Saturday, October 20, 2007

بلا نييييييييله!!!







بحب اقرا الجرناان اوى يوم الجمعه...
ومن عادتى انى امسكه واقراه من الاخر للاول..

يعنى امسك اخر صفحه اقراها الاول..

الاقيلك الخبر ده..

تكريم نبيله عبيد فى لندن...

قلت وماااااااااااله مايجراش حاجه ...الست الحاجه بقلها زمان وزمان بتفن

..وبتدى ..وبتدى..

.حقها بقى تتكرم..

واهى برضه اهو اسمها اى حد بيتكرم من بلدنا دى..وخلاص

طب مين اللى مكرمها..؟؟؟
الاقيلكو اللى مكرمها
"الجمعيه المصريه الطبيه بالمملكه المتحده....

نننننننعم؟؟؟!!


ليه ان شاء الله!!!


عملت ايه الابله نبيله للطب؟؟؟

زاكرت وطفحت الغلب ست سنين؟؟..

اتبهدلت فى المواصلات عشان تروح الكليه تتبهدل هناك برضه ؟؟؟

اهلها دفعولها من لحمهم الحى فى الدروس عشان تبقى دكتورة بتفهم وعليها القيمه.؟؟؟؟

عمرها اتعرضت لضغط الامتحانات..اكتر من 115 امتحان من ساعه دخول الكليه..!؟؟؟

عمرها مسكت قلم وفضلت تكتب بيه طول الساعتين فى الامتحان؟؟؟

عمرها اتهزقت فى امتحان شفوى؟؟؟

عمر دكتور صمم انها فعلا "مابتفهمش..ورأيها ده مالوش قيمه ..رأيه هو وبس..؟؟

عمرها دخلت المشرحه بتجرى عشان تلاقى مكان يدوب..تقف فيه وتشوف كويس...؟؟؟


عمرها صحيت من صبحيه ربنا الساعه 7 الصبح عشان تلحق المحاضره

..وف الاخر الدكتور مايجيش..؟؟

عمر حد قالها ان مرتبها هيبقى يادوب 200 جنيه وكام جنيه كمان عليهم..؟؟


عمرها مسكت سماعه ولو بالمقلوب..ولو فى فيلم من افلامها..؟؟؟


ولا مؤاخده يعنى..عمر حد قالها يا دكتووورة؟؟؟؟


طبعا تلاقيهم بعتين لها التذاكر...
اكيد..والاستضافه فين..
فى فندق..ماعرفش ايه فى لندن...
اه طبعا....ماهووو
.,....

وفى وسط بقى التساؤلات الثوريه

ديه جت ماما بمنتهى الهدوء
يابنتى سيبى الجرنان وقومى زاكرى..الامتحان فاضل عليه شهر...

بصيتلها ..وفرغت كل شحنه الغضب فى كلمتى المأثورة

"يعنى هما اللى زاكروو عملو ايه.


.بلا نيله..
!!!!!

24 comments:

و القادم....أجمل said...

و الله عندك حق
الحاجات دي بتجيب للواحد
شلل
و الله بجد

بس اللي مصبرني بجد
اني نفسي أوووي
اكون دكتورة
من أجل الرسالة نفسها
و الله بجد

مش عايزة اكون سبب في أذية حد
و مجرد سبب لعلاج الناس
و الله هو الشافي


يلا خير
المهم شدي حيلك في المذاكرة
و انا كمان هروح اتهبب في الجراحه

:(

ربنا يوفقك يا رب

:)

اسامة يس said...

عندك حق ان تغضبي وتشعري بالغيظ... من الاستخفاف بعقول الناس ... ولكن يجب ان نعلم ان معايير الاشياء اما مطلقة وهذه يغفل عنها الكثير من الناس في زحمة الفقر والاعلام والدعاية والبهجرة ... بمعنى ان المعايير المطلقة تقول ان من اجتهد نجح ويجب ان يكون مرفوع الرأس ... هو النجم ان صح التعبير ...
لكن تحت ضغط المديا والفقر والزحمة والفساد تنعدم هذه الماعيير .. وتبقى معايير اخرى معايير المال ...
لذك انصحك بمعيار آخر ربما يكون وسط بين المعيارين ان تكوني نفسك... ثم لا يشغلك هذا الغباء المستحكم من قبلهم....

دمت بكل ود...
خالص تحياتي

عمرو فكرى said...

معاكى حق فعلا :D

انتى عاملة زى ماما على فكرة
بتبدا اهرام الجماعة من صفحة الوفيات !!!!

safa7_karmooz said...

بس بس بس

اعصااااااااااااااااااااااااااابك

يولع اللى يزعلك

انتى واحده صاحبة طب وامتحانات :p

Dr Emad said...

هههههههههههههههههههههههههههههه
والله حاسس بيكى جدا انا عارف الشعور ده كويس
بس حنعمل ايه
هى بلدنا كده الشقيان هو الغلبان المرتاحين هما اللى متظبطين
وبعدين لازم تعرفى ان دى فنانه
وفنانه يعنى بتفن
والفن ده عندنا فى مصر شىء مهم جدا اهم من لقمه العيش والمواد التموينيه وحديد التسليح والاسمنت
ده طبعا لانه غذاء الروح زى منتى عارفه
وطبعا مشهد واحد من فيلم للحاجه نبيله ليه تاثير ولا السحر ينسى الجوع والعطش والهموم وكمان الالم
علشان كده بيكرموها لانها غلبت المورفين فى التسكين والباربيتيورات فى التهييس
اما احنا يا دكاتره
هنشنق يعنى
؟!
اعتقد ان 200 جنيه حلوين جدا وكافيين قوى
وده مرتب خيالى ممكن تجوزى وتشترى عربيه ويمكن كمان تعملى شركه انتاج افلام
وتشغلى نبيله عبيد عندك


بصرااااااااحه انا ندمان انى مطلعتش فنانه لانه يبدو ان دى اهم مهنه عندنا ف مصر

اهم من المهندس والمدرس

وكمان الدكتور
وكما قال حكيم:

عل الواحده كله يرقص

واحدة مفروسة said...

معلش يا شيماء
أصبرى يا حبيبتى
فات الكتير ما بقى الاالكتير

وبعدين الفنانة نبيلة ادت للطب كتير

ولسة الفنانة روبى ادت وبتدى ولسة حتدى
كل أما اقوله اه يقولى هو لا

Islamist Bloke said...

ربنا يبعد عنا وعنكم حرقة الدم

قولي للدكتورة اللى كاتبة التعليق اللى فوق ده........مالك انتي ومال روبي.........خشى كملي مذاكرة.......بتجيبي سيرتها هنا ليييييييييية؟

هو ده اللى جايبكم ورا........الانشغال بروبي وما الى ذلك.......لو كل دكتورة ركزت في الجراحة......هتنسى هموم المغص بتاع روبي وما شابهها

خلي بالك من امتحاناتك يا دكتورة(الكلام للدكتورة الآنسة الأستاذة اللى فوق) وبطلي نت شوية.......خشى ذاكري .........مش كل شوية هنقولها.........ياللا يا ماما.........عايزينك تنجحي بأة

والسلام

تخاريف خاصه! said...

ولاء..

ماشي ماكلنا نفسنا نكون دكاتره..بس فيها لو بقينا دكاتره والناس تقدرنا كويس..
معنويا وماديا...

ههههههه

كلنا متهبببون فى الجراحه

:D
نورتينى..بس هو انت معانا فى طب عين شمس؟؟؟



OSAMA

انا ماقدميش حل فعلا الا المعيار اللى حضرتك بتقول عليه..انى اكون نفسي...
بس حد يدينى فرصه بس!!!!

تحياتى

تخاريف خاصه! said...

عمرو فكرى..

انا سعات برضه ببتدى بالوفيات..

:)


سفاح كرموووز

ربنا يسمع منك...
ههههههه

دعواتكوو بقى..

تخاريف خاصه! said...

د.عماد..

هههههه

تعليقك فكرنى..بدكتور كان بيسأل الطلبه فى الشفوى..هى فيفي عبده بتهز ايه...
تعددت الاجابات من الطلبه..
لحد ماجه طالب قاله بتهز مشاعرى...
راح مديله الدرجه ا لنهائيه...
:D
:D

ده بمناسبه قول حكيم..ع الواحده كله يرقص..
:D


واحده مفروسه

لا..لا ...لا

هانت والراس بانت..
:D

Islamist Bloke

يااااااارب..
دعواتك معانا...

Noony said...

لالالالالالالا يا شيمو..اسمها اللي ذاكر ذاكر من زماااااان

وهي هتعمل ايه بالتكريم دة؟
كلنا عارفين هي في الاخر ايه وقيمتها ايه...وقيمة البني آدميين الحقيقيين اللي بيعملوا حاجة مفيدة في حياتهم ولحياتهم غيرهم مين

بصي يا حبي...نصيحة من أختك الكبيرة...ماتخديش كل حاجة على الأورطى (على راي أخويا)...أما جملتي المفضلة هي إياكشي تولع....بس طالما احنا عارفين ان احنا مش بنعمل حاجة غلط أو بنئذي حد
اعملي اللي عليكي وسيبيها على ربنا
افتكري دايماً...من يضحك أخيراً يضحك كثيراً
سيبيهم يفرحوا بتكريم عبيط لناس عبيطة من ناس أعبط...الموضوع كله عبط في عبط :)

ودي كانت آخر اللي يقرأ الجرايد..مالها الأمية؟ مش أرحم!؟؟

:)
نوني

nadeen_rev said...

والله العظيم انتى عشره على عشره
وانا زيك كده بقرا الجرنان من الاخر


ومبعرفش اركز ف عمودين بلال فضل وبراهيم عيسى ف الدستور الا وانا ماشيه ف السكه للبيت من عندالبياع


وعلى رايكبرضو للى ذاكروا عملوا ايه دانا هتنقط
انا بدرس اثار
والله الواحدبيذاكر ويدرس بيجد
وفالاخر ولاا الهوااااااا
بلا نيله

zordeak said...

قلتى كل اللى جوايا

بلاااااااااانييييييييييييلة

حسبنا الله ونعم الوكيل فيهم

احنا بنتبهدل اوى يا شيماء يا أختى

:'(

المهم انتى عاملة ايه فى الامتحانات

سنة 6 اخبارها ايه ؟

ربنا معاكى ويوفقك يا رب

:)

Ert3ashat said...

bla seten neyla...
teftkry 7adret dros ger7a 5 7esas fe el esbo3 el sa3a 7 el sob7...wla yemken tekon 7drt batna 4 7esas el sa3a 2....aw yemken kant btdy3 snen 3omraha elly kol elly nfe senha 3ayshen 7yathom be elt oool w el 3ard fehom w heya 3mala tzaker...

hany2a le nabila 3beed...mar7a :D:D:D..

e7na shoghltna deh ya shymaa 3amal ensany..men gher mokabel :D:D:D..e7na bn3amel rabbena...

lana allah :D

Noony said...

كل الدكاترة اتجمعوا يندبوا حظهم ليه بس؟

مانتم زي الفل أهو

تخاريف خاصه! said...

نونى الجميله..


على رأيك..مالهاالاميه...ارحم طبعا من الهم ده ..
:D


nadeen_rev

:)
ده طلع مش بتوع طب بس..!!

طب ده حتى بتوع الاثار الدنيا متظبطه معاهم.
:D

نورت المدونه..وان شاء الله ماتكونش اخر زياره...

تخاريف خاصه! said...

احمد مع نفسه...
:D
دعواتك بقى يا دوك...
خلاص الامتحانت اخر 11

:(((((((


ارتعااشاااااااات

هههههههههههههه
هههههههههههههههه

هو انت لسه شفت حاجه يا دوك...
ده احلى درس..ده اللى بيتاخد الساعه 7 الصبح وانت مش شايف قدامك اصلا....
كنا بناخد السنه اللى فاتت درس اطفال الساعه 7 الصبح...ماقلكش..كان بيبقى هاين عليا اخد الباطنيه معايا وانا رايحه..
:D

اما بخصوص ان مهنتنا دى عمل انسانى...
ماشي
طب واحنا مين يعمل فينا عمل انسانى ويرحمنا...
:(((((((

دعواتكووو بقى

تخاريف خاصه! said...

نونى الجميله تانى....

الموضوع اصله جه ع الجرح..
ههههههههههههه

Shower-Mirror said...

لما ربنا يكرمك كده و يقدرك انك تنقذى خياة طفل مريض و محتاجك ... و اهله يدعولك من قلبهم ...


ساعتها هاتعرفى الفرق بينك و بينها



تحياتى

تخاريف خاصه! said...

ياااااااااااه

احقا هذااا ما ارى..؟؟!!!
انه ابيهى العزيز شاور ميررور؟؟؟!!!

اين انت يا ابيه..ايه الاختفاء الطوييل ده...!!


عندك حق..بس ربنا يقدر الواحد بس ويعمل حاجه مفيده...يارب...

:)
منور المدونه جدا بعد طول غياب...

الـسـيـدة نـون said...

يا شبماء اول مرة ادخل على مدونتك وعايزة اقولك انى بقالى حوالى ساعتين ونص علشان اقرا كل تدويناتك
قريت كل تدويناتك دخلت على الارشيف وقريت بالترتيب
انتى هايلة هايلة هايلة
صدقينى عجبنى اسلوبك جدا
وصدقينى لو قلتلك انى اتمنيت انى املك ربع اسلوبك فى الكتابة
هايلة يا بنتى والله
خلتينى اضحك فى المدونات اللى فيها ضحك وخلتينى والله اعيط فى المدونة بتاعة ليه بنخسر ناس احنا محتاجينهم فى حياتنا
وخلتينى ادعيلك لما كنت بعرف ان عندك امتحان رغم انك خلاص امتحنتيه واكيد نتيجته طلعت
خلتينى احب والدتك الطيبة واتمنى انى اقعد افطر معاكم ونتفرج على صباح الخير بالعصر ههههه
خلتينى ارد عنك الشتيمة لما الولد قال عليكى خنيقة
خلتينى اعيط لما عرفت ان الدكتور طرد الست من الاوضة
من الاخر كدة حسيت انك انتيمتى وصاحبتى من غير ما اشوفك ولا اعرفك
اتمنى انى اعرفك اكتر
وسلامى لولدتك الحبيبة ولاخوكى عمر وربنا يرجعلك اختك بالسلامة
وياريت تزورينى فى مدونتى المتواضعة اللى لسة مبقالهاش كام يوم
وفى النهاية عايزة اقولك انتى بجد هايلة يا شيماء
سلامى لوالدتك كتيير
وابقى تعالى زورينى
والسلام ختام من بت خيخة وأى كلام

كاميليا بهاء الدين said...

والله عندك حقك تعملى ثورة وإنقلاب كمان
ماهى الآلقاب بقيت ببلاش دلوقت
ده حتى من زمان، وآسهل لقب دلوقت (الدكتوراه الفخرية الفولازية).

اللى مش قادرة افهمه لحد دلوقت.. هو لقب لواء اللى اخده الموسيقار عبد الوهاب!!! والاغرب انهم كانوا بعدها بيقولوا لما يذيعوا مقطوعة موسيقيه له او حتى اغنيه من الحانه-الحان موسيقار الاجيال اللواء محمد عبد الوهاب

سبحان الله ،، له فى خلقه شؤون ،، يادكتورة بحق وحقيق مش فخرية ولاعسكرية

تحياتى

آلاء الرحـمـن said...

قلبتى المواجع يا شوشو ليه بس كده
:D

عندى راوند <_<

تخاريف خاصه! said...

بت خيخه واى كلام...

اولا انت ليه مسميه نفسك كده؟؟؟

ثانيا ربنا يكرمك ويعزك..كل الكلام ده عليا؟.؟؟؟؟

انا ماستهالش حاجه منه...

انت اللى زيارتك نورتنى بجد...وانا اللى سعدت بزيارتك..

كاميليا

ههههههه

كمان لواااا ..كمان..!!!
يعنى دكتوراه فخريه و لوووووووااا....
يافقععععععععى
!!!


الاء الرحمن العسل...

روحى ..هقولك ايه اديك شفتى اخره العلااام..!!!!!

ربينا يعينك يا بنتى...
وادعوووووووولى...