بلا شغل بلا وجع بطن

ياشيخه الاكل احسن


تحياتى ليكى شسمو

بويت دمه خفيف ومدونه رائعه

اخيكى احمد سكر

امرأة تقول الذي لا يقال said...

كل الاختفاء ده ليه؟؟

بت خيخة وأى كلام said...

كل سنة وانتى طيبة يا شيمو
مش امبارح برضه كان عيد ميلادك التلاتة والعشرين؟
هو انتى مختفية ليه
طمنينا عليكى
سلام
اختك خيخة