Saturday, March 31, 2007

انا والنساااااا 2

-سلام بقى يا عيال نتقابل بعد الراوند ان شاء الله..لما اخلص هرنلكم
نظرت الى الساعه انها الثانيه عشر وخمس دقائق..وكانت محاضرتى النسا والجراحه انتهت للتو..
وهنا مضيت وحدى فى الطريق..فصديقاتى كلهن توجهوا لمستشفى الجراحه ليبدأوا الراوند الجديد..
اما انا فاهلا بالنساااااااااا
:D
دخلت الى المستشفى وبمجرد دخولى سمعت صوت"اااااااااه هموت..ااااااااااااااااااه"
وكان صوتا شجيا له لحن و-تون -خاصه..وابتسمت..وانا اقول لها فى داخلى
"اطلعى من دول يابكاشه..
:D
صعدت على السلم وانا افكر..ماالذى اجبر هذه السيده -وغيرها طبعا
:)
مالذى اجبرها ان تتحمل كل هذه المعاناه طوال 9 اشهر..وان تتحمل كل هذه المخاطر اثناء الولاده..فقط لكى يخرج من احشائها هذه المولود الجديد..وتظن اناها بذلك قد ارتاحت..ولكنه يأتى ليحملها معاناه اكبر..سبحان الله فعلا..

استعنا ع الشقا بالله رددتها داخلى وابتسمت ابتسامه خفيفه وطرقت باب حجره الدرس
سلام عليكم
ادخلى يا دكتورة..من اول يوم متاخرين..
وهنا اختفت هذه الابتسامه وحل محلها ملامح الاسد عندما يود ان يفتك بفريسته
حضرتك المحاضره لسه خلصانه
امال زمايلك دول جم امتى؟؟
ماعرفش حضرتك يمكن ماحضروش المحاضره...
قلتها وانا ابحث عن مكان لاجلس فيها..فقط لاعطى الفرصه لنفسي بان اعد من 1 الى عشره كى لا ارد رد لا يليق..ولكى اعطيه هو ايضا فرصه للحياه
:D
طب لو سمحتوا بعد كده ماحدش يتأخر الراوند بيبدأ12 بالظبط..
يالها من الجمله الغبيه لا محل لها من اى اعراب.. عندها بدأت انا فى العد..1...2...3
واخذ الدكتور..يشرح ثم يشرح ثم يشرح الى ان جاء الى نقطه ال
HISTORY TAKING
او كيفيه سماع وتدوين شكوى المريضه
-يا جماعه زى مابناخد اسم اعيانه وعنوانها..لازم كمان ناخد رقم تليفونها وايميلها..
هنا نظرنا اليه تلك النظرة البلهاء..وانفجرنا من الضحك
ايميل ايه يا عم الحج ..صلى على النبى..هى العيانه دى لو عندها ايميل..كان ايه اللى هيجبها هنا...فى الدمرداش الكئيبه؟؟
قال ايميل قال..ده ناقص تقولنا لو ليها بلوج ناخد عنوانه عشان نبقى نبعتلها كومنتات...
عااااااااااااااااااااااااااااااااااا
وتوالت الايام..وفى كل يوم احاول ان اثبت لنفسي بان هذه الماده ليست "بالخنيقه"ولكن ..هيهاااااات..
كما قالها سعد زغلول فى اوائل القرن الماضى
"مااااافيش فايده"
وفى كل يوم تتعالى الصرخات والصويت_ولا اجدعها تصويت هنا..
:D
وفى كل مرة تطرب اذنى لسماع هذه السيمفونيات المتنوعه يتبادر نفس السؤال فى ذهنى.."ايوةيعنى انتو ايه اللى جابركو على كده؟؟؟


ولنا عوده ان شاء الله
قلت ماطولش عليكو المره دى ف البوست..
:)

معلش يا جروووم

استسمحك انى اقول انا فضفضه المرة دى

ناس مهيسه...وناس من الغلب مسأيه
ناس الحمل تاعبها...وناس محترفه أسيه
ناس بتروح مابترجعش ..وناس ف الدنيا منسيه
:)
هتعرفوا سر الفضفضه دى فى البوست اللى جاى
"حالات ..حالات"


ان شاء الله

:)
دمتم سالمين..
:)

16 comments:

Noony said...

السلام عليكم ورحمة الله وبركاته

من أولها كدة الدكتور داخل شمال...بس رايق، لازم تاخدوا منها كل البايانات دي لغاية لما ابنها يدخل الجيش إن شاء الله...إيميل!!...بس السؤال بتاعك اللي محيرك دة غريب أوي!!!أبسط رد هو الحفاظ على البشرية من الاندثار يا دوك
:)

إثارة وتشويق برضه؟ ماشي مستنيين
:)

نوني

Rivendell** said...

مش ممكن

عايز ايه المنيل دا

اي ميل العيانة


يا لهوووووييييييي


سيبوني عليه دا مش هياتلم الا لما ياخد بونية في وشه عشان يقفله خااااالص

Eric Matt said...


امممممم طيب خدي دي

بس الاول انت متستأذنيش فضفضي زي مانت عايزة و مانت جامدة أهو و حتقطعي علينا

:)

كل سنة و انت طيبة


ناس مهيسه وناس من الغلب مسأيه
ناس الحمل تاعبها وناس محترفه أسيه
ناس بتروح مابترجعش وناس فالدنيا منسيه
ناس بيجوها البيت و ناس فالعنبر منسية
ناس على ناس مفترية وناس حمالة أسية
ناس عندها دم و ناس مدب مؤذية

يعني اي كلام

تصبحي على خير

سلاااااااااام من ماناساس البلد

:)

Shower-Mirror said...

enty elly 3'altana ya shimo,,, :) ezay mata7'deesh el email beta3 el welya :) we el icq no. kaman :)


WE ba3d keda mesh hatekteby prescription ,, hateb3atelha file bel bluetooth :)


فكرتينى بصاحبى الدكتور اللى حكيتلك عليه قبل كده لما كان بيحكيلى عن اول مره شاف كشف نسا ....

اسلوبك تحففففففه

Anonymous said...

يخرب بيت النسا...:)....الماده طبعا...انا بكرهها...بكرههاااا...بكرههااااااااا

و كمان يخرب بيت الهستوري تاكينج على الاوبستتريك هستوري ابو جدول 25 خانه

تخاريف خاصه! said...

noony

لا انا اقصد يعنى الست دى..بمستواها الثقافى اللى على قدها..ورؤيتها المحدوده..-ده مش عيب فيها ده يمكن ميزه انا بحسدها عليها-
يعنى ايه اللى يجبرها انها تتحمل مشقه الحمل..خلاص قلنا مرة وهتجرب وتعبت وجابت اول عيل ..ايه بقى اللى يخليها تارجع تحمل تانى...؟؟؟

ممممممم
هو مش سؤال انا عايزاله اجابه ...
:)



rivendell
بجد هو الدكتور عامه كويس يعنى شرحه كان كويس ساعتها يعنى الا بس فى حكايه الايميل..وده بجد حقيقى حصل واتضح ان مش هو بس اللى كده ده فى دكاترة تانين كتير بيقولوا الحكايه دى...
وحجتهم التعبانه انك لو عشان سافرت بره تبقى متعود ع الصح...
عايزه اقولهم صلوا ع النبى..لا بره ولا جوا..
خلونا نخلص بس

:)

تخاريف خاصه! said...

the groom

لا حلوة والله..
واخر حته دى حلوة جدا...
ناس عندها دم وناس مدب مؤذيه
:D

تخاريف خاصه! said...

Shower mirror

هههه icq

فعلا صح...اذا كان انا اساسا ماعنديش اى سى كيوووو

ماتقولنا يا ابيه على اسم صاحبك ده..اهو يبقى لينا ضهر فى الكليه التعبانه دى..
:D
ولا يمكن يكون هو من انصار الثورة التكنولوجيه فى
HISTORY TAKING
:D
اما بخصوص كشف النساااا..
فحذف لاسباب رقابيه...
شششششششششششششش

تخاريف خاصه! said...

ert3ashat

لا هى يعنى ماوصلتش عندى لمرحله الكره..
بس شكلها كده على وشك..
:)

اما بخصوص ال
Obestatric hisroty

فانا مارضيتش اقولهم عليه رحمه بالناس اللى هنا...
تلاقى الست من دول مخلفه سبعه قبل كده..وانا بقى المفروض اسالها عن كل واحد اتولد امتى وفين وكان عنده كام اسبوع ونزل عامل ازاى ..و..,...,و.......

لناااااااااااا الله

:)

Esmeralda said...

الدكتور داه منين بلظبط؟؟؟

عالم عايشة الوهم

معلش دخلت من غير احم و لا سلامو عليكوا

تخاريف خاصه! said...

Esmeralda
حضرتك تدخلى على راحتك ..المكان مكانك يا فندم
:)
نورتينى...

والدكتور ده..من جمهوريه الفزلكه المتحده...
:)
بس اكرر تانى عشان الامانه ..بجد شرحه عامه كان كويس..الا بس فى حكايه الايميل دى..عشان مانبقاش ظلمنا الراجل..
:)

الوردة السوداء said...

ههههههههههههه
عشان كدة انا اتنازلت ومردتش ادخل كلية الطب

يابنتى ده وجع قلب

أحمد سلامــة said...

خرج ابن ادم من العدم قلت ياه
رجع ابن ادم للعدم قلت ياه
تراب بيحيا وحي بيصير تراب
الاصل هو الموت ولا الحياه
وعجبي
(جاهين)

Anonymous said...

ايميل!!
اول مرة بصراحة اعرف موضوع الايميل ده , هو يمكن بس الدكتور كان لسة راجع من بعثة ولا حاجة لان في اوروبا والدول المتقدمة دا الطبيعي يعني بس مش في الدمرداش..
الاسبوع اللي فات كنت في مستشفي النسا وبسال واحدة صاحبتي "ازاي بيقولوا ان المرأة كائن رقيق وازاي بتقدر بجد تتحمل كم الالام دي كلها؟" سبحان الله

Shower-Mirror said...

هو اسمه مدحت صبرى ...ماعرفش ايه اخباره دلوقت ...لسه عندكوا و الا راح فين ... :)

المشكله ان انا اتخرجت قبله ب ثلاث سنوات طبعا و اشتغلت و بقيت بيه .... :) و هو كان لسه طالب ياعينى فالعلاقه بينا تباعدت للاسف ....

lonely said...

فرحت لما لقيت ان فى حد غير ى بيستغرب من الستات اللى بيحبوا وجع القلب وحمل وولاده وكدا
والمصيبه اللى بتجرب دا مره ازاى بتقدر تجربه التانيه والتالته وكا مره تقول توبه وترجع تانى
ويجى عيال يفضلوا يعذبوا فيها طول عمرهم
ربنا يشفى